María Isabel niviarsiaraavoq oqaluussisartoq aallussilluartoq Amerika Kujallermi Chilemi illoqarfimmi San Bernardomi najugalik. Ilaquttanilu inuiaqatigiinnut mapuchenut ilaapput. Ilaqutariiullutik ilagiit mapuchet oqaasiinik, tassa mapudungunimik, oqaasillit aallartisarneqarnerat kajumillutik tapersersorsimavaat.

Kristusip toquneranik eqqaaniaanerup mapuchet oqaasii atorlugit nalliuttorsiutigineqarnissaa aamma eqqaaniaanermut qaaqqussutit 2000-it mapuchet oqaasiinut nutserneqarsimasut agguaanneqarsinnaalernerat nalunaarutigineqarmat María Isabelip eqqarsaatigilerpaa qanoq ikiuisinnaanerluni. Taassuma nalunaajaasut inuusuttut allat atuaqatiminnut ilinniartitsisuminnullu kinguneqarluartumik oqaluussisarsimanerat eqqaavaa. Taamaattumik angajoqqaani tamanna pillugu oqaloqatigai, pingasuullutillu aalajangerput María Isabel pilersaarusiussasoq atuarfimmi qanoq qaaqqussutinik agguaassisinnaanerminik. Qanoq pilersaarusiorpa?

Siullermik María Isabelip atuarfimmi pisortat aperai isertarfissuarmi qaaqqussummik nivinngaasinnaanerluni. Akuersipput taamatullu iliuuseqarnera pillugu nersualaarlugu. Aamma ullaat ilaanni atuartut aqqi taagorneqarmata atuarfiup pisortaata højtalerikkut qaaqqussut nalunaarutigaa.

Taava María Isabel init atuartitsiviit tamaasa alakkarsinnaanerlugit aperivoq. Ilinniartitsisut akuersimmata klassit tamaasa aperai mapucheqarnersoq. Ima oqaluttuarpoq: “Isumaqaraluarpunga atuarfimmi atuartut mapuchet quliussasut imaluunniit 15-it, amerlanerujussuuppulli — qaqqussutimmi 150-it agguaappakka!”

Arnap atuarfiup isertarfissuani qaaqqussut takugamiuk aperivoq pisussaq pillugu kina oqaloqatigisinnaanerlugu. Takorlooruk qanoq tupigusutsigisimassasoq niviarsiaraq qulinik ukiulik saaffigissallugu oqarfigineqarami! “Inersimasuusoq ilimagigaluarpaa,” María Isabel qungujulluni oqarpoq. Qaaqqussut tunniutereeramiuk naatsunnguamillu nassuiaatereeramiuk María Isabelip sumi najugaqarnersoq aperaa taamaalilluni angajoqqaani ilagalugit pulaarlugu Guutip naalagaaffia pillugu oqaluttuunneruniassagamikku. Oqaluussisartut 20-it oqaluussiffigisartakkami mapuchetut oqaluffiusumi nuannaaqaat takugamikku arnaq taanna mapuchellu soqutiginnittut allat 26-it eqqaaniaanermut takkummata. Maannakkut ilagiit ingerlalluarput!

Qanorluunniit ukioqaraluaruit atuaqatitit suleqatitilluunniit eqqaaniaanermut, tamanut ammasumik oqalugiaammut imaluunniit ataatsimeersuarnermut qaaqquniarlugit taamatut iliuuseqarsinnaavit? Immaqa illit qanoq iliorsinnaanersutit qanorlu iluatitsisinnaanersutit atuagassiaatitsinni qanoq misigisaqartoqarsimaneranik misissuisinnaavutit. Aamma Jehova qinnuigiuk anersaaminik illernartumik ikioqqullutit taanna pillugu allanut oqaluussinissamut sapiisersinnaaniassagavit. (Luk 11:13) Taamaalioruit immaqa aamma illit pilersaarusiorluarsimanerpit kinguneqarluarnera qiimmaallaatigisinnaavat.