O ji dotolo, amba kuila o athu ka bhingi ngó ku di dikila mu xitu phala ku zediua ku muenhu. Tuejiia o kidi kiki, mu ku mona kuila o athu a sota ku bhanga kima mba ku sidivila muthu ua a tundu. Phala ku dikila o ibhindamu íii, saí athu a ngastala o ithangana iâ mu itonokenu ia ku tala o ima mu ngongo, ku pindala ima, kuimba mba ku bhanga ima ia mukuá. Maji athu avulu ka sanga o ku zediua kua kidi mu ima muene mu di bhakula.

O kuijiia kuila o athu a a bhange ni vondadi ia kuijiia Nzambi, ki i sasumukisa o atangi a Bibidia kana. O ibatulu ia dianga mu Bibidia, mu divulu dia Dimatekenu, ilondekesa kuila kioso Nzambi kia zubha o ku bhanga o athu a dianga, izuua ioso muéne ua kexile mu zuela nau, ni kuehela kuila ene a kala ni ukamba ni muéne. (Dimatekenu 3:8-10) Nzambi ka bhange o athu phala ku di tumina mudiâ; ene ala ni kibhindamu kia ku di zuelesa ni Mubhangi uâ. O Bibidia i zuela kiavulu o kibhindamu kiki.

Mu kifika, Jezú uambe: “A beta o kuzediua oso évua o Maka ma Nzambi, anga a ma lunda!” (Luka 11:28) Ni izuelu íii, tu tena kuzuela kuila, phala ku zediua ku muenhu tua tokala ku dikila o vondadi ietu ia kuijiia Nzambi. Kiebhi ki tu tena ku bhanga kiki? Jezú ua tambuijila kioso kiambe: “O muthu ki ku mbolo ngó kua muena o muenhu, maji ku maka moso ma tunda ku dikanu dia Nzambi.” (Matesu 4:4) Kiebhi o maka oso a tunda mu kanu dia Nzambi mba o ibanzelu iê ni itendelesu i tu sanga mu Bibidia, i tu kuatekesa ku zediua ku muenhu? Tu di longe ima itatu.

Athu avulu a di longo kiavulu lelu, ene mu bhana milongi ia lungu ni ku bhanga makamba a mbote, henda, ukexilu ua muiji, ku batula jinvunda, ni ia lungu ni ku zediua ku muenhu. Maji o kuila saí muthu ua tundu Jihova Nzambi, o Mubhangi ua athu, mu ku bhana milongi iambote phala o athu ku di tunda diambote mu maka enhá?

Mu kifika: Kioso ki u sumba kima kia ubhe, kala makina ia filme mba ia ku xabula jifoto mba komputadolo, eie u kingila ku sumba o ima íii ni kadivulu kê ki ku jimbulula kiebhi ki u tena ku kalakala na-iu kiambote.  O Bibidia a tena ku i sokesa ni kadivulu kaka. Kadivulu ka zuela maka alungu ni muenhu ua tu bhana Nzambi, o Mubhangi ua muenhu. O “kadivulu” ka jimbulula o ima i tena ku bhanga o makina ni kiebhi kia tena ku kalakala na-iu kiambote.

Kala ki bhanga o madivulu oso-oso a ku longa, o Bibidia i dimuna o atangi ku dilanga ku ima i tena ku bhangesa o muthu ku zanga o muenhu uê. Athu a mukuá a tena ku bhana itendelesu ki i difu, i tu mona kuila ki i bhonzo o ku i kaiela, maji, ki kima kiambote ku xinganeka kuila, tua-nda di tunda ngó kiambote se tu kaiela o itendelesu ia Mubhangi ua muenhu?

Sumbala Jihova Nzambi u bhana milongi ni itendelesu, muéne ka tu jijidika o ku xikina ioso ia tu bhana. Maji mukonda ua tu zolo, iu ua mesena o ku tu kuatekesa, muéne u tu tangela: “Eme, Jihova, Nzambi ié, u ku longa kioso kia uabha, hé u ku endesa mu njila i ua fuama kuenda mu ku di-tela. Uaué! Tamanu ua bhele mátui ku ijila iami! O paze ié ieje kuila kala ngiji, o ku lunga kué kueje kuila kala mabhuku ma Musanza ma Kalunga.” (Izaia 48:17, 18) Mu kiki, se tu belesela o ijila ia Nzambi, tua-nda kala kiambote ku muenhu. Kiki kilombolola kuila, phala tu kale kiambote ku muenhu ni ku zediua, tua bhingi Nzambi.

