Kiki kiene kia divu o ka kilumba ka kexile mu 13 kia mivu, kioso kia mu bhele o ujitu ua kambua. Sai muhatu, ngenji, uambe kuila o koputadolo ia mu bhana tat’e kioso kia kexile hanji mu bhanga o xikola uexile ujitu ua lunguluile o muenhu uê. Sai diiala uexile dikaza dia ubhe uambe kuila, kioso kia tenesa muvu ua ukaza, o kalatá ka ukaza ka bhangele muhatu uê, uexile o ujitu ua betele dingi o kota ua tambuile kiá.

Ku mivu ioso, ndumba ia athu, a bhanga nguzu iavulu, a ngastala kithangana kiavulu mu ku kenga o ujitu ua beta dingi o kota, mu ithangana ia katunda, phala ku bhana ku dikamba mba ndandu. Athu avulu, a mesena kudivua kala o athu u tua tange kia ku dima. Abha eie? O kuila ua mesena kubhana mba kutambula maujitu a mbote a uabhela o athu?

O kidielelu kiki kidielelu kiambote, ki mukonda ngó dio kisangusangu kia divua o muthu ua tambula o ujitu, maji mukonda ni muthu ua bhana o ujitu u sanguluka ue. O Bibidia iamba: “O kubhana kota mu kuzediuisa, o kutambula ndenge.” (Ikalakalu 20:35) Kidi muene, o kisangusangu kijila mu kubhana ki beta dingi kota se o ujitu uenhú u kala ni valolo ia dikota ku muthu ua u tambula.

Mu kiki, kiebhi ki u tena kubhangesa kuila o ujitu u ua bhana u bhekela kusanguluka kua kidi, ki kale kokué ni kua ió u tambula? Se kutena kubhana o ujitu ua “beta kota” ihi i u tena kubhanga phala o ujitu ué a u uabhele kiavulu?