ENOKI inuuneqqortuvoq. Ukiuni 365-ini – ullumikkut inuit inuusarnerisa sisamariaataannik sivisunerusumik – inuusimanera takorlooruminaatsissinnaavarput. Naliminulli naleqqiullugu utoqqarsuunngilaq! Taamanikkut ukiut 5.000-t matuma siorna ullumikkumut naleqqiullugu inuuneqqortunerusarput. Adami, inuk siulleq, 600-nik ukioqartoq Enoki inunngorpoq, Adamilu ukiut 300-t missaat suli inuuvoq! Adamip kinguaavisa ilaat suli inuuneqqortunerupput. Tassa Enoki 365-inik ukioqarluni suli inuummarippasissimassaaq, angutitut suli ukiorpassuarni inuusussatut issimassaaq. Inuunerali naariataarpoq.

Enoki navianartorsiorpoq. Takorlooruk Guutip tusarliussaanik inuit tusarlikkami qisuariarnerat siooralissutigalugu qimaasoq. Kamangaarlutik kiinnersimapput. Enoki, taassuma tusarliussaa aamma Guuti Enokimik aallartitsisoq uumigingaarpaat. Enokip Guutia susinnaannginnamikku angut taanna saassuppaat! Enokip ilaquttani takoqqissanerlugit eqqarsaatigisimasinnaavaa. Nuliani paninilu erniniluunniit Metusalemi ernuttaniluunniit Lemeki eqqarsaatigai? (1 Mosesi 5:21-23, 25) Toqusussanngorpa?

Enoki Biibilimi allaatigineqarpianngilaq, taamaallaat versini ikittuni eqqaaneqarpoq. (1 Mosesi 5:21-24; Hebræerit 11:5; Judasi 14, 15) Versilli taakku angutip upperluartuusup takorloornissaanut naammapput. Ilaqutaqarpit pilersukkannik? Eqqortuusumik illersuiniarninni akerlilersorneqarsimavit? Taamaappat Enokip uppernera ilinniarfigilluarsinnaavat.

Enokip nalaani, Adamimiit kinguaariit arfineq-aappassaanni, inuit ajortuupput. Adamip Evallu timikkut naammalluinnassutsimik annaasaqarnerata kingorna ukiualuinnaat qaangiussimammata taamanikkut inuit suli inuuneqqortupput. Ileqqussatigulli anersaakkullu pissutsit ajorluinnarput. Nakuuserneq nalinginnaavoq. Adamip ernerata Kainip nukki Abeli toqummagu nakuusertoqartalerpoq. Kainip kinguaavisa ilaata Kainimit nakuuserajuttuunerunini akiniaajumatuneruninilu oqarataarutigisimagunarpaa! Adamip ernutaasa nalaanni inuit allatigut ajortuliortalerput. Jehova mitaatiginnillutik ataqqinninngitsumik aqqatigut torlorfigisalerpaat. – 1 Mosesi 4:8, 23-26.

Eqqunngitsumik upperisarsiorneq taamaattoq Enokip nalaani nalinginnaavoq. Enoki peroriartortilluni aalajangigassaqarpoq. Nalimini inuusunut naleqqussassava? Guutilluunniit ilumoortup, Jehovap, qilammik nunamillu pinngortitsisup piumasaatut iliussava? Abelip eqqortumik Jehovamik pallorfiginninnini pillugu toqutaanera Enokip killitsissutigingaarsimassavaa. Aalajangerpoq Abeli ilaarniarlugu. Mosesimik allakkat siulliit 5:22-mi ima allassimavoq: “Enokip ukiuni 300-ni Guuti inooqatigaa.” Taamatut maluginiarnartumik allaatigineqarneranit erserpoq Enoki silarsuarmi guutiitsumi  Guutimik upperinnittuusoq. Biibilimi taamatut allaatigineqartut siullersaraat.