Saí athu a banza kuila ka bhingi Nzambi, mukonda ene mu dibhana ni ima iavulu ku muenhu ilondekesa kuila Nzambi ki muthu ua henda kana. Mu kifika, nange a di ebhuidisa: ‘Mukonda diahi athu ambote a tala hadi?’ ‘Mukonda diahi saí tubuetele a a vuala kiá ni uhaxi?’ ‘Mukonda diahi kuene hadi iavulu ku muenhu?’ Íii ibhuidisu iambote, o ku sanga o itambuijilu ia tokala i tena ku lungulula o ukexilu ua muenhu uetu. Maji mu veji dia ku tatela Nzambi ni lusolo mu maka enhá, tu tale kiebhi o Mak’â Nzambi, o Bibidia, i tena ku tu kuatekesa ku tendela o maka enhá.

Mu kibatulu kia katatu mu divulu dia Dimatekenu, tu sanga-mu o musoso ua Satanaji, mu kidifuanganu kia nhoka, ua bhangesa o dikaza dia dianga ku bhukumukina o kijila kia Jihova Nzambi, kia lungu ni kudia o kibundu kia kuijiia kia uabha ni kia iibha. Satanaji uambe kua Eva: ‘Ki mua-nda kufuá. Mukonda Nzambi ua kijiia kuma kizuua ki mudia-ku, mua-nda ku tona mesu, mu sokela ni Nzambi, muijiia kia uabha ni kia iibha.’—Dimatekenu 2:16, 17; 3:4, 5.

Ni izuelu íii, Satanaji ka zuela ngó kuila Nzambi mukua makutu, maji ua londekesa ué kuila Nzambi kala ni ukexilu uambote ua ku tumina. O Diabhu uambe kuila se o athu a mu bhele mátui, ene eji di tunda kiambote ku muenhu uâ. Kiebhi o maka enhá kia tokalele ku a batula? Jihova ua bhana kithangana phala kuehela athu oso ku mona se o ima ia iibha ia zuela Satanaji ia lungu ni muéne ia kidi muene mba ia mukutu. Nzambi ua kexile mu bhana kua Satanaji ni ió akexile ku mbandu iê, kithangana kia ku mona se o athu a tena ku kala kiambote ku muenhu sé o kikuatekesu kia Nzambi.

 O kuila Satanaji ua lungu mu ima ioso ia zuela? O kuila o athu a tena ku kala kiambote ku muenhu ni ku di tumina mudiâ sé o kikuatekesu kia Nzambi? O hadi, o kuiibha, o mauhaxi, o kufuá, o ujibhangânga, o ufusa, o ita, ni ima ia mukuá ia iibha iene mu bhekela hadi iavulu ku athu mu ngongo mu hama ja mivu, ilondekesa kuila o athu ka tena ku di tumina mudiâ sé o kikuatekesu kia Nzambi. Mu veji dia kulondekesa kuila Nzambi muene uala ni kikuma ku hadi ioso iene mu tala o athu, o Bibidia i zuela se ihi iene mu bheka o hadi mu ngongo: “Muthu u kala mu ku tumina mukuá phala ngó ku mu sengulula.”—Ndongixi 8:9.

Kiki ki kilondekesa kuila tua tokala ku sota Nzambi, phala ku sanga o itambuijilu ia ibhuidisu ietu ia bhonzo o ku i tambuijila, maji ni ku sota ué kikuatekesu phala ku zubha o hadi ioso ia tala o athu mu ngongo? Ihi ia-nda bhanga Nzambi?

O athu a mesena ku kala kiambote ku muenhu, sé ku kata, ku kuka, né kufuá. Kienhiki, a ngastala kithangana kiavulu, nguzu, ni kitadi mu ima ia bhanga, maji ka tena ku zubha o ima íii. Saí athu a kingila ku kala ni ufôlo ku muenhu mu ku tambula inuinu mba milongo mu ku banza kuila i tena ku a kuatekesa ku kala dingi kiambote ku muenhu sé ku kuka. Maji kiki, ki kiene mu bhita kana.

