ဖဲပှၤလၢ နအဲၣ်ဘၣ်အီၤတဂၤ သံအခါ
ပှၤလၢနအဲၣ်ဘၣ်အီၤတဂၤ မ့ၢ်သံသဒၣ်ကွံာ်နၤန့ၣ် လၢနသးပူၤ နကတူၢ်ဘၣ်တၢ်အါမံၤလီၤ. အဒိ နကအိၣ်ဒီးတၢ်သူၣ်အုးသးအုး, တၢ်သယုၢ်သညိ ဒီးနတူၢ်ဘၣ်လၢ နမၤတၢ်တဘၣ် နီတမံၤလၢၤဘၣ်. ဘၣ်သ့ၣ်သ့ၣ် နကအိၣ်ဒီးတၢ်သူၣ်အ့န့သးအ့န့, နကတူၢ်ဘၣ်လၢနတၢ်ကမၣ်အိၣ် ဒီးနကပျံၤတၢ်ဖုးတၢ်လီၤ. အဃိ နကဆိကမိၣ်ဘၣ်လၢ မ့ၢ်ယတၢ်အိၣ်မူအံၤန့ၣ် အလုၢ်အပှ့ၤအိၣ်ဒံးဧါ.
သ့ၣ်ညါလၢ တၢ်သူၣ်အုးသးအုးလၢ နတူၢ်ဘၣ်တဖၣ်န့ၣ် တမ့ၢ်လၢနဂံၢ်စၢ်ဘါစၢ်အဃိဘၣ်. နသးအုးန့ၣ်မ့ၢ်လၢ နအဲၣ်ဘၣ် ပှၤတဂၤအံၤ ဒိၣ်မးအဃိလီၤ. ဘၣ်ဆၣ် နမ့ၢ်တူၢ်ဘၣ်တၢ်သူၣ်အုးသးအုးန့ၣ် မ့ၢ်နဃုထံၣ်န့ၢ် တၢ်မၤစၢၤကသ့ဧါ.
ပှၤတနီၤ လဲၤခီဖျိဝဲန့ၢ်ဒ်လဲၣ်
တၢ်လၢနတူၢ်ဘၣ်တဖၣ်န့ၣ် မ့ၢ်ဖျါလၢအလီၤမၢ်ကွံာ် တန့ၢ်လၢၤဘၣ်ဒၣ်လဲာ် နဃုထံၣ်န့ၢ်တၢ်ဟ့ၣ်ကူၣ်တနီၤလၢ အမၤမုာ်ထီၣ်က့ၤနသးသ့ဝဲလီၤ.
ဖဲနသူၣ်အုးသးအုးအခါ နလိၣ်ဘၣ်တၢ်ဆၢကတီၢ်
ပှၤတဂၤဒီးတဂၤလဲၤခီဖျိဘၣ် တၢ်သူၣ်အုးသးအုးန့ၣ် တဒ်သိးလိာ်အသးဘၣ်. အဃိ, နမ့ၢ်ဟီၣ်န့ၣ် ဘၣ်သ့ၣ်သ့ၣ်ကမၤစၢၤနၤလၢ နတၢ်တူၢ်ဘၣ် ကလီၤဖှံအဂီၢ်လီၤ. ဒ်ဘၢၤနဲစၤ တဲတ့ၢ်ဝဲအသိး “ယဟီၣ်လၢယသးဒီဖျၢၣ်ညါ, မ့ၢ်လၢယအဲၣ်ဒိးလၢယတၢ်တူၢ်ဘၣ်တဖၣ် ကလီၤမၢ်ကွံာ်ဝဲအဃိလီၤ.” ဒီး စိဖံယၤလၢ အဒ့မုၣ်သံသဒၣ်ကွံာ်အီၤ သတူၢ်ကလာ်တဂၤစ့ၢ်ကီး တဲဝဲလၢ “ယမ့ၢ်ဆိကမိၣ်ထီၣ်က့ၤတၢ်လၢ အကဲထီၣ်သးတဖၣ်န့ၣ် ယသးဘၣ်ဒိဒိၣ်မး, လီၤဂာ်ဒ်သိးတၢ်ပူၤလီၢ်တခါလၢ ပှၤအိးထီၣ်ဒီးမၤကဆှီထီၣ်န့ၢ်နၤလီၤ. ဒီးနကတူၢ်ဘၣ်အီၤဆါနးမး ဘၣ်ဆၣ် ကဲထီၣ်တၢ်မၤစၢၤလၢ တၢ်ပူၤလီၢ်န့ၣ် ကဘျါက့ၤဝဲအဂီၢ်လီၤ.”
