តើក្នុងន័យអ្វីថ្លៃលោះរបស់លោកយេស៊ូអាច«លោះមនុស្សជាច្រើន»?
ចម្លើយពីគម្ពីរ
ព្រះបានឲ្យលោកយេស៊ូលះបង់ជីវិត គឺដើម្បីសង្គ្រោះមនុស្សជាតិឲ្យរួចផុតពីភាពខុសឆ្គងនិងសេចក្ដីស្លាប់។ គម្ពីរបានរៀបរាប់ថាឈាមរបស់លោកយេស៊ូជាថ្លៃលោះ។ (អេភេសូរ ១:៧; ពេត្រុសទី១ ១:១៨, ១៩) លោកយេស៊ូបានមានប្រសាសន៍ថា លោកមកដើម្បី«ឲ្យជីវិតខ្លួនជាថ្លៃលោះសម្រាប់មនុស្សជាច្រើន»។—ម៉ាថាយ ២០:២៨
ហេតុអ្វីចាំបាច់ត្រូវការ«ថ្លៃលោះសម្រាប់មនុស្សជាច្រើន»?
អាដាមជាបុរសដំបូងបានត្រូវបង្កើតមកយ៉ាងល្អឥតខ្ចោះ ឬគ្មានភាពខុសឆ្គងសោះ។ គាត់មានឱកាសរស់ជារៀងរហូត តែគាត់បានបាត់បង់ឱកាសនោះ ដោយសារគាត់សម្រេចចិត្តមិនស្ដាប់បង្គាប់ព្រះ។ (ដើមកំណើត ៣:១៧-១៩) ពេលគាត់មានកូន គាត់បានចម្លងភាពខុសឆ្គងទៅឲ្យកូនៗរបស់គាត់។ (រ៉ូម ៥:១២) ដោយសារមូលហេតុនេះ គម្ពីរបញ្ជាក់ថាអាដាមបាន«លក់»ខ្លួនគាត់និងកូនចៅរបស់គាត់ឲ្យធ្វើជាខ្ញុំបម្រើនៃភាពខុសឆ្គងនិងសេចក្ដីស្លាប់។ (រ៉ូម ៧:១៤) គ្មានកូនចៅណាម្នាក់របស់អាដាមអាចទិញនូវអ្វីដែលអាដាមបានបាត់បង់មកវិញទេ ដោយសារពួកគេទាំងអស់គ្នាជាមនុស្សមិនល្អឥតខ្ចោះ។—ចម្រៀងសរសើរព្រះ ៤៩:៧, ៨
ព្រះអាណិតមេត្តាដល់កូនចៅរបស់អាដាមដែលស្ថិតនៅក្នុងភាពអស់សង្ឃឹម។ (យ៉ូហាន ៣:១៦) ក៏ប៉ុន្តែ ខ្នាតតម្រាដ៏យុត្តិធម៌របស់ព្រះធ្វើឲ្យលោកមិនអាចមើលរំលងកំហុសឬអភ័យទោសឲ្យភាពខុសឆ្គងរបស់មនុស្ស ដោយមិនធ្វើអ្វីឲ្យបានត្រឹមត្រូវតាមច្បាប់ឬខ្នាតតម្រារបស់លោកឡើយ។ (ចម្រៀងសរសើរព្រះ ៨៩:១៤; រ៉ូម ៣:២៣-២៦) ព្រះស្រឡាញ់មនុស្សជាតិ ដូច្នេះលោកបានផ្ដល់នូវវិធីដ៏ល្អស្របតាមច្បាប់ នោះមិនគ្រាន់តែដើម្បីអភ័យទោសឲ្យភាពខុសឆ្គងរបស់ពួកគេប៉ុណ្ណោះទេ តែដើម្បីបំផ្លាញចោលភាពខុសឆ្គងឲ្យសាបសូន្យទៅ។ (រ៉ូម ៥:៦-៨) ម្ល៉ោះហើយ ថ្លៃលោះគឺជាវិធីដែលព្រះបានផ្ដល់ឲ្យ។
តើថ្លៃលោះរួមបញ្ចូលអ្វីខ្លះ?
