Etu kitwanda tena kujimba o kyônge kyadikota kya muvu wa 2020, kyexile o kyônge kyetu kyadyanga kyongalavale, ya a itula mu internete! Maji jiphange javulu jamala ni ja ahatu ku Malauí ni ku Muçambique, atale o kyônge kyadikota, kakexile ni internete. Maji kiki kyabhiti kyebhi?

 O Kibuka Kya Tufunga Ala Kupholo ni Kibuka kya Kulonga kya Kibuka Kya Utuminu, asolo kwila o kyônge kyadikota kibhite bhukaxi ka mutelembe wa inzunzumbya ni mutembele wa ifofo ku Malauí ni ku Maçambique. Mukonda dyahi abhange kiki? Mukonda ku Malauí o internete yate kalu yavulu, mukonda dyakiki, athu ofele ngó ku Jimbangi ja Jihova atena kukalakala ni internete. William Chumbi, ubhanga mbandu ku Kibuka kya Filiyale ku Malauí, wambe kiki: “Etu tweji tena ngo kuwamena o kudya munzumbi ku jiphange, bhukaxi ka mutelembe wa ifofo mba wa izunzumbya.” Luca Sibeko, usidivila we mu Kibuka kya Filiyale ku Malauí, wambe: “Se kikyeji bhana kubhitisa o progama mu Televizá mba mu Ládyu, jiphange ngó ofele ku mbanza ya filiyale, ejitena kumona o kyônge kyadikota.” Ku Muçambique, kyene we kimoxi. Jiphange javulu kala ni kitadi kyasoko phala kusumba iselekete yambote yakatunda phala kumona o kyônge kyadikota, ene kala we ni kitadi phala kusumba internete.

 Mukonda dya kabamba ka COVID-19, sayi matenda a mitelembe ya izunzumbia mba Ládyu, exile kya mubhitisa o yónge yakaxi ni disukilu dya semana. a O jiphange jetu adizwelesa ni ibuka yiyi mba jiemissóras phala kubhinga dingi kididi mba ji ola phala kubhitisamu o programa ya kyônge kyadikota.

 Ku Malauí, o jiphange jetu adibhanene ni kibhidi kimoxi. O akwa emissoras ene musumbisa ngó nange ola imoxi kwa yó eza musumba. Ene ala ni woma wakwila, o jiprograma jamakota jinanga ola javulu, ki jikwatekesa o athu kubhana mátwi. Maji o jiphange jetu azwela kwila o kikalakalu kyetu, kyalungu ni athu oso. Nemwene mu kithangana kya COVID-19, etu twamuximbakatesa o athu ni njimbu yambote itunda mu Bibidya, o njimbu yiyi, itena kwakwatekesa kukala athu ambote, ni kukala we ni mwiji wazediwa. Kyoso o akwa emissora kyevu o izwelu yiyi, ene axikina o kima kyabhingi o jiphange jetu.

 Ku Malauí, o kyônge kyadikota akibhitisa bhukaxi ka emissora imoxi ya Televizá ni emissora imoxi ya ládyu. O ji emissora jiyadi jiji, abhixidisa o sinale mu ixi yoso, mazunda ni mazunda a athu atena kumona mba kwivwa. Ku Muçambique, o kyônge kyadikota akibhitisa we bhukaxi ka emissora imoxi ya mutelembe wa izunzumbya, kwexile we 85 a ji emissora ya ládyu.

 Mu jixi jiyadi jiji, angastalaku 28.227 b ajidolale, kifwa (18.130.879,548 ajikwanza) phala kubhitisa o kyônge kyadikota bhukaxi ka mutelembe wa izunzumbya, a ngastala we nange 20.000 ajidolale (12.846.480,00 ajikwanza) phala kubhitisa mu ládyu. Yalungu ni matenda a mitelembe ya ifofo, sayi bhabha o jipelesu kijidifu, mu kifika 15 ajidolale (9.634,86 ajikwanza) phala o matenda ofele, ni 2,777 ajidolale (1.783.733,748 ajikwanza) phala o matenda onene, abhixidisa o sinale yâ mu ixi yoso.

 O jiphange jetu abhanga yoso ni yoso phala kungastala kyambote o kitadi kyene musangela. Mu kifika, ku Malauí ene atenene kubhanga o wenji yú mu kitadi kyofele, a abhange diskontu mu 30 ajipursentu. O madiskontu jeniji, ya akwatekesa kupopala 1,711 ajidolale, kifwa (1.099.016,364). Ku Moçambique, sayi matenda a mitelembe ya izunzumbya ni ji ládyu, asosolola o jipelesu mukonda dya ukexilu wetu wambote, kitwene munyana mba kudyodya, twene we mu futa o kitadi mu kizuwa kyatokala.

 O jiphange jetu awabhela kyavulu, asakidila we kyavulu mukonda dya kwivwa ni kumona o kyônge kyadikota bhukaxi ka mitelembe ya izunzumbya ni mitelembe ya ifofo ya ixi yâ. Phange Patrick, kafunga mu ixi ya Malauí, wambe: “Etu tusakidila kyavulu o jiphange akwa Kibuka Kya Utuminu, mu yoso yamubhanga phal’etu mu kithangana kya uhaxi yú.” Isaac, phange mukwa ixi ya Malauí, wambe: “Etu kitwaletu ni mitelembe ya kafwetele mba jitablete, mukonda dya kiki, etu tusakidila kyavulu o kilunga kya Jihova, mukubhanga yoso phala twivwe o kyônge kya dikota bhukaxi ka ládyu. Mukonda dyakiki, o mwiji wami woso, utena kukatula mbote mu kyônge kyadikota. Phala etu, kiki kyexile kilondekesa kya henda ya Jihova ku mundu wê.”

 Sayi muboki mu ixi ya Moçambique, o kyônge kyadikota kya 2020, kyexile o kyônge kyê kyadikota kyadyanga. Mwene wambe: “O kusistila o kyônge kyadikota bhukaxi ka televizá, kyangilembalesa ni kididi kyoso kwila Jihova mwéne o Nzambi muteni-a-yoso. O uhaxi yú, katena kumufidisa kutubhana o kudya munzumbi, o lwamukwa, mwene watusidivila mwene kyambote, bhabha mu sala ya inzo yami. Eme ngamono o henda yakidi yala nayu o mundu wa Jihova. Eme kingala ni phata ya kwila yá, ene o abhezi a kidi.”

 Sayi kafunga amwixana Wyson, wambe: “Ngamesena kusakidila o kimbadi kya fiyele, mukonda amutulanga kyambote mukithangana kiki kya uhaxi yú. O kutala ni kwivwa okyônge kyadikota bhukaxi ka Televizá ni bhukaxi ka ládyu, kyakwatekesa kyavulu o athu bhabha, avulu mudyetu tujingadyama, maji némwene kiki, twatena kutala o minangu ya kyônge kyadikota ni kudilonga ima yavulu.”

 Phala o muvu wa 2021, o Kibuka Kya Tufunga Ala Kupholo ni Kibuka Kya Kulonga, asolo we kwila, mu ididi mwala ibhindamu, o kyônge kyadikota akibhitisa we bhukaxi ka Televizá ni ládyu. Kyebhi kyatena kufuta o jingastu jabhingi phala kubhitisa o kyônge kyadikota mu ukexilu yú? Atena kufuta bhukaxi ka kitadi kyene musangela o athu phala o ikalakala ku mundu woso, bhukaxi ka maukexilu akusangela utusanga mu sayite donate.mt711.com. Twasakila o kitadi kimwene musangela muvondadi yenu.