ဒ်သိး​ပ​မၤ​လီၤမၢ်​ကွံာ် တၢ်​သးဟ့ က​န့ၢ်​အဂီၢ် ကစၢ်​ယွၤ​မၤစၢၤ​ပှၤ​သ့. ကစၢ်​ယွၤ အသး​စီဆှံ က​မၤစၢၤ​ပှၤလၢ ပ​ကအိၣ်​ဒီး သးစီဆှံ​အ​တၤသၣ်. ဒီး​ပ​မၤ​လီၤမၢ်​ကွံာ် တၢ်​သးဟ့​လၢ ပ​နီၢ်ကစၢ်​တ​သ့​ဘၣ်. အဃိ ပ​ကဘၣ်​သန့ၤ​ပသး​လၢ ကစၢ်​ယွၤ ဒီး​တူၢ်လိာ် အ​တၢ်​မၤစၢၤ. ပ​မ့ၢ်​မၤ​ဒ်န့ၣ်​န့ၣ် ပ​က​လီၤဂာ်​ဒီး တၢ်မၢဖိ​ပီလူး​လၢ အ​တဲဝဲ​လၢ “ယ​အိၣ်ဒီး တၢ်ဂံၢ်​တၢ်ဘါ​လၢ ယ​က​လဲၤ​ခီဖျိ​တၢ်​ခဲလၢာ် ခီဖျိ​ပှၤ​တဂၤ​လၢ အ​ဟ့ၣ်​ယၤ တၢ်စိ​က​မီၤ​န့ၣ်​အဃိ​လီၤ.” (ဖံလံးပံၤ ၄:၁၃) ဒီး​ပ​တဲ​သ့​လၢ “တၢ်​မၤစၢၤ​ယၤ​န့ၣ် ဟဲဝဲ​လၢ​ယွၤ” အ​အိၣ်​လီၤ.​—စံးထီၣ်​ပတြၢၤ ၁၂၁:၂.

ဃ့​ထုကဖၣ်​လၢ ယဟိဝၤ​ယွၤ​အ​အိၣ် ဒီး​ဃ့​အသး​စီဆှံ​တၢ်​မၤစၢၤ. (လူၤကၣ် ၁၁:၁၃) တကး​ဒံးဘၣ် ဃ့​ကစၢ်​ယွၤ အ​တၢ်​မၤစၢၤ​လၢ န​ကအိၣ်​ဒီး တၢ်​သူၣ်ဂ့ၤ​သးဝါ ဒ်သိး​ဒီး​အီၤ. ဒီး​န​မ့ၢ်​မၤလိ ဘၣ်ဃး​ဒီး တၢ်အဲၣ်​တၢ်ကွံ, တၢ်​သူၣ်မံ​သးမုာ်, တၢ်​ဝံသးစူၤ ဒီး​တၢ်​ပၢၤသူၣ်​ပၢၤသး​အဂ့ၢ်​န့ၣ် န​မၤ​လီၤမၢ်​ကွံာ် တၢ်​သးဟ့ လၢ​အ​အိၣ်​လၢ​န​သးပူၤ က​န့ၢ်ဝဲ. ဝံၤ​တၢ်​လၢ န​မၤလိ​ဘၣ်​အီၤ​တဖၣ်​န့ၣ် ဂုာ်ကျဲးစၢး အိၣ်မူ​မၤထွဲ​က့ၤ​လၢ န​တၢ်​အိၣ်မူ​အ​ပူၤ. တကး​ဒံးဘၣ် ရ့​ဒီး​ပှၤလၢ အ​အိၣ်ဒီး​တၢ်​သူၣ်ဂ့ၤ​သးဝါ ဒ်န့ၣ်​အသိး​သ့ၣ်​တဖၣ်. ဒီး​ပှၤ​ဒ်န့ၣ်​တဖၣ်​န့ၣ် ‘က​ထိၣ်ဟူး​ထိၣ်ဂဲၤ​ထီၣ်​နၤ လၢ​န​က​ပာ်ဖျါ​ထီၣ် တၢ်အဲၣ်​တၢ်ကွံ ဒီး​တၢ်မၤ​လၢ​အဂ့ၤ​တဖၣ်’ သ့ဝဲ​လီၤ.​—ဧ့ၤဘြံၤ ၁၀:၂၄.