Versimi tamatumani allassimavoq Enokip Metusalemimik ernertaareerluni Jehova inooqatigiuaraa. Tassa Enoki 65-it missaannik ukioqarluni ilaqutariinni ittuuvoq. Nuliata aqqa aamma erneri paniilu qassiunersut Biibilimi eqqaaneqanngillat. Ataataasup ilaquttaminik perorsaanermini pilersuinerminilu Guuti inooqatigissaguniuk ilaquttani Guutip piumasaatut isumassorniartariaqarpai. Enokip nalunngilaa Jehovap piumasarigaa angut nuliaminut ilumoorfiginnissasoq. (1 Mosesi 2:24) Sapinngisaminillu qitornani Jehova pillugu ilinniartippai. Qanoq kinguneqartumik?

Tamanna oqaluttuami isumassarsiarititaasumi eqqartorneqarpianngilaq. Enokip ernera Metusalemi, Biibilimi oqaluttuarineqartunit inuuneqqortunerpaasoq ukiumilu ulersuaqarfiusumi toqusoq, uppertuunersoq eqqaaneqanngilaq. Metusalemilli ernera, Lemeki, maluginiarnartumik upperluartuuvoq. Lemekip aatani Enoki ukiuni hundredinit amerlanerusuni inooqatigaa. Lemekilu Jehovamit isumassarsisinneqarluni ernini, Noa, pillugu siulittuivoq. Siulittuullu taanna ulersuup kingorna eqquuppoq. Noa, aataqqiimisulli Enokitut, Guutimik inooqateqartutut allaatigineqarpoq. Noap Enoki naapinngisaannaraluarlugu maligassiuilluartuunera iluaqutigaa. Imaassinnaavoq Noap ataataa Lemeki, aataavaluunniit Metusalemi allaalluunniit Jeredi, Enokip ataataa, Noa 366-inik ukioqartillugu toqusoq Enokip maligassiuilluartuunera pillugu Noamut paasititsisimasoq. – 1 Mosesi 5:25-29; 6:9; 9:1.

Enokip Adamillu assigiinngissutaat eqqarsaatigiuk. Adami naammalluinnartuugaluarluni Jehovamut ajortuliorpoq kinguaaminullu avissaartuunneq atugarliornerlu kingornussaritillugit. Enokili naammalluinnanngitsuugaluarluni Guutimut upperluartuunikkut kinguaaminut maligassaalluarpoq. Enoki 308-nik ukioqartoq Adami toquvoq. Adamip ilaqutaasa siuaasartik namminissarsiungaartuusoq upippaat? Naluarput. Nalunngilarpulli ‘Enokip Guuti inooqatigigaa’. – 1 Mosesi 5:24.

Pilersugaqaruit Enokip uppertuuneranit ilinniarfigisinnaasat eqqarsaatigiuk. Ilaquttavit timikkut pilersornissaat pingaaruteqaraluartoq anersaakkut pisariaqartitaat pingaarnerpaavoq. (1 Timotheusi 5:8) Oqaatsikkuinnaanngitsoq aammali iliuutsikkut ilaquttatit anersaakkut isumassussavatit. Inuuninni Guutip najoqqutassiaanik maleruaanikkut Enokitut Guuti inooqatiginiarlugu aalajangeruit illittaaq ilaquttannut maligassiuilluangaassaatit.

Enoki uppertuusoq uppersuseqanngitsut akornanni kiserliorsimasinnaavoq. Guutiminilli Jehovamit malugineqarpa? Aap. Jehovap kiffani aalajaatsoq attaveqaqatigisalerpaa. Enoki Guutimit peqquneqarpoq nalimini inuusunut tusarliissasoq. Taamaalilluni Enoki pruffiitinngortippaa, tusarliisut Biibilimi allaatigineqartut siullersaattut. Tamanna nalunngilarput ukiut hundredilippassuit tamatuma kingorna Judasip, Jiisusip affarmik  qatanngutaata, isumassarsisinneqarluni Enokip siulittuutaa allammagu. *