တဲဖျါထီၣ်နတၢ်ဆိကမိၣ် ဒီးနတၢ်တူၢ်ဘၣ်တဖၣ်
တဘျီတခီၣ် နကအဲၣ်ဒိးအိၣ်ထဲတဂၤဧိၤန့ၣ် ပနၢ်ပၢၢ်နၤသ့လီၤ. သနာ်က့ ဖဲနတူၢ်ဘၣ် တၢ်သူၣ်အုးသးအုးအခါ လီၤဂာ်ဒ်သိး နဘၣ်ယိးတၢ်ဃၢဃၢတခါလၢ
နနီၢ်ကစၢ်န့ၣ်လီၤ. ကၠဲရဲၣ် လၢအသးအိၣ် ၁၇ နံၣ်န့ၣ်အပၢ်သံသဒၣ်ကွံာ်အီၤအဃိ အတဲဝဲဒ်အံၤ “ဖဲယတဲဖျါထီၣ်ယတၢ်တူၢ်ဘၣ်လၢ ပှၤဂၤအအိၣ်အခါ လီၤဂာ်ဒ်တၢ်လၢယတဲတဖၣ်န့ၣ် အခီပညီတအိၣ်ဘၣ်လီၤ. ဘၣ်ဆၣ် ယမ့ၢ်တဲဖျါထီၣ်ဘၣ် ယတၢ်တူၢ်ဘၣ်လၢပှၤဂၤအအိၣ်န့ၣ် ယသးဖှံထီၣ်တစဲးဖိလီၤ.” ဒီးမ့မ့ၢ် ကၠဲနံၣ်(စ်) လၢဘၣ်တၢ်ကွဲးဖျါထီၣ်တ့ၢ်အဂ့ၢ်လၢ အခီၣ်ထံးတဂၤန့ၣ် တဲဝဲလၢ “ယတဲဖျါထီၣ်ဘၣ် ယတၢ်တူၢ်ဘၣ်လၢပှၤဂၤအအိၣ်အဃိ ကဲထီၣ်တၢ်မၤစၢၤလၢယဂီၢ်ဖးဒိၣ်ညါ. ယတူၢ်ဘၣ်လၢ ပှၤနၢ်ပၢၢ်စၢၤယၤ အဃိ လီၤဂာ်လၢယတအိၣ်ထဲတဂၤဧိၤလၢၤဘၣ်.”တူၢ်လိာ် ပှၤဂၤအတၢ်မၤစၢၤ
ကသံၣ်သရၣ်တဂၤ တဲဝဲလၢ “ပှၤလၢအလဲၤခီဖျိဘၣ်တၢ်တဂၤန့ၣ် မ့ၢ်တူၢ်လိာ်ဝဲအတံၤသကိး ဒီးအဘူးအတံၢ်အတၢ်မၤစၢၤန့ၣ် ညီနုၢ်အဝဲသ့ၣ်လဲၤခီဖျိတၢ်န့ၢ် ဒီးအဂံၢ်အဘါက့ၤအိၣ်ထီၣ်ဝဲလီၤ.” ညီနုၢ်န့ၣ်နတံၤသကိးတဖၣ် အဲၣ်ဒိးမၤစၢၤနၤ ဘၣ်ဆၣ် အဝဲသ့ၣ်ကဘၣ်ဝဲမၤဒ်လဲၣ်န့ၣ် တသ့ၣ်ညါဘၣ်အဃိ ဒုးသ့ၣ်ညါအဝဲသ့ၣ်လၢ နတၢ်လိၣ်ဘၣ်တဖၣ်န့ၣ်တက့ၢ်.—ကတိၤဒိ ၁၇:၁၇.
သုးဘူးနသးဆူ ယွၤအအိၣ်
ထံနၤ တဲဝဲဒၣ်လၢ “ယဝၤန့ၣ် သံသဒၣ်ယၤလၢ ခဲစၢၣ်တၢ်ဆါ (cancer) သတူၢ်ကလာ်အဃိ ယတဲသကိးတၢ်ဒီးအီၤ ဘၣ်ဃးဒီးယတၢ်တူၢ်ဘၣ်ဒီး ယတၢ်ကီတၢ်ခဲတဖၣ်တသ့လၢၤဘၣ်. လၢတၢ်န့ၣ်အဃိ တၢ်လၢယတူၢ်ဘၣ်ကိးမံၤဒဲးန့ၣ် ယတဲဖျါထီၣ်လၢကစၢ်ယွၤလီၤ. ဒီးတနံၤဘၣ်တနံၤန့ၣ် ယဃ့တၢ်မၤစၢၤလၢ အအိၣ် ဒ်သိးယဆဲးတူၢ်တၢ်ကန့ၢ်အဂီၢ်လီၤ. ဒီးကစၢ်ယွၤ မၤစၢၤယၤလၢ ကျဲအါဘိ တုၤဒၣ်လဲာ် ယတဲဖျါထီၣ်အီၤမးတလၢာ်ဘၣ်.” မ့မ့ၢ် ထါၡၤ န့ၣ်ဖဲအအိၣ်ဝဲ ၂၂ နံၣ်အခါ အမိၢ်သံသဒၣ်အီၤအဃိ အတဲဝဲဒ်အံၤ “တၢ်ဖးလံာ်စီဆှံကိးနံၤဒဲးန့ၣ် မၤစၢၤယၤဒီးမၤမုာ်ထီၣ်က့ၤယသး တကးဒံးဘၣ် မၤစၢၤယၤ ဒ်သိးယကဆိကမိၣ် တၢ်လၢကဟ့ၣ်ဂံၢ်ဟ့ၣ်ဘါယၤတဖၣ်န့ၣ်လီၤ.”
