Aira a Jehova nĩ matĩĩte thirikari na marũũri ma bũrũri. Nĩ tũtĩĩte kĩhooto kĩa andũ arĩa angĩ gĩa gũthuura kuuga mwĩhĩtwa wa kwĩhokeka harĩ bũrũri, kũhũũrĩra bendera tharuti, kana kũina rwĩmbo rwa bũrũri.

 O na kũrĩ ũguo, tũrĩ Aira a Jehova nĩ tũthuuraga kwaga kũnyitanĩra maũndũ-inĩ macio tondũ twĩtĩkĩtie atĩ matitwaranaga na morutani ma Bibilia. Nĩ tũkenaga rĩrĩa andũ matĩa wĩtĩkio witũ o ta ũrĩa o na ithuĩ tũtĩaga wĩtĩkio wao.

Gĩcunjĩ-inĩ gĩkĩ

•  Nĩ morutani marĩkũ ma Bibilia tũrũmagĩrĩra?

•  Ĩ kũngĩkorũo na watho ũronania no mũhaka tũnyitanĩre ikũngũĩro-inĩ icio?

•  Hihi Aira a Jehova makoragwo makĩnyita mbaru mwena ũmwe wa ũteti?

 Morutani maya merĩ ma Bibilia nĩ matũmaga tũtue itua rĩa kwaga kũnyitanĩra ikũngũĩro-inĩ cia bũrũri:

•   No Ngai tu ũbatiĩ gũthathaiyo. Bibilia yugaga ũũ: “Wagĩrĩirũo gũthathaiya Jehova Ngai waku, na nowe wiki wagĩrĩirũo kũrutĩra ũtungata mũtheru.” (Luka 4:8) Kaingĩ mĩĩhĩtwa ya kwĩhokeka harĩ bũrũri na nyĩmbo cia bũrũri ikoragwo na ciugo ironania atĩ mũndũ ekwenda bũrũri wao gũkĩra kĩndũ kĩngĩ o gĩothe. Nĩ ũndũ ũcio Aira a Jehova mationaga kwagĩrĩire harĩ o kũnyitanĩra maũndũ-inĩ macio.

   Ningĩ Aira a Jehova monaga atĩ kũhũũrĩra bendera tharuti nĩ ta kũmĩthathaiya, kana kũhoya mĩhianano, na Bibilia nĩ ĩkaananĩtie ũndũ ũcio. (1 Akorintho 10:14) Andĩki amwe a historĩ maugaga atĩ bendera cia bũrũri ikoragwo irĩ marũũri ma kĩndini. Mwandĩki ũmwe wa historĩ wĩtagwo Carlton J. H. Hayes aaugire ũũ: “Gwĩka maũndũ ma gũtũũgĩria bũrũri nĩ mũthemba wa ndini, na rũũri rũnene rũrĩa rũthathayagio nĩ bendera.” a Ũhoro-inĩ wĩgiĩ Akristiano a hĩndĩ ya atũmwo, mwandĩki ũmwe wĩtagwo Daniel P. Mannix aaugire ũũ: “Akristiano nĩ maaregaga kũruta magongona harĩ kĩũmbe kĩa roho kĩrĩa gĩetĩkĩtio atĩ nĩkĩo kĩagitagĩra mũtongoria wa Roma. Ũmũthĩ, ũndũ ũcio no ũringithanio na kwaga kũhũũrĩra bendera tharuti.” b

  O na gũtuĩka tũrĩ Aira a Jehova tũtihũũragĩra bendera tharuti, tũtimĩthũkangagia, tũkamĩcina, kana tũkamĩagĩra gĩtĩo na njĩra ĩngĩ, na tũtiĩkaga ũguo harĩ rũũri rũngĩ o ruothe rwa bũrũri.

•   Andũ othe makoragwo maiganaine maitho-inĩ ma Ngai. (Atũmwo 10:34, 35) Bibilia yugaga atĩ Ngai “oombire andũ a ndũrĩrĩ ciothe kuumana na mũndũ ũmwe.” (Atũmwo 17:26) Nĩ ũndũ ũcio, Aira a Jehova metĩkĩtie atĩ gũtiagĩrĩire gũtũũgĩria andũ a rũrĩrĩ rũna kana bũrũri mũna gũkĩra arĩa angĩ. Nĩ tũtĩaga andũ othe, gũtekũmakania kũrĩa maumĩte kana kũrĩa maikaraga.—1 Petero 2:17.

 Aira a Jehova matireganaga na thirikari. Twĩtĩkĩtie atĩ thirikari nĩ gĩcunjĩ kĩa “mũbango wa Ngai” ũrĩa arekete ũkorũo kuo. (Aroma 13:1-7) Ningĩ nĩ twĩtĩkĩtie atĩ Akristiano nĩ magĩrĩirũo gwathĩkĩra thirikari.—Luka 20:25.

 Ĩ angĩkorũo mawatho ma thirikari nĩ mararegana na mawatho ma Ngai? Rĩmwe no twandĩkĩre thirikari marũa ma kũũria kana no ĩcenjie mawatho. c Rĩrĩa kwarema gũcenjia, Aira a Jehova mathuuraga ‘gwathĩkĩra Ngai arĩ we mũtongoria, no ti andũ’ na mageka ũguo na njĩra ya gĩtĩo.—Atũmwo 5:29.

 Aca. Aira a Jehova matinyitaga mbaru mwena ũmwe ngucanio-inĩ kana maũndũ-inĩ ma ũteti. Rĩrĩa twaga kuuga mwĩhĩtwa wa kwĩhokeka harĩ bũrũri, kũhũũrĩra bendera tharuti, kana kũina rwĩmbo rwa bũrũri, tũtiĩkaga ũguo atĩ tondũ nĩ tũreganaga na thirikari. Handũ ha ũguo, tũkoragwo tũkĩrũmĩrĩra wĩtĩkio witũ ũrĩa uumanĩte na Bibilia wĩgiĩ ikũngũĩro icio.