Enokip suna siulittuutigaa? Imaappoq: “Takuat, Naalagaq aggerpoq illernartortaminit 10.000-ilippassuarnit iluneqarsimalluni tamanik eqqartuussiartorluni tarnillu tamaasa pillariartorlugit iliorsimaneri iluaatsut tamaasa pillugit iluaatsullu ajortuliortut akerlilersorluni oqaaserisaat soqqusaatsut tamaasa pillugit.” (Judasi 14, 15) Siullermik malugiuk Enokip siunissami pisussatut allaatiginagu siulittuutigineqartutut Guutimit iliuuserineqareersutullusooq allaatigigaa. Tamatuma kingorna siulittuuterpassuit taamatut allataapput. Ima paasillugu: Siulittuutigineqartoq eqquukkumaartoq qularnanngingaarmat pereersutut allaatigineqarpoq! – Esaja 46:10.

Enoki tusarliigami, immaqa tusarusuttunut tamanut oqaluussigami, qanoq misigisimassava? Mianersoqqussut qanoq kimittutigisoq malugiuk – oqaatsit “iluaatsut” aamma “soqqusaatsut” atorlugit inuit iliuusiilu assuarai. Taamaalilluni siulittuutigineqartumi inuit tamarmik ilisimatinneqarput Edenimiit anisitaanerup kingorna silarsuaq ajorluinnartuusoq. Silarsuaq tamanna annilaarnartorsuarmik naggateqarumaarpoq Jehova ‘illernartortani 10.000-ilippassuit’ – inngilini pissarsuit saassusseriaannaasut – ilagalugit suujunnaarsitsiartorpat. Enokip qunusuilluni mianersoqqussut Guutimeersoq tamanna kisimiilluni tusarliuppaa! Immaqa Lemeki inuusuttoq tusarnaarpoq aatami sapiitsuunera taassuminnga ataqqinnilissutigingaarlugu. Taama misigippat paasilluarsinnaavarput.

Enokip uppertuunera killitsissutigalugu imminut aperisariaqarpugut silarsuaq Guutip isiginnittaasiatut isiginerlutigu. Eqqartuussut Enokip sapiilluni tusarliussaa suli atuuppoq; tassa Enokip nalaanisulli ullumikkut silarsuaq aamma eqqartuunneqassaaq. Enokip mianersoqqussutaanut naapertuuttumik Jehovap ulersuaqartitsilluni Noap nalaani silarsuaq guutiitsoq piuneeruppaa. Taamani piuneerutsitsineq siunissami annertunerusumik piuneerutsitsinissamut sioorasaarutaavoq. (Matthæusi 24:38, 39; 2 Petrusi 2:4-6) Ullumikkut, taamanikkutulli, Guuti ‘illernartortani 10.000-ilippassuit’ ilagalugit silarsuup guutiitsup naapertuilluartumik eqqartuunnissaanut piareersimavoq. Tamatta immikkut Enokip mianersoqqussutaa uummammiuliuttariaqarparput allanullu tusarliullugu. Ilaquttatta ikinngutittalu akerlilersorsinnaavaatigut. Kiserliortarsinnaassaagut. Jehovalli Enoki qimanngisaannarpaa; ullumikkullu kiffani aalajaatsut qimanngisaannassavai!

Enokip inuunera qanoq naava? Toqunera immikkorluinnaq ittumik ima allaatigineqarpoq: “Enokip Guuti inooqatigaa. Taava inuujunnaarpoq Guutip peerutitimmani.” (1 Mosesi 5:24) Guutip Enoki qanoq peerutitippaa? Kingusinnerusukkut apustili Paulusi ima nassuiaavoq: “Uppernikkut Enoki peerutitaavoq toqu misigeqqunagu, peerupporlu Guutip peerutitimmani. Nalunaajaatigineqarpormi Enoki peerutitaatinnani Guutimit iluarisaasimasoq.” (Hebræerit 11:5) Oqaatsit uku: “Peerutitaavoq toqu misigeqqunagu”, qanoq paasisariaqarpat? Biibilimik nutsikkat ilaanni allassimavoq Guutip Enoki qilaliartikkaa. Taamaassinnaanngilarli. Biibilimimi erserpoq Jiisusi Kristusi qilammut makititaasut siullersarigaat. – Johannesi 3:13.

