៤ | គម្ពីរផ្ដល់ការណែនាំដែលមានប្រយោជន៍
គម្ពីរចែងថា៖ «គ្រប់ទាំងបទគម្ពីរ . . . មានប្រយោជន៍»។—ធីម៉ូថេទី២ ៣:១៦
នេះមានន័យថា
ទោះបីជាគម្ពីរមិនមែនជាសៀវភៅខាងវេជ្ជសាស្ត្រក៏ដោយ តែយោបល់ក្នុងគម្ពីរគឺមានប្រយោជន៍។ យោបល់ទាំងនោះអាចជួយបុគ្គលដែលកំពុងតស៊ូនឹងបញ្ហាខាងសុខភាពផ្លូវចិត្ត។ សូមពិចារណាឧទាហរណ៍ខ្លះៗ។
របៀបដែលគម្ពីរអាចជួយយើង
«មនុស្សដែលមានសុខភាពល្អមិនត្រូវការគ្រូពេទ្យទេ តែអ្នកដែលឈឺទើបត្រូវការគ្រូពេទ្យ»។—ម៉ាថាយ ៩:១២
គម្ពីរទទួលស្គាល់ថាយើងប្រហែលជាត្រូវស្វែងរកការព្យាបាល។ មនុស្សជាច្រើនឃើញថាពួកគេធូរស្រាលជាងដោយរៀនអ្វីដែលពួកគេអាចរៀនបាន អំពីជំងឺផ្លូវចិត្តរបស់ខ្លួនពីកន្លែងដែលអាចទុកចិត្តបាន និងដោយទទួលជំនួយពីគ្រូពេទ្យខាងវេជ្ជសាស្ត្រ។
«ការហ្វឹកហាត់ខ្លួនប្រាណមានប្រយោជន៍»។—ធីម៉ូថេទី១ ៤:៨
ការលៃពេលវេលានិងកម្លាំងដើម្បីមានទម្លាប់ល្អ អាចជួយធ្វើឲ្យសុខភាពផ្លូវចិត្តរបស់យើងកាន់តែល្អប្រសើរជាង។ ទម្លាប់ទាំងនេះរួមបញ្ចូល ការហាត់ប្រាណជាទៀងទាត់ ញ៉ាំម្ហូបអាហារដែលមានជីវជាតិ និងគេងឲ្យបានគ្រប់គ្រាន់។
«ចិត្តរីករាយជាថ្នាំវិសេស តែចិត្តខ្ទេចខ្ទាំធ្វើឲ្យអស់កម្លាំងរលីង»។—សុភាសិត ១៧:២២
ការអានបទគម្ពីរដែលលើកទឹកចិត្ត និងការកំណត់គោលដៅសមហេតុសមផលដែលអ្នកអាចធ្វើបាន អាចជួយអ្នកឲ្យសប្បាយចិត្ត។ បើអ្នកផ្ដោតអារម្មណ៍ទៅលើអ្វីល្អៗនៅក្នុងជីវិត ហើយជឿថាជីវិតរបស់អ្នកនឹងកាន់តែល្អប្រសើរឡើងនៅអនាគត នេះនឹងជួយអ្នកឲ្យស៊ូទ្រាំនឹងបញ្ហាសុខភាពផ្លូវចិត្ត។
«មនុស្សដែលមានចិត្តសុភាពបង្ហាញថាខ្លួនមានប្រាជ្ញា»។—សុភាសិត ១១:២
