Әз Һондураседа бажаре Ла Сейбада һатьмә буйине. Жь пенщ зарʹа әз йе бьчʹук бум, у әз тʹәне гәдә бум. У малбәта мәда тʹәне әз кәрʹ бум. Малбәта мә мьһаләкә хоф у кʹәсибда дьжит. Чахе әз чар сали бум, баве мьн щийе хәбате кʹәтә ԛәзийе у мьр. Паши ԝе йәке жийина мә дьһа чәтьн бу.

 Дийа мьн һәр тьшт дькьр, ԝәки мьн у хушкед мьн хԝәй кә. Ле әԝе нькарьбу епʹещә пʹәрә ԛазанч кә, ԝәки мьнрʹа кʹьнща бькʹьрʹә. Чахе баран дьбари, әз тʹьме зәʹф дьщәмьдим, чьмки кʹьнщед мьнә гәрм тʹӧнә бун.

 Чахе һьнәки мәзьн бум, мьн дәстпекьр зьмане кәрʹ-лалайи Һондураси һин бьм. Ләма жи мьн дькарьбу тʹәви мәрьвед кәрʹ хәбәр дьм. Ле дийа мьн у хушкед мьн әв зьман ньзаньбун. Әԝана тʹәне чәнд жеста һин бьбун кӧ тʹәви мьн хәбәр дьн. Ле бь тʹәмами пе жестед кӧ бәр хԝә дәрхьстьбун, тʹәви мьн хәбәр дьдан. Дийа мьн әз һʹьз дькьрьм у тʹьме әз хԝәй дькьрьм кӧ нәкʹәвьмә ԛәзийа. Әԝе бь чәнд жестед кӧ бәр хԝә дәрхьстьбу, әз дьдамә фәʹмкьрьне, ԝәки щьхарә у ичкә чьԛас хьраб ьн у дькарьн зийане бьдьнә мьн. Әз гәләк жь дийа хԝә рʹази мә, ԝәки әз ӧса мәзьн кьрьмә, кӧ әз жь тьштед хьраб дур ьм.

 Чахе әз бьчʹук бум, дийа мьн тʹьме әз дьбьрьмә Дера Католики. Ле мьн тьштәк фәʹм нәдькьр, чьмки кәсәк тʹӧнә бу кӧ сәр зьмане кәрʹ-лала мьнрʹа ԝәлгәрʹанда. Ләма жи һʹәԝаса мьн кʹәт у дәһә салийа хԝәда мьн тʹәрка дере да. Ле диса жи мьн дьхԝәст дәрһәԛа Хԝәде һе зедә пебьһʹәсьм.

 Сала 1999-да чахе әз 23 сали бум, рʹасти кʹӧлфәтәкә жь Дәԝләтед Йәкбуйи һатьм, йа кӧ жь Дера Йевангелиста бу. Әԝе зьмане кәрʹ-лалайи Америки әз һин кьрьм у ӧса жи тʹәви мьн дәрсед Кʹьтеба Пирозва гьредайи дәрбаз дькьр. Чь кӧ әз жь Кʹьтеба Пироз педьһʹәсийам ӧса мьн хԝәш дьһат, кӧ мьн сафи кьр дереда бьбьмә кʹәшиш. Ләма жи әз чумә Порто Рикойе, мәркʹәза һинбуне бона Мәсиһитийа, йа кӧ бона кәрʹ-лала бу. Сала 2002 әз пашда вәгәрʹийамә Ла Сейбайе у мьн тʹәви һәвалед хԝә бона кәрʹ-лала дер саз кьр. Жь ԝан һәвала йәк Патрисйа бу, кʹижан кӧ ԝәʹдә шунда бу жьна мьн.

