Momukokomoko womudo woilonga womo 2021, * ovanhu mounyuni ova li tava mono oixuna omolwomukifi wekomba, o-COVID-19. Ngaashi sha popiwa moshitukulwa “Okuyandja oikwafa mounyuni aushe pefimbo eli lomukifi wekomba,” otwa longifa oimaliwa ihapu moikwafa oyo ya yandjwa pefimbo lomukifi wekomba, nopa totwa Oikondo yOkuyandja oikwafa yEekomitiye 950.

 Nonande omukifi wekomba owa li wa etifa okumona oixuna kuhapu, ovamwatate novamwameme ova li va kumwa koiponga yopaushitwe nosho yo oyo hai etifwa kovanhu. Omolwoiponga i dulife 200, Ovaunganeki vOkomitiye yOlutuwiliki ova li va pitika, opo koimaliwa oyo ya li tai longifwa mokuyandja oikwafa yoko-COVID-19 ku wedwe eemiliyona 124, 160, 000.00. Didilika nghee omayambidido eni a longifwa, opo ku kwafelwe oitukulwa yopavali oyo ya li ya hangika koiponga yopashitwe.

 Mo 22 Mei 2021, Omhunda yaNyiragongo moDemocratic Republic of the Congo oya li ya hovela okukunga omundilo. Embobo olo la kunguluka momhunda ola li la hanauna po omaumbo, eefikola nosho yo eenhele odo hadi kala omeva. Ndele embobo olo halo ashike la li la nyika oshiponga. Konima yomafiku manini eshi omhunda ya kunga omundilo, omute, oo wa nyika oshiponga, owa li we li hanena oshilando shaGoma nomwa li mwa holoka omakakamo edu mahapu. Ovanhu ve dulife petata loshilongo ova li va lombwelwa va tembuke. Ovanhu omayovi omafele ova li va ya onhapo, navamwe ova li va ya koRwanda.

 Mokati kaavo va li va tembuka omwa li mwa kwatelwa Eendombwedi daJehova 5 000. Vamwe ova li va kanifa omaumbo avo omolwomhunda oyo ya li ya kunga omundilo, navamwe omaumbo avo okwa li a tewa konima eshi va ya onhapo. Eekomitiye dokuyandja oikwafa moRwanda nosho yo moDemocratic Republic of the Congo oda li da longela kumwe, opo di kwafele. Oshitaimbelewa shaCongo (Kinshasa) osha li sha popya kombinga yokomitiye imwe yokuyandja oikwafa sha ti: “Nonande onghalo oya li ya dundakana modoolopa, nokuli nofimbo ovanhu inava lombwelwa va tembuke, okomitiye oya li ya yandja oikulya, omeva, omakumbafa nosho yo oikutu.” Modoolopa imwe, omo ovamwatate ve dulife po 2 000 va li va ongala, okomitiye yokuyandja oikwafa oya li ya dika eetenda, ye va pa ou-mask noku va yelifila nghee tava dulu okuliamena koCOVID-19 nosho yo koshimela.

 Moule ashike weemwedi natu doshiponga sha tya ngaho, ovamwatate ova li va yandja eetona dolwishi di dulife puhamano, eetona hamano doufila wepungu, eetona natu domaadi okulya nosho yo eetona natu domeva. Opo ku xupifwe oshimaliwa, oshitaimbelewa osha li sha unganeka ku landwe oikulya meni loshilongo, oyo tai dulu okukala ihapu, ponhele yokulanda kondje yoshilongo, oyo i na ondilo.

 Omumwameme umwe, oo e na eumbo la hanaunwa po eshi omhunda ya li ya kunga omundilo, okwa ti: “Otwa li twa teka omukumo notwa nyika oluhodi.” Ashike oukwaneumbo waye owa li wa kwafelwa palutu nosho yo pamhepo. Okwa ti: “Kekwafo laJehova, natango otu na osho twa pumbwa. Otwa li twa mona kutya Jehova okwa humbata omutengi wetu nosha li she shi ningifa shipu tu lididimike.”

 Ouxupilo owa kala tau kande omapunya oule womido moVenezuela. Ovamwatate otave lididimikile eenghalo didjuu, ve na omhumbwe yoikulya noukolokoshi otau hapupala. Ndele nande ongaho, ehangano laJehova ina li va ekelashi.

 Momukokomoko womudo woilonga twa dja, okwa li kwa longifwa oimaliwa i dulife peemiliyona 23, 280, 000.00 mokulanda nokutuma oikulya nosho yo eefewa kwaavo ve na omhumbwe. Oshitaimbelewa shaVenezuela osha ti: “Oshidjuu neenghono okutuma eetona 130 doikulya koitukulwa inhe yoshilongo omwedi keshe noku i yandja kovamwatate ovo ve na omhumbwe.” Opo ovamwatate va shilipaleke kutya oikulya itai ningi nai, ohava tumu oikulya oyo ihai ningi nai diva. Oshitaimbelewa osha weda ko sha ti: “Ohatu kendabala okulanda oikulya ihapu nohatu i lande pefimbo opo ya pya ihapu. Opo nee ohatu i tumu monghedi omo hatu xupifa oshimaliwa.”

 Leonel, oo e li oshilyo mOshikondo shOkomitiye yOkuyandja Oikwafa moVenezuela, oku hole oshilonga shaye. Okwa ti: “Oilonga yokuyandja oikwafa oye likalekelwa. Oilonga ei oya twa nge omukumo okudja eshi omukulukadi wange a fya ko-COVID-19. Ohandi kala nde lipyakidila nohandi kala ndi wete kutya ondi li ekwafo kovamwatate ovo ve li momhumbwe. Onda mona pauhandimwe nghee Jehova ta wanifa po eudaneko laye kutya ita ka efa oshiwana shaye.”

 Omumwatate umwe oo a mona oikwafa okwa li ha longo monakudiwa moshikondo shokomitiye yokuyandja oikwafa. Okwa ti: “Paife aame nda li nda pumbwa ekwafo. Katwa li ashike twa kwafelwa palutu. Ovamwatate ova li va kwafela nge nomukulukadi wange tu kale twa ngungumana. Ova li ve tu fila oshisho, ve tu hekeleka nove tu twa omukumo.”

 Oiponga imwe ohai didilikwa mo komesho yefimbo, ofimbo imwe ihai dulu okudidilikwa mo. Ashike luhapu ehangano laJehova ohali dulu okulanda nokutuma oikwafa meendelelo, otwa pandula omolwomayambidido eni e na sha noilonga yomounyuni aushe. Eenghedi dimwe dokuyandja omayambidido oda yelifwa ko donate.mt711.com. Tangi komayambidido eni ehalo liwa.