ပှၤဖးလံာ်ဖိ အတၢ်သံကွၢ် . . .
ယဟိဝၤပှၤအုၣ်အသး ပိာ်မုၣ်တဖၣ်လၢ အစံၣ်တဲၤတဲလီၤတၢ်န့ၣ်အိၣ်ဧါ
လၢယဟိဝၤပှၤအုၣ်အသးတဖၣ် လၢဟီၣ်ခိၣ်ဒီဘ့ၣ်အကျါန့ၣ် ပိာ်မုၣ်လၢ အစံၣ်တဲၤတဲလီၤတၢ် အိၣ်လၢအကကွဲၢ်တဖၣ်လီၤ. ဒီးပိာ်မုၣ်တဖၣ်အံၤန့ၣ် စံၣ်တဲၤတဲလီၤဝဲ ယွၤအဘီအမုၢ် တၢ်သးခုကစီၣ်. ဘၣ်ဃးဒီး အဝဲသ့ၣ်န့ၣ် စံးထီၣ်ပတြၢၤ ၆၈:၁၁ တဲဆိပာ်စၢၤဝဲလၢ “ကစၢ်ဟ့ၣ်လီၤအကလုၢ်, ပိာ်မုၣ်လၢ အကတိၤသြီတၢ်ကစီၣ်န့ၣ် အိၣ်ဂီၢ်မုၢ်ဖးဒိၣ်လီၤ.”
ပိာ်မုၣ်တဖၣ်အံၤန့ၣ် လီၤဆီလိာ်အသးဒီး ပိာ်မုၣ်လၢ အကဲခိၣ်ကဲနၢ်လၢ တၢ်ဘူၣ်တၢ်ဘါအဂၤတဖၣ်အပူၤလီၤ. အဝဲသ့ၣ် လီၤဆီလိာ်အသး ဖးဒိၣ်ညါ. အလီၤဆီလိာ်သးလၢ ကျဲဒ်လဲၣ်တဖၣ်လဲၣ်.
ပှၤလၢအဝဲသ့ၣ် စံၣ်တဲၤတဲလီၤဝဲန့ၣ် လီၤဆီလိာ်အသး. ပိာ်မုၣ်လၢ အကဲခိၣ်ကဲနၢ်လၢ တၢ်ဘူၣ်တၢ်ဘါအပူၤ လီၤဆီဒၣ်တၢ် ပိာ်မုၣ်လၢ အကဲခိၣ်ကဲနၢ်လၢ ခရံာ်ဖိ တၢ်ဘူၣ်တၢ်ဘါသရိာ်တဖၣ်န့ၣ် အဝဲသ့ၣ် တီခိၣ်ရိၤမဲတၢ် လၢအတၢ်အိၣ်ဖှိၣ်အပူၤ ဒီးအဝဲသ့ၣ် စံၣ်တဲၤတဲလီၤဝဲ အပှၤကရၢဖိတဖၣ်လီၤ. မ့မ့ၢ် ယဟိဝၤပှၤအုၣ်အသး ပိာ်မုၣ်တဖၣ်န့ၣ် စံၣ်တဲၤတဲလီၤဝဲ ပှၤလၢအတမ့ၢ် ယဟိဝၤပှၤအုၣ်အသး အတၢ်အိၣ်ဖှိၣ်ဖိတဖၣ်လီၤ. အဝဲသ့ၣ် လဲၤစံၣ်တဲၤတဲလီၤတၢ်လၢ ပှၤအါဂၤအကျါ, တဟံၣ်ဘၣ်တဟံၣ် ဒီးတၢ်လီၢ်အဂၤတဖၣ်လီၤ.
ဒီးတၢ်လီၤဆီလိာ်သးလၢ အဂၤတခါန့ၣ် မ့ၢ်ဝဲ တၢ်အိၣ်ဖှိၣ်အတၢ်ဖံးတၢ်မၤ လၢအဝဲသ့ၣ် မၤဝဲန့ၣ် လီၤဆီလိာ်အသး. ပိာ်မုၣ်လၢ အကဲခိၣ်ကဲနၢ်လၢ ခရံာ်ဖိတၢ်ဘူၣ်တၢ်ဘါသရိာ် ဒီးသရိာ်အဂၤတဖၣ်န့ၣ် အဝဲသ့ၣ် တီခိၣ်ရိၤမဲတၢ် ဒီးသိၣ်လိဝဲ အပှၤကရၢဖိတဖၣ် ဒ်အဝဲသ့ၣ် အတၢ်ဘူၣ်တၢ်ဘါ အလုၢ်လၢ်အိၣ်ဝဲအသိး. မ့မ့ၢ် ယဟိဝၤပှၤအုၣ်အသး ပိာ်မုၣ်တဖၣ်န့ၣ် အဝဲသ့ၣ် တသိၣ်လိတၢ်လၢ တၢ်အိၣ်ဖှိၣ်အပူၤ ဖဲပိာ်ခွါလၢ အဒိးဘျၢထံဝံၤတဖၣ် အိၣ်ဝဲအခါဘၣ်. ထဲဒၣ်ပိာ်ခွါတဖၣ်န့ၣ် ဘၣ်တၢ်ဃုထၢထီၣ်အီၤလၢ ကသိၣ်လိတၢ် လၢတၢ်အိၣ်ဖှိၣ်ပူၤလီၤ.—၁ တံၤမသ့း ၃:၂; ယၤကိာ် ၃:၁.