 Мьн ча кʹәшише дере, һәр тьшт дькьр ԝәки али кәрʹ-лала бькьм, сәва Кʹьтеба Пироз фәʹм бькьн. Мәсәлә, мьн сәр зьмане кәрʹ-лалайи Һондураси ԝанрʹа даннасин дькьр, шькьлед сәрһатийед Кʹьтеба Пирозда нишани ԝан дькьр у әԝ сәрһати бь тʹәмашә нишан дькьр. Мьн ӧса жи шәһәред незикда сәрледана мәрьвед кәрʹ-лал дькьр. Мьн әԝана һелан дькьрьн у аликʹари дьда ԝан чьда кӧ әԝана һʹәԝщә бун. Әз ӧса жи ча мисйонер чумә Дәԝләтед Йәкбуйи у Замбийайе. Ле рʹаст бежьм мьн дәрһәԛа Кʹьтеба Пироз гәләк тьшт ньзаньбу. Мьн ԝанарʹа тʹәне гьли дькьр әԝ йәк, чь кӧ мьнрʹа гьли кьрьбун у чь кӧ мьн пе шькла фәʹм кьрьбу. Бь рʹасти пьрсед мьн һе зәʹф бун, нә кӧ щабед мьн.

 Һьнә ԝәʹдә шунда мәрьвед дера мьн дәстпекьрьн шәрʹа бавежьнә мьн, йанчь әз ичкева һатьмә гьредане у нәмамийа жьна хԝә дькьм. Жь бо ԝан бӧхдана гәләк һерса мьн рʹабу у әз дьлтәнг бум. Ләма жи һьнә ԝәʹдә шунда әз у Патрисйа жь дере чун.

 Шәʹдед Йаһоԝа гәләк щар дьһатьнә щәм мә, ле мә нәдьхԝәст тʹәви ԝан хәбәр дьн. Ле чахе әм жь дере чун, Патрисйа ԛайил бу ԝәки тʹәви Шәʹдед Йаһоԝа кӧ мер у жьн бун, һинбуна Кʹьтеба Пироз дәстпекә. Наве ԝан Томас у Лиси бу. Гәләк дьле мьн гьрт әԝ йәк, кӧ әԝана кәрʹ-лал нибун, ле зьмане кәрʹ-лала заньбун. Ләма жи зутьрәке мьн жи һинбуна Кʹьтеба Пироз дәстпекьр.

 Әм бь аликʹарийа видеойа бь зьмане кәрʹ-лалайи Америки, һинбуна Кʹьтеба Пироз дәрбаз дьбун. Ле чахе һьнә һәвалед мә Шәʹдед Йаһоԝа нәһәԛ кьрьн ԝе йәкеда, кӧ әԝана пәй рʹебәрийа мәрийа дьчьн, нә кӧ пәй рʹебәрийа Хԝәде, мә һинбуна Кʹьтеба Пироз да сәкьнандьне. Рʹаст ә Томас гәләк избаткьрьн нишани мьн дькьр, ԝәки Шәʹдед Йаһоԝа пәй рʹебәрийа мәрьва начьн, ле йәкә мьн баԝәр нәдькьр.

 Чәнд мәһ шунда чахе Патрисйа кʹәтә депресийа гьран, әԝе Хԝәдерʹа дӧа кьр ԝәки Шәʹдед Йаһоԝа диса бенә щәм ԝе. Щинарәкә мә йа кӧ Шәʹде Йаһоԝа бу, тʹәсәлийа ԝе кьр у гот ԝәки әԝ дькарә Липсирʹа бежә, ԝәки әԝ бе щәм ԝе. Липси рʹасти жи һәваләкә гәләк баш бу. Әԝ һәр һʹәфти дьһатә щәм Патрисйайе, ле ԛәԝи дькьр у ӧса жи тʹәви ԝе һинбуна Кʹьтеба Пироз дәстпекьр. Ле диса жи мьн баԝәрийа хԝә Шәʹдед Йаһоԝа нәдьани.

 Сала 2012-да Шәʹдед Йаһоԝа кампанийа хьзмәтийейә мәхсус бона кәрʹ-лала организә кьрьн у ДВД видео бь наве, Һун Дьхԝазьн Рʹастийе Нас кьн? сәр зьмане кәрʹ-лалайи Һондураси, бепʹәрә бәла дькьрьн. Липсйайе әв видео нишани мә жи кьр. Чахе мьн әв видео ньһерʹи һʹьше мьн чу, чьмки мьн фәʹм кьр чь кӧ әз һин дьбум, мәсәлә дәрһәԛа щәʹньме йан жи рʹӧһʹе нәмьри, сәр һʹиме Кʹьтеба Пироз нибун.

