ҺЬНӘК ДЬБЕЖЬН НА. Дохдьрәк гот, кӧ иро мәкʹтәбада тʹӧ дәрсдарәк ль сәр дәрсед кʹимйайе, ԝе нәдә хәбате кʹьтеба кәвьнә йа сала 1920, кӧ зарʹа һин кьн. Әԝи гот кӧ принсипед Кʹьтеба Пироз жи, һәма ӧса бекер ьн. Мәрьвед кӧ баԝәрийа хԝә Кʹьтеба Пироз найиньн, дьбежьн ԝәки әв ча бежи һәрге бьди хәбате рʹебәрийа кәвьн йа компотере, сәва кӧ бь ве рʹебәрийе һин бьн компотера модерн бьдьнә хәбате. Һәрге бь гьлийе майин бежьн, мәрьв дьфькьрьн ԝәки Кʹьтеба Пироз кʹьтебәкә кәвьн у бекер ә.

Гәло чьма иро кәсәк гәрәке рʹебәрийа кәвьн бьдә хәбате, нә әм дьжин ԝәʹде текноложийайә модерн? Хенщи ԝе йәке беһʹәсаб малпәр у рʹожньвис, гәләк ширәт у рʹебәрийа дәрбази мә дькьн. Бәрнамед телевизийоне жи, рʹебәрийа у ширәта дәрбаз дькьн бь сайа дохдьра, мамоста у ньвискʹара. Ле махазийед кʹьтеба, беһʹәсаб кʹьтеб нәшьр дькьн кӧ йан чь, бь ширәтед хԝә али мәрийа бькьн. Сәр ве йәке гәләк милйард долар те хәрщкьрьне.

Һәрге иро һаԛас информасийа те дәстхьстьне, чьма әм гәрәке Кʹьтеба Пироз һьлдьн һʹәсаб, йе кӧ ԝәкә 2 000 сал пешда һатьбу тʹәмам кьрьне? Дьбә кӧ зандар у мәрьвед дьн рʹаст дьбежьн, кӧ хәбьтандьна Кʹьтеба Пироз, әв һәйә ча бежи бьдьнә хәбате кʹьтеба кәвьнә кʹимийайе йан рʹебәрийа кәвьнә компотәре, кӧ тьштәк һин бьн. Чь жи һәбә әв ньһерʹандьн нәрʹаст ә. Зандари у текʹноложийа зу-зу тенә гӧһастьне, ле һʹәԝщед мәрьва найенә гӧһастьне. Һʹәта ньһа мәрьв диса жи дьхԝазьн нета жийине бьвиньн, бәхтәԝар у бехофийеда бьн, һәләԛәтийа баш малбәтеда хԝәй кьн у һәвалтийа баш жи ԛазанч кьн.

Рʹаст ә Кʹьтеба Пироз кʹьтебәкә кәвьн ә, ле әԝ дькарә һʹәԝщед мәда али мә бькә, чьмки әв жь бина бәр Әʹфьрандаре мә һатийә ньвисаре. Әв һʹәму алийава рʹебәрийа мә дькә у һазьр дькә бона һʹәму чәтьнайед жийине (2 Тимотʹейо 3:16, 17). Һәйнәсәр дь ве кʹьтебеда һәнә ширәт, кӧ тʹьме ԝәхтда ньн у рʹебәри йед кӧ тʹӧщар кәвьн набьн! Кʹьтеба Пироз хԝәха жи дьбежә: «Хәбәра Хԝәде сах у зор ә» (Ибрани 4:12).

Гәло Кʹьтеба Пироз рʹаст ә? Әв кʹьтебәкә кәвьн ә йан бь рʹасти кʹьтебәкә лайиԛ у керһати йә? Нета ве нәшьра мәхсусә «Бьрща Ԛәрәԝьлийе», әв ә, кӧ али тә бькә щабед ԝан пьрса бьвини.