Nzambi ua mesena kuila o athu a kala kiambote ku muenhu ni ku zediua. Kiki kiene kiexile o vondadi ia Nzambi kioso kia bhange o athu, ni kuila muéne ka jimbi o vondadi iê io kulu. (Dimatekenu 1:27, 28; Izaia 45:18) Jihova Nzambi ua tu kanena kuila, ioso ia mesena muéne o ku bhanga, ia-nda di kumbidila muene. (Izaia 55:10, 11) O Bibidia i tu tangela ia lungu ni kikanenu kia Nzambi kia ku iudika dingi o ixi mu Palaízu ia texi o dikaza dia dianga. Mu divulu dia sukina mu Bibidia tu sanga-mu o izuelu íii: “Muéne [Jihova Nzambi] u a kondona o masoxi moso ku mesu mâ! Ki ku kala dingi kùfua, nè ngó mukôndo, mba kudila, mba kukata. Mukonda ima ia diangèle-ku, ia bhiti.” (Dijingunuinu 21:4) Kiebhi Nzambi kia-nda bheka o ima íii iambote, ni kiebhi ki tu tena ku katula mbote mu kikanenu kiki?

O Mon’a Nzambi, Jezú Kristu, ua longo o akaiedi’ê ku samba phala o vondadi ia Nzambi a i bhange mu ixi. Athu avulu lelu ejiia kiambote o musambu iú, ni ku u samba ithangana ioso, ene mu uixana kuila, Musambu ua Ngana. U zuela kiki: “Tata ietu uene mu diulu, dijina dié a dixile. Utuminu ué uize. Vondadi ié a i bhange bhoxi, kala kiala ku i bhanga ku diulu.” (Matesu 6:9, 10) Jihova Nzambi ua-nda zubha o kuiibha kuoso kuene mu bhanga o jinguvulu mu ngongo, mu kaxi ka Utuminu uê, ni ku bheka o mundu ubhe ua iuka ua kanena mu ixi. * (Daniiele 2:44; 2 Phetele 3:13)  Ihi i tua tokala o ku bhanga phala tu katule mbote mu kikanenu kiki kia Nzambi?

Jezú Kristu u tu tangela ihi i tua tokala o ku bhanga: “Kuku ku lombolola muenhu ua kalelaku, kuma oso a ku ijiie eie u Nzambi ia kidi imoxi-élele, ni kuijiia ué ió ua mu tumu eie, Jezú Kristu.” (Nzuá 17:3, NW) Kiene muene, ni kikuatekesu kia Nzambi, tu tena ku kala ni muenhu ua kalelaku ku mundu ubhe. O kidielelu kiki ki tena ku ku kuatekesa ku xikina kuila, tua bhingi muene Nzambi.

Midi jiiadi ku dima, ku Mulundu ua Hamba-dieta, ku Atena, o poxolo Phaulu ua zuela ia lungu ni Nzambi ku akua Atena: ‘Muéne u bhana oso o ku kola o muenhu ni ku bhuima, ni ku mona ima ioso. Mukonda mua muène ngó mu tu muena o kulâia ni kuzamba, ni kukala. Amoxi-mu ku jingimbidi jenu a ki te ku mukumbi, exi: Etu-ene tuala ué tu an’ê.’—Ikalakalu 17:25, 28.

O ia zuela Phaulu ku akua Atena, katé lelu kidi muene. O Mubhangi uetu u bhana o munza u tuene mu bhuima, o kudia ku tuene mudia, ni menha u tuene munua. Ki tueji tena ku kala ku muenhu sé o ima iambote iene mu tu bhana Jihova phala tu kale ku muenhu. Maji mukonda diahi Nzambi uene mu bhana o ima ioso íii ku athu oso, ki kale se ene a bhanga o vondadi iê mba kana? Phaulu uambe kuila “phala athu a sote Nzambi, sumba kia babajala a di bonga-nê, mbata Muène kana muthu ua mu kala dikanga.”—Ikalakalu 17:27.

Ua mesena kuijiia kiambote Nzambi, mba ku di longa o vondadi iê ni ihi i ua tokala o ku bhanga phala ku kala kiambote ku muenhu lelu ni ku hádia? Se ua mesena, tua mu ku suínisa ku sota o muthu ua ku bhana o kadivulu kaka, mba sonekena o athu a bhange o kadivulu kaka. Ene a-nda sanguluka mu ku ku kuatekesa mu maka enhá.