Guuti kinaassusiliviua?
Guuti kinaassusiliviua?
Inuppassuit qanoq oqartartut:
▪ “Guuti suni tamaniippoq. Soorlu anori.”
▪ “Guuti tassaavoq silassorissuseq nassuiarneqarsinnaanngitsoq; pissaaneq kinaassuseqanngitsoq.”
Jiisusi qanoq oqarpa?
▪ “Ataatama illuani inissat amerlaqaat.” (Johannesi 14:2) Jiisusip Guuti illoqartutullusooq imaluunniit najugaqartutullusooq eqqartorpaa.
▪ “Ataatamit pisuuvunga silarsuarmullu tikiullunga; silarsuaq kingumut qimakkumaarpara Ataatamukarumaarlungalu.” (Johannesi 16:28) Jiisusip upperaa Guuti kinaassusiliviusoq aalajangersimasumik najugaqartoq.
JIISUSIP Guuti pissaanertut kinaassuseqanngitsutut eqqartunngisaannarpaa. Guutili oqaluuttarpaa taassumunngalu qinusarluni. Amerlanertigut Jehova Ataatamisut qilammiusutut taasarpaa, tamannalu Guutimut qanittumik attaveqarneranik ersersitsivoq. — Johannesi 8:19, 38, 54.
Ilumoorpoq inuup ‘kialluunniit Guuti takusimanngisaannaraa’ aamma ‘Guuti anersaajusoq’. (Johannesi 1:18; 4:24) Imaanngilarli timeqanngivilluniluunniit iluseqanngivissoq. Biibilimi ima allassimavoq: “Timeqarmat tarnip pianik aamma timeqarpoq anersaap pianik.” (1 Korinthimiut 15:44) Imaappa Guuti anersaakkut ittumik timeqartoq?
Aap. Jiisusi makititaagami ‘iserpoq qilammut namminermut maanna Guutip kiinaata saanut sassarumalluni iluaqutissatsinnik’. (Hebræerit 9:24) Tamatumani paasivavut Guuti pillugu ilumoortut pingaarutillit marluk. Siullermik, Guuti najugaqartoq. Aappassaanik, Guuti pissaaneruppat nassuiarneqarsinnaanngitsoq suni tamani ittoq, Jiisusi qanoq ililluni “Guutip kiinaata saanut” sassarsinnaava? Erseqqippoq Guuti kinaassusiliviusoq.
Qanorli ililluni Guuti suni tamani sunniuteqarsinnaagami? Guutip anersaani illernartoq, imaluunniit nukini sulisoq, nunarsuarmi avataarsuanilu sumulluunniit aallartissinnaavaa. Ataatatut meeqqaminik tuppallersaaniarluni annertoqqusersuiniarlunilu assamminik isaassisutut Guutip piumasani naammassiniarlugu anersaani illernartoq aallartittarpaa. — Tussiaat 104:30; 139:7.
Guuti kinaassusiliviugami aamma misigissuseqarpoq — aap, iluarisaqarpoq iluarinngisaqarlunilu. Biibilimi allassimavoq Guutip innuttani asagai, pinngortitani tipaatsuutigigai, guutipilussiorneq uumigigaa ajussuserlu aliasuutigigaa. (1 Mosesi 6:6; 5 Mosesi 16:22; 1 Kunngit 10:9; Tussiaat 104:31) 1 Timotheusi 1:11-mi ‘Guutitut pilluartutut’ eqqaaneqarpoq. Paasinarpoq Jiisusi oqarmat Guutip taassuma uummatikkut iluunngarluta asanissaa ilinniarsinnaagipput! — Markusi 12:30. *
[Quppernerup ataani ilanngussaq]
^ imm. 12 Amerlanerusunik paasissutissaqarpoq atuakkami Hvad er det Bibelen virkelig lærer?-imi kapitali 1-imi. Jehovap Nalunaajaasuinit saqqummersinneqartoq.
[Qupp. 5-mi issuagaq]
Ataatatut meeqqamut assamminik isaassisutut Guutip piumasani naammassiniarlugu anersaani illernartoq aallartittarpaa