Матай 10:1—42
10 Сосын Иса 12 шәкіртін шақырып алып, оларға жындарды қуып шығаратын және түрлі ауру-сырқауларды сауықтыратын билік берді+.
2 Сол 12 елшінің есімдері мынадай+: Петір* деп аталған Шимон+, оның бауыры Әндір+, Зебедей ұлдары Жақып+ пен Жохан,
3 Філіп пен Барталамай*+, Тома+ және салықшы Матай*+, Әлпей ұлы Жақып және Тадей*,
4 Кананей* Шимон және кейінірек Исаға опасыздық жасаған Яһуда Исқариот+.
5 Иса осы 12 елшісін уағыздауға жіберіп жатып, мынадай нұсқау берді+: “Басқа ұлттардың жеріне бармаңдар, самариялықтардың ешбір қаласына кірмеңдер+,
6 тек Исраил үйінің жоғалған қойларына барыңдар+.
7 Жол-жөнекей “Көк Патшалығы* таяп қалды!” деп уағыздаңдар+.
8 Ауруларды сауықтырып+, өлгендерді қайта тірілтіп, алапестерді тазартыңдар және жындарды қуып шығарыңдар. Тегін алдыңдар,— тегін беріңдер.
9 Бел қалталарыңа алтын, күміс не мыс ақша салмаңдар+,
10 жолға тамақ салатын дорба да, қосымша* киім де, сандал да, таяқ та алмаңдар+, өйткені еңбек еткен адам ішіп-жеуге лайық+.
11 Қай қалаға, қай ауылға кірсеңдер де, өздеріңді және әкелген хабарларыңды қабылдауға лайық адамды іздеп тауып, қайта жолға шыққанша, сонда қалыңдар+.
12 Үйге кіргенде, ондағылармен амандасып, татулық тілеңдер.
13 Егер сол үй лайық болса, оған тілегендерің орындалсын+, ал лайық болмаса, өздеріңе қайтсын.
14 Кім сендерді қабылдамаса не айтқандарыңды тыңдамаса, сол үйден немесе қаладан шығарда аяқтарыңдағы шаңды қағып тастаңдар*+.
15 Сендерге шындығын айтамын, Сот күні сол қаланың жазасынан гөрі Содом мен Ғомора елінің жазасы+ жеңілірек болады.
16 Мен сендерді қасқырлар арасына жіберілген қойлардай жіберіп отырмын. Сондықтан жыландай сақ, көгершіндей ақпейіл болыңдар+.
17 Адамдардан абай болып жүріңдер, себебі олар сендерді жергілікті соттарға ұстап береді+ және мәжілісханаларында+ дүре соғады+.
18 Менің шәкіртім болғандарың үшін сендерді билеушілер мен патшалардың алдына сүйреп апарады+. Сонда оларға да, басқа ұлттарға да куәлік ете аласыңдар+.
19 Ал сендерді ұстап бергенде, қалай және не айтатындарыңды ойлап, уайымдамаңдар. Өйткені не айтуларың керектігі сол сәтте беріледі+.
20 Осылай өздерің ғана емес, сендер арқылы Әкелеріңнің киелі рухы сөйлейді+.
21 Бауыры өз бауырын, әкесі баласын өлімге душар етеді, ал балалары ата-анасына қарсы шығып, оларды өлімге душар етеді+.
22 Менің атыма бола жұрттың бәрі сендерді жек көретін болады+. Бірақ соңына дейін табандылық танытқан адам құтқарылады+.
23 Бір қалада қудаласа, басқасына қашыңдар+. Сендерге шындығын айтамын, Адам Ұлы келгенше, Исраилдің барлық қалаларын аралап үлгермейсіңдер.
24 Шәкірті ұстазынан, құлы қожайынынан жоғары емес+.
25 Шәкірті өз ұстазына, ал құл өз қожайынына ұқсаса, соны қанағат тұтады+. Жұрт үй иесін Белзебүл*+ деп атаса, оның үй ішін де солай атайды емес пе?!
26 Сондықтан олардан қорықпаңдар. Себебі жасырын нәрсенің бәрі ашылады, ал құпия нәрсенің бәрі аян болады+.
27 Сендерге қараңғыда айтқандарымды жарықта айтыңдар, сыбырлап айтқандарымды үй төбесінен жариялаңдар+.
28 Тәнді өлтірсе де, жанды* өлтіре алмайтындардан қорықпаңдар+. Қайта, жанды да, тәнді де жаһаннамда* құрта алатын Құдайдан қорқыңдар+.
29 Екі торғай бір тиынға* сатылады емес пе? Десе де олардың бірде-біреуінің құлағаны көктегі Әкелеріңнің назарынан тыс қалмайды+.
30 Тіпті бастарыңдағы шаштарыңның саны да оған белгілі!
31 Сондықтан қорықпаңдар, сендер көп торғайдан әлдеқайда қымбатсыңдар+!
32 Мені адамдар алдында мойындаған әркімді+ мен де көктегі Әкемнің алдында мойындаймын+.
33 Ал адамдар алдында менен танған әркімнен көктегі Әкемнің алдында мен де танамын+.
34 Мені жер бетіне татулық әкелуге келді деп ойламаңдар. Мен татулық емес, семсер әкелуге келдім+.
35 Өйткені мен ұлын әкесінен, қызын шешесінен, ал келінін енесінен ажыратуға келдім+.
36 Иә, адамға өз үй ішіндегілері дұшпан болады.
37 Кімде-кім әкесін не шешесін менен артық көрсе, сол шәкіртім болуға лайық емес; ұлын не қызын менен артық көрген адам да шәкіртім болуға лайық емес+.
38 Сондай-ақ кім азап бағанасын* алып, соңымнан ермесе, сол шәкіртім болуға лайық емес+.
39 Жанын сақтап қалғысы келетін адам одан айырылады, ал кім мен үшін жанынан айырылса, оны сақтап қалады+.
40 Кімде-кім сендерді қабылдаса, мені де қабылдағаны. Ал мені қабылдаған адамның мені жібергенді де қабылдағаны+.
41 Әлдебіреуді пайғамбар болғаны үшін қабылдаған адам пайғамбар алатын сыйға ие болады+, ал әлдебіреуді әділ болғаны үшін қабылдаған адам әділ кісі алатын сыйға ие болады.
42 Кімде-кім осы кішілердің біреуіне менің шәкіртім болғаны үшін, ең болмағанда, бір тостаған салқын су берсе, сендерге шындығын айтамын, ол міндетті түрде өз сыйын алады+”.
Сілтемелер
^ Осы тармақта: “Петір деп аталған Шимон”, Мт 16:16-да: “Шимон Петір”, Е.і 15:14-те: “Шимеон”, Жх 1:42-де: “Кефа”. Бірақ көп жағдайда Мт 14:28-дегідей “Петір”.
^ Немесе “құлшынған”.
^ Немесе “Құдай Патшалығы”. Түсіндірмені қараңыз.
^ Сөзбе-сөз “екі”.
^ Аяқтың шаңын қағу адамның өз мойнынан жауапкершілікті алып тастауын білдіреді.
^ Жын-перілердің билеушісі Шайтанға қатысты қолданылған есім.
^ Түсіндірмені қараңыз.
^ Немесе “өмірді”, яғни қайта өмір сүруге деген үмітті.
^ Сөзбе-сөз “ассарион”. Ә14 қосымшасын қараңыз.
^ Түсіндірмені қараңыз.