ထံၣ်တမှံကွၢ် တၢ်ဂဲၤဆၢထၢၣ်သမူထီၣ်က့ၤ
ထံနၤ ဆဲးတဲဝဲလၢ “မ့ၢ်လၢယလီကီက့ၤယဝၤဒီး ယဖိခွါသၢဂၤစ့ၢ်ကီး လိၣ်ဘၣ်ဝဲအပၢ်အဃိ လၢအခီၣ်ထံးန့ၣ် ယဆိကမိၣ်တၢ်မုၢ်လၢ်လၢ ပှၤသံကဂဲၤဆၢထၢၣ်က့ၤန့ၣ် တမ့ၢ်ကမၤမုာ်ထီၣ်ယသးဘၣ်. ဘၣ်ဆၣ်ခဲအံၤန့ၣ် တၢ်ဆၢကတီၢ်လဲၤပူၤကွံာ်ဝဲ လွံၢ်နံၣ်လံ ဒီးတၢ်မုၢ်လၢ်တခါအံၤ ယဆိကမိၣ်ထီၣ်အီၤ ထီဘိလီၤ. ယသးစၢၢ်ဆၢတၢ်မုၢ်လၢ်လၢ ယကထံၣ်ဘၣ်က့ၤအီၤ လၢခါဆူညါအဃိ ကဲထီၣ်တၢ်သူၣ်မံသးမုာ် ဒီးတၢ်သးခုအါမးလၢယဂီၢ်လီၤ.”
ဖဲနလဲၤခီဖျိဘၣ် တၢ်သူၣ်အုးသးအုးအဆၢက တီၢ်န့ၣ် တမ့ၢ်လၢနသးကမုာ်ထီၣ် တဘျီဃီဘၣ်. ဘၣ်ဆၣ်သနာ် က့ ဘၢၤနဲစၤ အတၢ်လဲၤခီဖျိန့ၣ် မၤစၢၤနၤသ့ဝဲလီၤ. အတဲဝဲဒ်အံၤ “နဆိကမိၣ်လၢ နတၢ်တူၢ်ဘၣ်တဖၣ်အံၤ လီၤမၢ်ကွံာ်ဝဲတန့ၢ်လၢၤဘၣ် ဘၣ်ဆၣ်လၢခံ နလၢနတူၢ်ဘၣ်တဖၣ်အံၤ ကလီၤမၢ်ကွံာ်ဝဲ ကယီကယီန့ၣ်လီၤ.”
ဘၣ်သ့ၣ်သ့ၣ် နကသးသယုၢ်ဘၣ် ပှၤတဂၤထီဘိ ဒီးနကတူၢ်ဘၣ် တၢ်လီၤဟိတခါလၢ အလီၤမၢ်ဝဲတန့ၢ်နီတဘျီဘၣ်. ဘၣ်ဆၣ် သ့ၣ်နီၣ်ထီၣ်လၢ နတၢ်အိၣ်မူန့ၣ် အလုၢ်ဒိၣ်ပှ့ၤအိၣ်ဝဲ ဒီးနကြၢး ဆဲးအိၣ်မူဒံးဝဲလီၤ. ခီဖျိလၢ ကစၢ်ယွၤအတၢ်မၤစၢၤအဃိ နဆဲးအိၣ်ဒီး တံၤသကိးလၢအအဲၣ်နၤ ဒီးနတၢ်အိၣ်မူန့ၣ် ကပှဲၤဒီးအခီပညီလီၤ. တယံာ်လၢၤဘၣ်န့ၣ် ကစၢ်ယွၤ ကမၤဂဲၤဆၢထၢၣ်က့ၤ ပှၤသံတဖၣ်န့ၣ်လီၤ. ဖဲတၢ်ဂဲၤဆၢထၢၣ်သမူထီၣ်က့ၤအခါ ကစၢ်ယွၤအဲၣ်ဒိးထံၣ်လၢ နကဖိးဟုဘၣ်က့ၤ ပှၤလၢနအဲၣ်ဘၣ်အီၤတဖၣ် လၢအသီတဘျီလီၤ. ဖဲန့ၣ်အဆၢကတီၢ် တၢ်သူၣ်အုးသးအုးလၢ နတူၢ်ဘၣ်တဖၣ်န့ၣ် ကလီၤမၢ်ကွံာ်ဝဲလီၤထူလီၤယိာ်လီၤ.