សំណួរពីយុវវ័យ

តើខ្ញុំគួរធ្វើយ៉ាងណាបើឪពុកម្ដាយមិនអនុញ្ញាតឲ្យខ្ញុំប្រើប្រាស់បណ្ដាញសង្គម?

លេង

ប្រហែលមិត្តភក្តិទាំងអស់របស់ប្អូនប្រើបណ្ដាញសង្គម ហើយពួកគេតែងតែនិយាយអំពីវារាល់ដង។ ពួកគេប្រហែលជាសើចចំអកឲ្យប្អូន ដោយសារតែប្អូនមិនលេងបណ្ដាញសង្គម។ តើប្អូនគួរដឹងអ្វីខ្លះអំពីបណ្ដាញសង្គម? តើប្អូនអាចធ្វើយ៉ាងណាអំពីនេះ?

អ្វីដែលប្អូនគួរដឹង

មិនមែនមានតែប្អូនទេដែលមិនប្រើបណ្ដាញសង្គម។ ឪពុកម្ដាយជាច្រើនមិនអនុញ្ញាតឲ្យកូនរបស់ពួកគាត់ប្រើបណ្ដាញសង្គមទេ។ ពួកគាត់ប្រហែលជាទទួលស្គាល់ថានោះនាំឲ្យមានផលវិបាកជាច្រើន ដូចជា៖

មានជំងឺធ្លាក់ទឹកចិត្តនិងបញ្ហាផ្លូវចិត្ត។
ឃើញរូបអាសអាភាស ទទួលសារទម្រង់អាសអាភាស ហើយត្រូវគេប្រមាថមើលងាយនិងធ្វើបាបតាមអ៊ីនធឺណិត។
មានការយល់ច្រឡំច្រើនជាមួយមិត្តភក្តិ។

យុវវ័យជាច្រើនបានសម្រេចចិត្តឈប់ប្រើបណ្ដាញសង្គម។ ពួកគេទទួលស្គាល់ថាបណ្ដាញសង្គមមានចំណុចមិនល្អ ច្រើនជាងចំណុចល្អ។ សូមពិចារណាបទពិសោធន៍ពិតដូចខាងក្រោម៖

ប្អូនព្រីស៊ីឡាឃើញថាបណ្ដាញសង្គមស៊ីពេលវេលានាងច្រើនណាស់ ជាពិសេសពេលវេលាដែលនាងអាចប្រើសម្រាប់អ្វីដែលមានប្រយោជន៍ជាង។
ប្អូនយេរេមីមិនចូលចិត្តបណ្ដាញសង្គម ព្រោះគាត់មិនអាចគ្រប់គ្រងព័ត៌មានមិនសមរម្យកុំឲ្យលេចមកក្នុងគណនីរបស់គាត់។
ប្អូនបេថានីបានឃើញថាបណ្ដាញសង្គម ធ្វើឲ្យនាងគិតច្រើនពេកអំពីអ្វីដែលអ្នកឯទៀតកំពុងធ្វើ។

ប្អូនសៀរ៉ាបានរៀបរាប់ថា៖«ខ្ញុំសម្រេចចិត្តលុបកម្មវិធីបណ្ដាញសង្គមចោល ខ្ញុំសប្បាយណាស់ដែលខ្ញុំបានធ្វើដូច្នេះ។ ខ្ញុំមិននឹកនាពីវាសោះ ហើយខ្ញុំមានពេលច្រើនជាងដើម្បីផ្ដោតអារម្មណ៍ទៅលើអ្វីដែលសំខាន់បំផុតចំពោះខ្ញុំ»។

ប្អូនខេតបានរៀបរាប់ថា៖«បណ្ដាញសង្គមមិនត្រឹមតែធ្វើឲ្យខ្ញុំញៀនប៉ុណ្ណោះទេ តែវាក៏ធ្វើឲ្យខ្ញុំចេះតែគិតអំពីចំនួនអ្នកចូលចិត្តអ្វីដែលខ្ញុំបង្ហោះ។ ដំបូងខ្ញុំពិបាកលុបគណនីរបស់ខ្ញុំចោល តែពេលលុបហើយ ខ្ញុំមានអារម្មណ៍ធូរជាង ហើយក៏សប្បាយជាងដែរ»។

អ្វីដែលប្អូនអាចធ្វើ

គោរពវិន័យរបស់ឪពុកម្ដាយ។ សូមបង្ហាញឲ្យពួកគាត់ឃើញថាប្អូនមានភាពចាស់ទុំល្មមក្នុងការធ្វើតាមវិន័យរបស់ពួកគាត់ដោយមិនខឹងឬត្អូញត្អែរឡើយ។

គោលការណ៍គម្ពីរ៖ «មនុស្សល្ងីល្ងើបញ្ចេញកំហឹងរបស់ខ្លួនមកទាំងអស់ ប៉ុន្តែ អ្នកដែលមានប្រាជ្ញាចេះទប់អារម្មណ៍របស់ខ្លួនជានិច្ច»។—សុភាសិត ២៩:១១

អ្នកខ្លះប្រហែលជាលើកទឹកចិត្តប្អូនឲ្យប្រើបណ្ដាញសង្គមដោយមិនឲ្យឪពុកម្ដាយដឹង ឬដាក់ឈ្មោះផ្សេង។ ការធ្វើដូច្នោះមិនមែនជាការឈ្លាសវៃឡើយ! ការបិទបាំងបែបនោះនឹងធ្វើឲ្យប្អូនខ្វល់ចិត្តហើយមានអារម្មណ៍មិនស្រួល។ ម្យ៉ាងទៀត បើពួកគាត់ដឹង ប្អូននឹងមានបញ្ហា ហើយពួកគាត់នឹងលែងទុកចិត្តប្អូនទៀត។

គោលការណ៍គម្ពីរ៖ «យើងចង់ធ្វើការទាំងអស់ដោយទៀងត្រង់»។—ហេប្រឺ ១៣:១៨

ធ្វើការសម្រេចចិត្តដោយខ្លួនឯង។ ដូចយុវវ័យដែលបានរៀបរាប់នៅខាងដើម ប្អូនអាចគិតអំពីមូលហេតុផ្សេងៗដែលប្អូនមិនគួរប្រើបណ្ដាញសង្គម។ បើប្អូនឃើញច្បាស់ថាការប្រើបណ្ដាញសង្គមមិនមានឥទ្ធិពលល្អ ប្អូនផ្ទាល់អាចសម្រេចចិត្តមិនប្រើប្រាស់វា មិនមែនដោយសារឪពុកម្ដាយមិនអនុញ្ញាតនោះទេ។ បើប្អូនធ្វើដូច្នេះ ពេលមិត្តភក្តិនៅសាលាសួរប្អូនអំពីរឿងនោះ ប្អូននឹងមិនខ្មាសប្រាប់ពួកគេទេ ហើយពួកគេទំនងជាលែងសើចចំអកឲ្យប្អូនទៀត។

សរុបសេចក្ដី៖ សូមសហការជាមួយឪពុកម្ដាយ ហើយរកមើលចំណុចស្របគ្នាដើម្បីប្អូនអាចសម្រេចចិត្តដូចពួកគាត់ដែរ។ យ៉ាងហោចណាស់នៅឥឡូវនេះ ប្អូនអាចរស់នៅដោយគ្មានបណ្ដាញសង្គម។