ជំនួយសម្រាប់ជនរងគ្រោះដោយសារអំពើហិង្សាក្នុងគ្រួសារ
អង្គការសុខភាពពិភពលោកបានរៀបរាប់ថា៖«នៅទូទាំងពិភពលោកស្ត្រីជាច្រើនបានរងគ្រោះដោយសារអំពើហិង្សា ហើយអំពើហិង្សានោះបានរាលដាលនៅគ្រប់ទីកន្លែង។ ដោយសារនេះគឺជារឿងធំ ដូច្នេះយើងត្រូវចាត់វិធានការដើម្បីបញ្ឈប់អំពើហិង្សាទាំងនោះ»។ អង្គការនោះក៏បន្ថែមថា៖«ស្ត្រីដែលបានរងអំពើហិង្សាពីគូអាពាហ៍ពិពាហ៍ឬគូស្នេហា មានប្រមាណ៣០ភាគរយបានរងអំពើហិង្សាខាងផ្លូវកាយឬខាងផ្លូវភេទ»។ ម្យ៉ាងទៀត អង្គការសហប្រជាជាតិបានរាយការណ៍ថាមួយឆ្នាំកន្លងទៅនេះ ជារៀងរាល់ថ្ងៃស្ត្រីប្រមាណ១៣៧នាក់បានស្លាប់ដោយសាររងអំពើហិង្សាពីគូរបស់ខ្លួនឬសមាជិកក្រុមគ្រួសារ។ a
ស្ថិតិទាំងនេះគ្រាន់តែបង្ហាញថាអំពើហិង្សាមានចំនួនច្រើនប៉ុណ្ណោះ តែមិនបានប្រាប់ថាការរងអំពើហិង្សានាំឲ្យប៉ះពាល់ដល់ផ្លូវកាយនិងផ្លូវចិត្តរបស់ជនរងគ្រោះខ្លាំងយ៉ាងណាទេ។
តើអ្នកជាជនរងគ្រោះដោយសារអំពើហិង្សាក្នុងក្រុមគ្រួសារឬ? ឬតើអ្នកស្គាល់នរណាម្នាក់ដែលរងគ្រោះដោយសារអំពើហិង្សាក្នុងគ្រួសារទេ? បើអ្នកជាជនរងគ្រោះឬស្គាល់នរណាម្នាក់ដែលរងគ្រោះ គម្ពីរអាចជួយលោកអ្នកបាន។ សូមពិចារណាចំណុចដូចខាងក្រោម។
សូមកុំគិតថាអំពើហិង្សាក្នុងគ្រួសារគឺជាកំហុសរបស់អ្នក
សូមកុំគិតថាអំពើហិង្សាក្នុងគ្រួសារគឺជាកំហុសរបស់អ្នក
គម្ពីរចែងថា៖«ព្រះនឹងវិនិច្ឆ័យយើងម្នាក់ៗតាមការប្រព្រឹត្តរបស់យើង»។—រ៉ូម ១៤:១២
ចំណុចសំខាន់៖ អ្នកដែលប្រើអំពើហិង្សាទេ គឺជាអ្នកខុស។
បើអ្នកត្រូវប្ដីវាយ នោះជាកំហុសរបស់ប្ដីមិនមែនអ្នកទេ ព្រោះប្រពន្ធសមទទួលសេចក្ដីស្រឡាញ់ពីប្ដី។—កូឡុស ៣:១៩
ប្ដីដែលប្រើអំពើហិង្សាអាចមកពីគាត់មានបញ្ហាផ្លូវចិត្ត ធំឡើងក្នុងក្រុមគ្រួសារដែលប្រើអំពើហិង្សា ឬដោយសារគាត់ស្រវឹងស្រា។ ទោះជាដោយសារមូលហេតុអ្វីក៏ដោយ ព្រះនឹងវិនិច្ឆ័យតាមការប្រព្រឹត្តរបស់គាត់ ហើយគាត់ក៏ត្រូវកែខ្លួនដែរ។
សូមរកជំនួយ
គម្ពីរចែងថា៖«បើមានការប្រឹក្សាច្រើន នោះគម្រោងនឹងបានជោគជ័យវិញ»។—សុភាសិត ១៥:២២
ចំណុចសំខាន់៖ បើអ្នកមានអារម្មណ៍ថាគ្មានសុវត្ថិភាព ឬមិនដឹងថាត្រូវធ្វើយ៉ាងណា សូមសុំជំនួយពីអ្នកឯទៀត។
ហេតុអ្វីអ្នកប្រហែលជាត្រូវសុំជំនួយពីអ្នកឯទៀត? អំពើហិង្សាក្នុងគ្រួសារគឺជាបញ្ហាស្មុគស្មាញមួយដែលពិបាកដោះស្រាយ ព្រោះមានរឿងមួយចំនួនដែលអ្នកត្រូវគិតពិចារណាថាមួយណាដែលសំខាន់ជាង រឿងទាំងនោះមានដូចជា៖
គិតអំពីសុវត្ថិភាពរបស់អ្នក
គិតអំពីប្រយោជន៍កូន
គិតអំពីការចិញ្ចឹមជីវិត
គិតអំពីក្ដីស្រឡាញ់ចំពោះគូ
គិតចង់ផ្សះផ្សាជាមួយគូបើគាត់កែខ្លួន
ពេលរងអំពើហិង្សាក្នុងក្រុមគ្រួសារ ធម្មតាទេដែលអ្នកមានអារម្មណ៍ស្មុគស្មាញ ហើយគិតថាបញ្ហានោះធំពេកពិបាកដោះស្រាយ។ ដូច្នេះ តើអ្នកគួរសុំជំនួយពីអ្នកណា?
