ALIASUTTUNUT ILUAQUTISSAT
Aliasunnerup naammagalugu atornera – Qanoq iliorsinnaasutit
Aliasunnermi pinertusaarnissamut siunnersuutinik ujartuiguit ilimanarpoq isummat amerlasoorpassuit – ilaat allanit iluaqutaanerusut – siumussagitit. Eqqaaneqareersutut kikkut tamarmik assigiinngitsumik aliasuttarnerat tamatumani peqqutaagunarpoq. Inummut iluaqutaasoq allamut immaqa iluaqutaassanngilaq.
Taamaakkaluartoq tunngaviusunik najoqqutassiaqarpoq amerlasuunit iluaqutigineqarsimasunik. Taakku aliasunneq pillugu siunnersortinit issuarneqartartut qaqugorsuarmut iluaqutigineqarsinnaasut Biibilimi najoqqutassianut naapertuupput.
1: ILAQUTTANNIT IKINNGUTINNILLU TAPERSERSORNEQARNISSAT AKUERIUK
-
Ilisimatuut ilaasa tamanna aliasunnerup naammagalugu atornissaanut pingaarnerpaanerartarpaat. Ilaannikkulli immaqa kisimiikkusuttarputit. Allaat immaqa ikiuiniartut uumitsaattarsinnaavatit. Tamanna nalinginnaavoq.
-
Misigissanngilatit allat ilagiuaannassallugit, kisianni aamma ajattussanngilatit. Taakkuami tapersersuinissaat siunissami pisariaqartissagunarpat. Inussiarnersumik allat ilisimatittakkit sunik pisariaqartitsillutit sunillu pisariaqartitsinak.
-
Pisariaqartitatit naapertorlugit allanik ilagisaqartarnermik kisimiittarnermillu oqimaaqatigiissaarigit.
NAJOQQUTASSIAQ: “Marluugaanni ataasiinnaanermit pitsaaneruvoq ... Arlaat orluppat aappaata nikuitittarpaa.” – Oqaluussisartup oqaasii 4:9, 10.
2: PEQQINNARTUNIK NERISARLUTILLU TIMERSORTARIT
-
Peqqinnartunik assigiinngissitaartunillu nerineq aliasunnermik aallaaveqartumik misigissutsikkut nanertisimanerup qaangernissaanut iluaqutaassapput. Naatitanik proteinitalinnillu naammattumik nerisarit.
-
Imermik allanillu imeruarsaatinik peqqinnartunik imerluartarit.
-
Nererusussuseqarpianngikkuit akulikitsumik annikitsunik nerisarit. Aamma nakorsaq inuussutissanut akussat pillugit aperisinnaavat. *
-
Sukkalaartumik pisuttuarneq allatullu timersorneq misigissutsinik nikallornartunik annikillisitsisinnaapput. Timersorneq annaasamik eqqarsaatiginninnissamut eqqarsaatilluunniit allamut saatsinnissaannut iluaqutaasinnaavoq.
NAJOQQUTASSIAQ: “[Inuup] timini uumissunngisaannarpaa, kisianni inuussutissittarpaa paaqqisarlugulu.” – Efesosimiut 5:29.
3: SINILLUARTARIT
-
Aliasunneq qasoqqanerulersitsisinnaammat sininneq ingammik aliasuttunut pingaaruteqarpoq.
-
Koffeinitallit aalakoornartortallillu sininninnut sunniuteqarsinnaammata mianersuutigikkit.
NAJOQQUTASSIAQ: “Pitsaaneruvoq itummap ataasiinnaap imaanik peqaraanni qasuersaarsinnaallunilu itummat illuttut suleruloornikkut ulikkaarnerannit anorimillu tigusiniarsarinermit.” – Oqaluussisartup oqaasii 4:6.
4: NALEQQUSSARTARIT
-
Kikkut tamarmik assigiinngitsumik aliasuttartut eqqaamajuk. Taamaattumik ilinnut suna pitsaanerusoq paasiniartariaqarpat.
-
Amerlasuut aliasunnertik allanut ersersissallugu iluaqutigisarpaat, allalli ersersikkusunneq ajorpaat. Ilisimatuut misigissutsinik ersersitsineq aliasunnerup naammagalugu atornissaanut pingaaruteqarnersoq assigiinngitsorpassuarnik isumaqarfigaat. Misigissutsinnik aniatitsinissat pisariaqartikkukku, taamaaliornissarli tunuarsimaarfigalugu, immaqa aallarniutigalugu ikinngutigilluakkannut misigissutsivit ilaasa eqqartornissaat ajornannginnerutissavat.
-
Ilaasa qianeq aliasunnerup naammagalugu atornissaanut iluaqutigisarpaat, allalli qiavallaanngikkaluarlutik aliasunnertik naammagalugu atorpasittarpaat.
NAJOQQUTASSIAQ: “Uummatip narrutsaatigisani nammineq ilisimasarpaa.” – Ussatit 14:10.
5: AJOQUTAASUNIK ILEQQOQARNAVEERSAARIT
-
Ilaat imigassat aalakoornartortallit, aanngajaarniutit nakorsaatillu atornerlullugit aliasuppallaarunnaarniartarput. Taamaaliorneq ajoqutaavoq. Tamatumani iluaallannartutut misiginarsinnaasoq sivikitsuinnaasarpoq assullu kingunerlutsitsisinnaalluni. Misigissutsikkut nanertisimanerit ajoqutaanngitsumik pitsanngorsarniartaruk.
NAJOQQUTASSIAQ: “Minguk tamaat piiassavarput.” – 2 Korinthimiut 7:1.
6: PIFFISSAT OQIMAAQATIGIISSUMIK ATORUK
-
Amerlasuut aliasunnertik puiulaarniarlugu arlaannik sammisaqartarneq iluaqutigisarpaat.
