Oshoongalele shomo 2020, inashi monika mo nale mondjokokona! Osha li sha likoodingwa, ndele tashi tulwa komalungula paintaneta! Ashike ovamwatate novamwameme vahapu vomoMalawi novomoMozambique, ova li va tala oshoongalele inava longifa ointaneta. Osho osha li sha ningwa ngahelipi?

 Okomitiye yOvaunganeki nosho yo yOkuhonga yOlutuwiliki, oya li ya yandja epitikilo, opo oshoongalele moMalawi nomoMozambique, shi ulikwe ko-TV noshi pwilikinwe kOradio. Omolwashike sha li sha pitikwa shi ningwe ngaho? Omolwaashi Malawi oshimwe shomoilongo oyo i na eedata di na ondilo mounyuni, nomolwaasho Eendombwedi ashike dinini hadi dulu okulongifa ointaneta. William Chumbi, oshilyo shOkomitiye yOshitaimbelelwa shaMalawi, okwa ti: “Oradio no-TV oyo ashike ya li tai dulu okulongifwa, opo ovamwatate novamwameme va dule okukala poshoongalele.” Luka Sibeko, oo naye e li oshilyo shOkomitiye yOshitaimbelewa moMalawi, okwa weda ko a ti: “Ngeno okwa li ha TV noRadio, ngeno koshi yOshitaimbelewa shetu, ovamwatate ashike vanini va dula okulanda oikwamashina yokutala oshoongalele, inamu kwatelwa nokuli needata.

 Omolwomukifi wekomba wo-COVID-19, ee-TV neeRadio dimwe oda hangwa nale hadi ulike okwoongala kweongalo. a Ovamwatate ova li va ya keestasi odo, opo va ka wedelife ko ocredita yokuulikifa oshoongalele

 Ovamwatate moMalawi ova li va taalela omashongo. Luhapu eestasi ohadi pitike ashike eekastoma davo di pewe ocredita yovili imwe. Odi udite kutya, eepologalama dile otadi fifa ounye ovapwilikini. Ashike ovamwatate ova li va yelifa kutya oilonga yetu otai kwafele ovanhu aveshe. Nokuli nopefimbo lo-lockdown, ohatu kwafele ovanhu aveshe va mone onghundana iwa okudja mOmbiibeli, oyo tai kwafele ovanhu va kale ve na omaukwatya mawa nova kale va hafa momaukwaneumbo avo. Eshi eestaasi de shi uda ko, oda li da tambula ko eindilo lovamwatate lokuwedelifa ko ocredita

 MoMalawi, oshoongalele osha li tashi ulikwa ko-TV imwe, nokoRadio imwe, oyo aishe hai dulu okupwilikinwa kovanhu vahapu. MoMozambique oshoongalele osha li sha ulikwa ko-TV imwe nokeestasi deeradio 85.

 Moilongo aishe ivali, okwa li kwa longifwa N$ 418 888.68, opo ku ulikwe oshoongalele ko-TV, nokwa li yo kwa longifwa hanga N$ 296 800.00, opo shi pwilikinwe koradio. Oradio oyo ihai udika kokule oya li tai kosho N$ 222.60 ofimbo oyo hai udika kokule ya li tai kosho N$ 41 210.68.

 Ovamwatate ova li va longa noudiinini, opo va longife nawa omayambidido. Pashihopaenenwa, moMalawi ova li va kundafana neestasi di va kufile ko, nova li va kufilwa ko eepelesenda 30. Okukufilwa ko kwa tya ngaho okwa xupifa eedola N$ 25 391.24. MoMozambique eestasi dimwe oda li de tu kufila ko, molwaashi tu na edina liwa, eshi tu li ovanashili nohatu futu pefimbo.

 Ovamwatate ova li shi li va pandula nova hafa eshi va tala nokupwilikina oshoongalele keestaasi domoitukulwa yavo. Patrick, omukulunhuongalo womoMalawi, okwa ti: “Otwa pandula ovamwatate vOlutuwiliki mukeshe osho va ninga pefimbo eli lomukifi wekomba.” Isaac, naye wokoMalawi, okwa ti: “Katwa li tu na nande oshikwangodi shimwe, nomolwaasho twa li twa hafa eshi ehangano laJehova la ninga po omalongekido e likalekelwa, opo tu pwilikine oshoongalele koradio. Elongekido la tya ngaho ola kwafela oukwaneumbo wange u pwilikine koshoongalele. Otu wete lela kutya oumbangi oo otau ulike kutya Jehova oku hole oshiwana shaye.”

 Oshoongalele shomo 2020 osha li shotete komuudifi umwe moMozambique. Okwa ti: “Elongekido lokutala oshoongalele ko-TV, ola dimbulukifa nge kutya Jehova Kalunga oye omunaenghono adishe. Omukifi wekomba inau mu imba e tu pe eendja dopamhepo, nokwe di tu pela nokuli moseti yetu. Ohole oyo i li mokati koshiwana shaJehova onde i limonena. Onda tomhwa lela kutya eli olo elongelokalunga lashili.”

 Omukulunhuongalo, wedina Wyson, okwa ti: “Onda hala okupandula omolwonghedi omo omupiya omudiinini a kala te tu file oshisho pefimbo eli lomukifi wekomba. Elongekido eli lokuulika oshoongalele ko-TV nokupwilikinwa koradio ola kwafela vahapu vomufye ovo hatu nane nonhatu painiwe moshitukulwa eshi sha hepa, opo tu mone oshoongalele, notu mone mo ouwa.”

 Okomitiye yOkuunganeka noyOkuhonga natango oya yandja epitikilo, opo oshoongalele shoshitukulwa shomo 2021, koitukulwa imwe, shi talwe ko-TV nokupwilikinwa koradio. Mbela onghedi oyo yokuulika oshoongalele otai ka futwa ngahelipi? Otaku ka longifwa omayambidido oo haa yandjwa okuyambidida oilonga yomounuyuni aushe, oo mahapu haa yandjwa taku longifwa eenghedi di lili noku lili odo tadi hangwa ko-donate.mt711.com. Otwe mu pandula omolwomayambidido eni ehalo liwa.