Әулиелерге дұға ету керек пе?
Киелі кітаптың жауабы
Жоқ. Киелі кітапта Иса арқылы тек Құдайға ғана дұға етуіміз керектігі жазылған. Иса пайғамбар шәкірттеріне былай деген: “Сондықтан мына іспетті дұға етіңдер: “Көктегі Әкеміз, сенің есімің киелі болсын!” (Матай 6:9). Ол ешқашан әулиелерге, періштелерге немесе Құдайдан басқа біреуге дұға етуді үйретпеген.
Сондай-ақ ол ізбасарларына былай деген: “Жол, шындық және өмір — менмін. Мен арқылы болмаса, ешкім де Әкеге келе алмайды” (Жохан 14:6). Құдай мен адамдардың арасында дәнекер болуға Құдай тек Иса пайғамбарды ғана таңдаған (Еврейлерге 7:25).
Құдайға да, әулиелерге де бірдей дұға етуге бола ма?
Бірде Шайтан азғырғанда Иса пайғамбар оған: “Ехоба Құдайыңа ғибадат етіп, тек соған ғана қызмет ет!”— деп айтқан (Матай 4:10). Құдай жалғыз оған ғана сиынғанымызды, оған ғана дұға еткенімізді қалайды. Ал өзіне сиынатындардан ол қалтқысыз берілуді талап етеді (Ишая 48:11).
Егер біз Құдайдан басқа біреуге, әулиеге болсын, періштеге болсын сиынсақ, онда Құдайды қорлаймыз. Елші Жохан періштеге табынбақ болғанда, періште оны тоқтатып, былай деді: “Олай етпе! Мен небәрі өзің және Иса туралы куәлік ісін атқарып жүрген бауырластарың сияқты құлмын. Құдайға ғибадат ет!” (Аян 19:10).