អ្នកប្រហែលជាឃើញថាអ្នកមិនអាចធ្វើអ្វីៗទាំងអស់ដែលអ្នកចង់ធ្វើដោយខ្លួនឯងបានទេ ដូច្នេះសូមព្រមទទួលយកជំនួយពីអ្នកឯទៀត។ មិត្តភក្ដិនិងក្រុមគ្រួសារទំនងជាចង់ជួយអ្នក ប៉ុន្តែពួកគេប្រហែលជាមិនដឹងថា ពួកគេត្រូវធ្វើអ្វីដើម្បីជួយអ្នកនោះទេ។ សូមប្រាប់ពួកគេអំពីអ្វីដែលពួកគេអាចធ្វើសម្រាប់អ្នក។ កុំរំពឹងថាអ្នកឯទៀតនឹងសុខចិត្តធ្វើអ្វីៗសព្វបែបយ៉ាងដើម្បីជួយអ្នកឡើយ ប៉ុន្តែសូមបង្ហាញចិត្តដឹងគុណចំពោះជំនួយដែលអ្នកបានទទួល។
របៀបដែលការណែនាំក្នុងគម្ពីរអាចជួយអ្នកដែលមានជំងឺផ្លូវចិត្ត
«ខ្ញុំមានអារម្មណ៍ថាមានអ្វីមួយដែលខុសប្រក្រតី ដូច្នេះខ្ញុំបានទៅពិគ្រោះជាមួយនឹងគ្រូពេទ្យ។ គាត់បានធ្វើរោគវិនិច្ឆ័យជំងឺរបស់ខ្ញុំ ហើយនេះបានជួយខ្ញុំឲ្យយល់អំពីស្ថានភាពរបស់ខ្ញុំច្បាស់ជាង និងស្រាវជ្រាវអំពីវិធីព្យាបាលផ្សេងៗដើម្បីថែទាំសុខភាពផ្លូវចិត្តរបស់ខ្ញុំ»។ នីខូល a ដែលមានជំងឺបាយប៉ូឡា។
«ខ្ញុំឃើញថាការអានគម្ពីរជាទៀងទាត់ជាមួយប្រពន្ធរបស់ខ្ញុំ ជួយខ្ញុំឲ្យចាប់ផ្ដើមថ្ងៃនីមួយៗដោយមានគំនិតវិជ្ជមាន ហើយនៅថ្ងៃដែលខ្ញុំពិបាកស៊ូទ្រាំ មានបទគម្ពីរណាមួយដែលជួយសម្រាលទុក្ខខ្ញុំ»។ ភីធើ ដែលមានជំងឺធ្លាក់ទឹកចិត្ត។
«ខ្ញុំពិបាកប្រាប់អ្នកឯទៀតពីជំងឺរបស់ខ្ញុំ ដោយសារខ្ញុំខ្មាសគេណាស់។ ប៉ុន្តែ មិត្តជិតស្និទ្ធម្នាក់របស់ខ្ញុំបានស្ដាប់ខ្ញុំយ៉ាងយកចិត្តទុកដាក់ ហើយព្យាយាមយល់អារម្មណ៍របស់ខ្ញុំ។ នាងបានជួយខ្ញុំឲ្យមានអារម្មណ៍ល្អប្រសើរជាង ហើយឲ្យខ្ញុំដឹងថាខ្ញុំមិននៅម្នាក់ឯងទេ»។ ជេយ៉ូ ដែលមានជំងឺបរិភោគមិនប្រក្រតី។
«គម្ពីរបានជួយខ្ញុំឲ្យមានតុល្យភាពនិងសមហេតុសមផល ស្ដីអំពីការងារនិងការសម្រាក។ ប្រាជ្ញានៅក្នុងគម្ពីរបានជួយខ្ញុំឲ្យស៊ូទ្រាំនឹងបញ្ហាផ្លូវចិត្តដែលញាំញីខ្ញុំ»។ ធីម៉ូថេ ដែលមានជំងឺគិតនិងធ្វើអ្វីដដែលៗ។
a ឈ្មោះខ្លះបានត្រូវផ្លាស់ប្ដូរ។
លោកអ្នកក៏ប្រហែលជាចូលចិត្តដែរ
ភ្ញាក់
របៀបរកផ្លូវដែលនាំឲ្យមានសុភមង្គល សុខភាពល្អនិងការចេះស៊ូទ្រាំ
តើបញ្ហាសុខភាពមានន័យថាមិនអាចមានសុភមង្គលឬ?