Taavami Enokip ‘toqu misigeqqunagu peerutitaanera’ qanoq paasisariaqarpa? Jehovap Enoki toqup  annernartua misigeqqunagu qajassuartumik inuujunnaartissimagunarpaa. Toqunnginneranili ‘nalunaajaatigineqarpoq Enoki Guutimit iluarisaasimasoq’. Qanoq? Enoki toqunngitsiarnermini Guutimit takorruuisinneqarunarpoq, immaqa nunarsuup paratiisiuneranik takorruuisinneqarluni. Jehovamit iluarisaanerminik erseqqissumik paasitinneqareerluni Enoki sinilerluni toquvoq. Enoki aalajaatsullu allat pillugit Paulusi ima allappoq: “Tamakku tamarmik uppersuseqarnertik pigalugu toqupput.” (Hebræerit 11:13) Tamatuma kingorna akeraasa timaa ujarsimasinnaavaat, ‘peerussimavorli’ immaqa Jehovap timaa toqungasoq piujunnaartimmagu innarlisaarneqaqqunagu upperisarsiornermiluunniit eqqunngitsumi atorneqaqqunagu. *

Allassimaffiit taakku tunngavigalugit isummiussavut eqqarsaatigalugit Enokip inuunera qanoq naasinnaasimagaluartoq takorlooriartigu. Eqqaamajuk qanorpiaq toqunersoq nalugipput. Enokip eqqartuussut tusarliussaa kamaatigineqangaarpoq. Akerlilersuisunit malersorneqarluni Enoki qimaarsuataarpoq. Nukillaaqqajaagami qasuersaarniarluni toqqorfissarsivoq, nalunngilaali nakuuserfigineqarluni toqutaangajalerluni. Qasuersaartilluni Guutiminut qinuvoq. Taava eqqissiallarujussuarpoq piviusorsiorpalungaartumillu takorruugaqalerluni.

Isigiligaa takorlooruk: Silarsuaq nalunngisaanit allaanerulluinnarpoq. Naatsiivittut Edenitut alutornartigaaq, naatsiivimmulli isitsaalisunik kerubeqanngilaq. Tassaniipput inuppassuit – tamarmik peqqilluinnarlutillu inuusuttutut inuummaritsigisut – eqqisseqatigiillutik inooqatigiittut. Enokip misigisimasaatut uumissuisoqarnanilu upperisarsiorneq pissutigalugu malersuisoqanngilaq. Enoki Jehovamit asaneqarlunilu iluarineqarluni misigivoq. Qularinngilaa tassani najugaqalerumaarluni. Eqqissiartuinnartilluni sequnngerami sinnattornertaqanngitsumik itisuumik sinilerpoq.

Ullorlu manna tikillugu toqumi sinipporlusooq – Jehovamit Guutimit killeqanngitsumik eqqaamannissinnaasumit itersarneqarnissani utaqqillugu! Jiisusip neriorsuineratut siunissami inuit Guutip eqqaamasai Kristusip nipaa tusarlugu ilivermit anillutik silarsuartaassami alianaallunilu eqqissisimanartumi uikkumaarput. – Johannesi 5:28, 29.

Tassaniikkusuppit? Enokip naapinnissaa takorlooruk! Oqaluttuarisinnaasai pissanganassapput. Inuunermi naggataa takorluukkatsinnit allaanerunersoq oqaluttuussinnaassavaatigut. Maannali nukinginnarnerusoq taassumannga ilinniarfigisinnaavarput. Enoki allaatigereerlugu Paulusi ima allappoq: “Uppersuseqarnanili Guutimit iluarisaaneq ajornaqaaq.” (Hebræerit 11:6) Tamatta immikkut Enokip sapiilluni uppersusianik ilaarsinissatsinnut pissutissaalluassusia!