ក្នុងគម្ពីរពាក្យ«ថ្លៃលោះ»រួមបញ្ចូលចំណុចបីយ៉ាង៖
១. ជាតម្លៃដែលត្រូវបង់។—ជំរឿនបណ្ដាជន ៣:៤៦, ៤៧
២. ជាតម្លៃដែលនាំឲ្យមានការរំដោះ ឬដោះលែង។—ដំណើរចាកចេញ ២១:៣០
៣. ជាតម្លៃដែលត្រូវស្មើនឹងតម្លៃដែលត្រូវបង់ ឬដើម្បីគ្របបាំង។ a
សូមយើងពិចារណាមើលចំណុចបីយ៉ាងនេះទាក់ទងគ្នាយ៉ាងណានឹងការលះបង់ជីវិតរបស់លោកយេស៊ូគ្រិស្ត។
១. ត្រូវបង់។ គម្ពីររៀបរាប់ថាគ្រិស្តសាសនិក«បានត្រូវទិញក្នុងតម្លៃថ្លៃណាស់»។ (កូរិនថូសទី១ ៦:២០; ៧:២៣) តម្លៃនោះគឺជាឈាមរបស់លោកយេស៊ូ ដែលលោក«បានទិញមនុស្សសម្រាប់ព្រះ ជាមនុស្សពីគ្រប់កុលសម្ព័ន្ធ គ្រប់ភាសា គ្រប់ពូជសាសន៍ និងគ្រប់ប្រជាជាតិ»។—ការបើកបង្ហាញ ៥:៨, ៩
២. ការរំដោះ។ ការលះបង់ជីវិតរបស់លោកយេស៊ូ គឺដើម្បី«រំដោះយើង»ឲ្យរួចពីភាពខុសឆ្គង។—កូរិនថូសទី១ ១:៣០; កូឡុស ១:១៤; ហេប្រឺ ៩:១៥
៣. ត្រូវស្មើ។ ជីវិតដែលលោកយេស៊ូបានលះបង់គឺមានតម្លៃស្មើនឹងអ្វីដែលអាដាមបានបាត់បង់ ពោលគឺជីវិតជាមនុស្សល្អឥតខ្ចោះម្នាក់។ (កូរិនថូសទី១ ១៥:២១, ២២, ៤៥, ៤៦) គម្ពីរចែងថា៖«ដូចមនុស្សជាច្រើនបានទៅជាមនុស្សមានភាពខុសឆ្គង ដោយសារបុរសម្នាក់នោះ[អាដាម]មិនបានស្ដាប់បង្គាប់ នោះមនុស្សជាច្រើននឹងទៅជាមនុស្សសុចរិត ដោយសារមនុស្សម្នាក់នេះ[យេស៊ូគ្រិស្ត]បានស្ដាប់បង្គាប់»។ (រ៉ូម ៥:១៩) ខនេះពន្យល់អំពីមូលហេតុដែលមនុស្សម្នាក់ស្លាប់ អាចបង់ថ្លៃលោះសម្រាប់ភាពខុសឆ្គងរបស់មនុស្សជាច្រើន។ តាមពិត ការលះបង់ជីវិតរបស់លោកយេស៊ូគឺជា«ថ្លៃលោះសម្រាប់មនុស្សទាំងអស់» ដែលចាត់វិធានការធ្វើតាមជំហានសំខាន់ផ្សេងៗដើម្បីទទួលប្រយោជន៍ពីថ្លៃលោះនោះ។—ធីម៉ូថេទី១ ២:៥, ៦
a ក្នុងគម្ពីរពាក្យភាសាដើមដែលបានត្រូវបកប្រែថា«ថ្លៃលោះ» បញ្ជាក់នូវគំនិតអំពីតម្លៃ ឬអ្វីដ៏មានតម្លៃដែលត្រូវបង់។ ជាឧទាហរណ៍ កិរិយាសព្ទភាសាហេប្រឺកាហ្វា(ka·pharʹ) មានន័យថា«គ្របបាំង»។ (ដើមកំណើត ៦:១៤) ជាទូទៅពាក្យនេះសំដៅទៅលើការគ្របបាំងភាពខុសឆ្គង។ (ចម្រៀងសរសើរព្រះ ៦៥:៣) នាមដែលទាក់ទងនឹងពាក្យនោះគឺកូហ្វើ(koʹpher) សំដៅទៅលើតម្លៃដែលត្រូវបង់ដើម្បីគ្របបាំងទាំងស្រុង ឬដោះលែង។ (ដំណើរចាកចេញ ២១:៣០) ស្រដៀងគ្នាដែរ ពាក្យភាសាក្រិចលីត្រន(lyʹtron)«ថ្លៃលោះ» ក៏អាចបកប្រែថា«តម្លៃដែលត្រូវបង់ដើម្បីដោះលែង»ដែរ។ (ម៉ាថាយ ២០:២៨) អ្នកនិពន្ធជនជាតិក្រិចបានប្រើពាក្យនេះសំដៅទៅលើតម្លៃដែលត្រូវបង់ដើម្បីលោះអ្នកទោសសង្គ្រាម ឬដើម្បីដោះលែងខ្ញុំបម្រើ។
លោកអ្នកក៏ប្រហែលជាចូលចិត្តដែរ
សំណួរនិងចម្លើយពីគម្ពីរ
តើលោកយេស៊ូសង្គ្រោះយើងតាមរបៀបណា?
ហេតុអ្វីយើងត្រូវការឲ្យលោកយេស៊ូអង្វរជំនួសយើង? តើការមានជំនឿលើលោកយេស៊ូគឺគ្រប់គ្រាន់ដើម្បីទទួលសេចក្ដីសង្គ្រោះឬទេ?
សេចក្ដីបង្រៀនសំខាន់ៗក្នុងគម្ពីរ
ហេតុអ្វីលោកយេស៊ូបានស្លាប់?
គម្ពីរប្រាប់យើងអំពីសារៈសំខាន់នៃការស្លាប់របស់លោកយេស៊ូ។ តើការស្លាប់របស់លោកមានគោលបំណងអ្វី?