អ្នកអាចរកជំនួយពីសមាជិកគ្រួសារឬមិត្តភក្ដិជិតស្និទ្ធព្រោះពួកគេអាចជួយអ្នកទាំងខាងផ្លូវកាយទាំងខាងផ្លូវចិត្ត។ ពេលអ្នកនិយាយប្រាប់នរណាម្នាក់ដែលស្រឡាញ់អ្នក នោះអាចធ្វើឲ្យអ្នកធូរចិត្តបាន។
ការទូរស័ព្ទទៅទីប្រឹក្សាផ្ដល់ជំនួយសម្រាប់ជនរងគ្រោះដោយអំពើហិង្សាក្នុងគ្រួសារ អាចផ្ដល់ជំនួយដល់អ្នកភ្លាមៗ។ ពួកគេអាចជួយអ្នកឲ្យធ្វើអ្វីមួយដើម្បីការពារខ្លួន។ ម្យ៉ាងទៀត បើគូរបស់អ្នកទទួលស្គាល់កំហុសហើយចង់កែខ្លួន ក្រុមទីប្រឹក្សានោះនឹងជួយគាត់។
អ្នកក៏អាចរកជំនួយពីប្រភពផ្សេងទៀតដែរ បើអ្នកស្ថិតក្នុងស្ថានភាពគ្រោះថ្នាក់អ្នកអាចរកជំនួយពីគ្រូពេទ្យ គិលានុបដ្ឋាយិកា ឬអ្នកជំនាញឯទៀតជាដើម។
អ្នកមិននៅតែឯងទេ
គម្ពីរចែងថា៖«ព្រះយេហូវ៉ា bនៅជិតអ្នកដែលមានចិត្តខ្ទេចខ្ទាំ លោកជួយអ្នកដែលបាក់ទឹកចិត្ត»។—ចម្រៀងសរសើរព្រះ ៣៤:១៨
ចំណុចសំខាន់៖ ព្រះសន្យាថាលោកនឹងជួយអ្នក។
ព្រះយេហូវ៉ាពិតជាយកចិត្តទុកដាក់ចំពោះអ្នកខ្លាំងណាស់។ (ពេត្រុសទី១ ៥:៧) លោកយល់ពីអារម្មណ៍កប់ជ្រៅរបស់អ្នក លោកអាចសម្រាលទុក្ខអ្នកតាមរយៈគម្ពីរដែលជាបណ្ដាំរបស់លោក។ លោកចង់ឲ្យអ្នកអធិដ្ឋានទៅលោក។ ពេលអ្នកអធិដ្ឋាន អ្នកអាចសុំប្រាជ្ញានិងកម្លាំងពីលោក ដើម្បីអ្នកអាចដោះស្រាយបញ្ហារបស់អ្នក។—អេសាយ ៤១:១០
អំពើហិង្សានឹងលែងមានទៀត
គម្ពីរចែងថា៖«ពួកគេនឹងអង្គុយនៅក្រោមដើមទំពាំងបាយជូរនិងដើមល្វារបស់ខ្លួន ហើយនឹងគ្មានអ្នកណាមកបំភ័យពួកគេឡើយ»។—មីកា ៤:៤
ចំណុចសំខាន់៖ គម្ពីរសន្យាអំពីគ្រាមួយនៅថ្ងៃអនាគតថា ផ្ទះរបស់មនុស្សគ្រប់រូបនឹងពេញទៅដោយសេចក្ដីសុខសាន្ត។
មានតែព្រះយេហូវ៉ាប៉ុណ្ណោះដែលអាចបំបាត់ចោលបញ្ហាទាំងអស់បាន ហើយបញ្ហាទាំងអស់នោះនឹងមិនកើតឡើងម្ដងទៀតទេ។ គម្ពីរចែងថា៖«លោកនឹងជូតអស់ទាំងទឹកភ្នែកចេញពីភ្នែករបស់ពួកគេ ហើយសេចក្ដីស្លាប់នឹងលែងមានទៀត ទុក្ខព្រួយ ការស្រែកយំ និងការឈឺចាប់ ក៏នឹងលែងមានទៀតដែរ។ អ្វីៗដែលធ្លាប់កើតឡើងពីមុន នោះបានកន្លងបាត់អស់ហើយ»។ (ការបើកបង្ហាញ ២១:៤) នៅគ្រានោះការនឹកចាំដ៏ឈឺចាប់ទាំងប៉ុន្មាននឹងជំនួសដោយអនុស្សាវរីយ៍ល្អៗវិញ។ (អេសាយ ៦៥:១៧) គម្ពីរសន្យាថាសេចក្ដីសុខសាន្តនេះនឹងកើតឡើងនៅថ្ងៃអនាគតជាក់ជាពុំខាន។
លោកអ្នកក៏ប្រហែលជាចូលចិត្តដែរ
សេចក្ដីបង្រៀនសំខាន់ៗក្នុងគម្ពីរ
ហេតុអ្វីព្រះអនុញ្ញាតឲ្យមានទុក្ខវេទនា?
មនុស្សជាច្រើនឆ្ងល់ថាហេតុអ្វីពិភពលោកនេះពោរពេញដោយការស្អប់គ្នានិងទុក្ខវេទនាច្រើនម៉្លេះ។ គម្ពីរមានចម្លើយដែលធ្វើឲ្យលោកអ្នកអស់ចម្ងល់ ហើយក៏សម្រាលទុក្ខផងដែរ។
ទស្សនាវដ្ដី