-
Allanik ikinngutitaarneq ikinngutigisanulluunniit qaninnerulerneq, arlaannik ilikkagaqarneq aliikkutaqarnerluunniit iluaallassutigisinnaavatit.
-
Piffissap ingerlanerani immaqa malugilissavat akulikinnerusumik sivisunerusumillu aliasuttarunnaarsimallutit, tamannalu aliasuppallaarunnaariartornerup ilagiinnarpaa pissusissamisoortoq.
NAJOQQUTASSIAQ: “Suut tamarmik aalajangersimasumik piffissaligaapput ... Qiaffissaqarpoq illarfissaqarlunilu. Kappialaffissaqarpoq qittaserfissaqarlunilu.” – Oqaluussisartup oqaasii 3:1, 4.
7: AALAJANGERSIMASUNIK ILEQQULIUSSIGIT
-
Sapinngisamik piaarnerpaamik ulluinnarni isumagisartakkatit aallarteqqikkit.
-
Piffissat aalajangersimasut sininnermut, sulinermut allanillu sammisaqarnermut atortarukkit ilimanarpoq misigissasutit pissutsit nalinginnaasumik ingerlaqqilersut.
-
Sammisassat nuannersut ulapputigisarukkit misigissutsit annernartut annikillisinnaapput.
NAJOQQUTASSIAQ: “Ullut inuuffigisatik eqqarsaatigivallaassanngilaat, Guutimmi uummatimikkut nuannaarutississimammatik.” – Oqaluussisartup oqaasii 5:19.
8: SIUSIPPALLAAMIK PINGAARUTILINNIK AALAJANGIINAVEERSAARIT
-
Amerlasuut asasaminnik toqukkut annaasaqaqqammernermik kingorna aalajangiussatik pingaarutillit peqqissimissutigisarpaat.
-
Ajornanngippat nuunnissannut, allamik suliffittaarnissannut asasavilluunniit pigisimasaanik piiaanissamut sivisulaamik utaqqeqqaarit.
NAJOQQUTASSIAQ: “Eqiasuitsup pilersaarusiai iluanaarutissarsisitsisarput, tuaviorpallaartorli ajorsaateqalersarpoq.” – Ussatit 21:5.
9: ASASAT EQQAAMAJUK
-
Amerlasuut inummik toqusimasumik eqqaasitsisartunik sammisaqartarneq iluaqutaanerartarpaat.
-
Assinik eqqaasitsissutissanilluunniit katersineq imaluunniit pisut misigisallu eqqaamarusutatit pillugit ullorsiutiliorneq tuppallersaatigisinnaavat.
-
Nuannersunik eqqaasitsisartut toqqukkit kingusinnerusukkullu piareertutut misigiguit isiginnaarlugit.
NAJOQQUTASSIAQ: “Eqqaakkit ullut qaangiuttut.” – 5 Mosesi 32:7.
10: ALLAMUKALAARTARIT
-
Feeriassanerlutit eqqarsaatigiuk.
-
Feeriarnissamut periarfissaqanngikkuit immaqa ullormi ataatsimi marlunniluunniit nuannersunik sammisaqarsinnaavutit, soorlu asimut pisuttuarlutit, katersugaasivimmut takornariarlutit angalaarlutilluunniit.
-
Allaat allamut saalaarneq aliasunnivit naammagalugu atornissaanut iluaqutigisinnaavat.
NAJOQQUTASSIAQ: “Inoqanngitsumut ilagisinga; taakkuinnaallusi tassani qasuersaatsiarsinnaavusi.” – Markusi 6:31.
11: ALLANIK IKIUIGIT
-
Eqqaamajuk allanik ikiuinerit nammineq iluaqutigisarakku.
-
Assersuutigalugu aallarniutitut ikinngutit ilaquttalluunniit illit asasannik annaasaqarnermik aliasuutiginnittoq oqaloqateqarnissamillu pisariaqartitsisoq ikiorsinnaavat.
-
Allanik tapersersuineq tuppallersaanerlu nuannaalissutigalugulu inuunermi siunertaqaqqilertutut misigilissutigisinnaavat.
NAJOQQUTASSIAQ: “Tunisineq pilluarnarneruvoq tigusinermit.” – Apustilit Suliaat 20:35.
12: PINGAARNERSIUERIAATSIT NALILERSOQQIGUK
-
Aliasunneq sorpiaat pingaarnerunerannik paasinninnissamut iluaqutigisinnaavat.
-
Periarfissat atorluarlugu inuunerit qanoq atornerlugu eqqarsaatigiuk.
-
Pisariaqarpat pingaarnersiueriaatsit allanngortiguk.
NAJOQQUTASSIAQ: “Illumut aliasuffimmukarneq pitsaaneruvoq illumut nalliuttorsiorfimmukarnermit, inuit tamarmik inuunerat illumi aliasuffimmi naggateqartarmat. Inuusut tamarmik tamanna eqqaamasariaqarpaat.” – Oqaluussisartup oqaasii 7:2.
Soorunami aliasukkunnaavissinnaanngilatit. Amerlasuulli asasaminnik toqukkut annaasaqarsimasut misilittakkaminnit uppernarsarsinnaavaat allaaserisami matumani eqqaaneqartunik maleruaaneq tuppallersaataasartoq. Una aliasuppallaarunnaarnissamut allattorsimaffiunngilaq tamakkiisoq. Siunnersuutilli ilaat malikkukkit immaqa paasissavat taakkorpiaat iluaallaatigissallugit.
^ par. 13 Iteritsi!-mi katsorsaariaatsit aalajangersimasut kajumissaarutigineqanngillat.