 Һʹәфтийа дьн әз чум Ода Щьвата Шәʹдед Йаһоԝа, сәва кӧ тʹәви Томас хәбәр дьм. Мьн жерʹа гот ԝәки әз дьхԝазьм мәрьвед кәрʹ-лал рʹастийа Кʹьтеба Пироз һин кьм, ле нә ча Шәʹде Йаһоԝа. Нета мьн әԝ бу, ԝәки бона кәрʹ-лала хԝәрʹа дерәкә тʹәзә чекьм. Томас бона хирәта мьн пʹайе мьн да. Ле паше дина мьн да сәр Әфәси 4:5, кʹидәре те готьне, ԝәки нава Мәсиһийед рʹастда гәрәке йәкти һәбә.

 Томас ӧса жи видеокә сәр зьмане кәрʹ-лала да мьн, наве кʹижане бу, Шәʹдед Йаһоԝа-Баԝәрийа Сахләм, Пʹара 1: Дәркʹәтьна жь Тәʹрийе. Ве видеойеда те готьне, дәрһәԛа кʹомәкә мәрьва, йед кӧ Кʹьтеба Пироз кʹур леколин дькьрьн, сәва кӧ һинкьрьнед ԝе фәʹм бькьн. Чахе мьн әв видео ньһерʹи, мьн һәстед ԝан фәʹм кьр, чьмки мьн жи рʹасти дьгәрʹийа. Әве видеойе әз дамә баԝәркьрьне, ԝәки Шәʹдед Йаһоԝа рʹастийе һин дькьн, чьмки һинкьрьнед ԝан тʹәне сәр һʹиме Кʹьтеба Пироз ьн. Ләма мьн диса жи һинбуна Кʹьтеба Пироз дәстпекьр у сала 2014-да әз у Патрисйа һатьнә ньхӧмандьне у бунә Шәʹдед Йаһоԝа.

 Щьвата Шәʹдед Йаһоԝа мьн хԝәш те, чьмки әԝ тʹәмьз ә, чаԝа кӧ Хԝәде пироз ә. Хәбәрдан у кьред ԝан жи тʹәмьз ьн. Әԝана әʹдьлайиһʹьз ьн у һәв һелан дькьн. Һьм жи әԝана йәктийеда ньн. Кʹижан ԝәлати бьн, чь зьмани жи хәбәр дьн, һинкьрьнед ԝан йәк ьн.

 Гәләк мьн хԝәш те әԝ йәк, чь кӧ бь рʹасти Кʹьтеба Пироз дьбежә. Мәсәлә, әз пеһʹәсийам ԝәки Йаһоԝа Хԝәдайе Һьмзор ә сәр тʹәмамийа әʹрдерʹа. Әԝ һʹәму мәрьва һʹьз дькә, ӧса жи кәрʹ-лала. Әз һʹьзкьрьна Хԝәдейә һьндава хԝәда ԛимәт дькьм. Әз ӧса жи пеһʹәсийам ԝәки әʹрд ԝе бьбә щьнәт у әме һʹәта-һʹәтайе бь сьһʹәт-ԛәԝата тʹам ль сәр бьжин. Әз һʹьзрәта ԝе рʹоже мә, кӧ бьвиньм созед жь Кʹьтеба Пироз ча тенә сери!

 Әз у Патрисйа гәләк һʹьз дькьн тʹәви мәрьвед кәрʹ-лал дәрһәԛа Кʹьтеба Пироз хәбәр дьн. Ньһа әм һинбуна Кʹьтеба Пироз дәрбаз дькьн тʹәви се мәрьвед жь дера мәйә бәре. Чахе әз кʹәшиш бум, гәләк пьрсед мьн һәбун. Ле ньһа бь сайа һинбуна тʹәви Шәʹдед Йаһоԝа мьн щаба һʹәму пьрсед хԝә станд.