လံာ်စီဆှံ ပာ်ဖျါထီၣ်ဝဲလၢ ပှၤလၢအဘၣ် တၢ်ဟ့ၣ်လီၤအီၤမူဒါ လၢကကွၢ်ထွဲတၢ်အိၣ်ဖှိၣ်န့ၣ် မ့ၢ်ထဲဒၣ် ပှၤပိာ်ခွါတဖၣ်လီၤ. ဖဲစီၤပီလူး ကွဲးလံာ်ဆူ စီၤတံတူးလၢ အမ့ၢ်ပှၤတီခိၣ်ရိၤမဲတၢ်တဂၤအအိၣ်အခါ အကွဲးဝဲလၢ “ယပာ်တ့ၢ်နၤလၢ ကီးကြ့တ့ၤ ဒ်သိးနက . . . ပာ်ထီၣ် တၢ်အိၣ်ဖှိၣ်သးပှၢ်” လီၤ. ဒီးအဆဲးတဲဝဲလၢ ပှၤပိာ်ခွါတဖၣ်အံၤန့ၣ် ကဘၣ်မ့ၢ် “ကဘၣ်မ့ၢ်ပိာ်ခွါလၢ တၢ်ပာ်ဒ့ၣ်ပာ်ကမၣ်အီၤအလီၢ် တအိၣ်ဘၣ်” လီၤ. (တံတူး ၁:၅, ၆, NWT) ဒီးဖဲစီၤပီလူး ကွဲးလံာ်ဆူ စီၤတံၤမသ့းအအိၣ်အခါစ့ၢ်ကီး အကွဲးဝဲဒ်န့ၣ်လီၤ. အကွဲးဝဲလၢ “ပှၤတဂၤဂၤ မ့ၢ်ဆၢကဲထီၣ်လၢ ပှၤကွၢ်တၢ်ဒီး, မ့ၢ်အဆၢတၢ်မၤ လၢအဂ့ၤတမံၤလီၤ. မၤသးဒ်န့ၣ်ဒီး ပှၤကွၢ်တၢ်န့ၣ်ဘၣ်မ့ၢ်ပှၤလၢ တၢ်ပာ်တၢ်ကမၣ်လၢအလိၤ အလီၢ်တအိၣ်ဘၣ်, ပှၤအိၣ်ဒီးအမါတဂၤဧိၤ, . . . ပှၤသိၣ်လိ တၢ်သ့လီၤ.”—၁ တံၤမသ့း ၃:၁, ၂.
မူဒါလၢ ပှၤကဘၣ်ကွၢ်ထွဲတၢ်အိၣ်ဖှိၣ်န့ၣ် ဘၣ်မနုၤအဃိ ဘၣ်တၢ်ဟ့ၣ်လီၤအီၤထဲလၢ ပိာ်ခွါတဖၣ်လဲၣ်. စီၤပီလူး တဲဝဲလၢ “ပိာ်မုၣ်သိၣ်လိနဲၣ်လိတၢ်မ့ၢ်ဂ့ၤ, ပာ်ဒိၣ်အသးလၢ ပိာ်ခွါအဖိခိၣ်မ့ၢ်ဂ့ၤ, ယတဟ့ၣ်မၤဘၣ်ယဲဘၣ်, မ့မ့ၢ်လၢ အကအိၣ်ဘှီၣ်လီၤ. အဂ့ၢ်ဒ်အံၤ, တၢ်တ့လီၤဆိစီၤအၤဒၣ်, ဒီးတ့က့ၤနီၢ်အံၣ်အုလၢခံလီၤ.” (၁ တံၤမသ့း ၂:၁၂, ၁၃) ကစၢ်ယွၤတ့လီၤတၢ် တဆီဘၣ်တဆီ ဒ်အံၤန့ၣ် ပာ်ဖျါထီၣ်ဝဲလၢ ဘၣ်ဃးဒီး တၢ်သိၣ်လိဒီး တၢ်တီခိၣ်ရိၤမဲတၢ်န့ၣ် ကစၢ်ယွၤ အတၢ်ရဲၣ်တၢ်ကျဲၤ အိၣ်ဝဲဒ်လဲၣ်လီၤ.
ယဟိဝၤယွၤ အခ့အပှၤတဖၣ်န့ၣ် အမၤပိာ်ထွဲဝဲဒ် အဝဲသ့ၣ်အခိၣ်အနၢ် ယ့ၣ်ၡူးခရံာ်အသိး. ယ့ၣ်ၡူးခရံာ် အပျဲၢ်အဘီၣ် စီၤလူၤကၣ် ကွဲးဝဲလၢ ယ့ၣ်ၡူး “လဲၤစံၣ်တဲၤတဲလီၤ ယွၤအဘီအမုၢ် အတၢ်သးခုအကစီၣ် လၢဝ့ၢ်ပူၤဒီးလၢသဝီပူၤ, တပူၤဘၣ်တပူၤကွ့ၢ်ကွ့ၢ်” လီၤ. ဒီးလၢခံန့ၣ် ယ့ၣ်ၡူးမၢ အပျဲၢ်အဘီၣ်တဖၣ် ဟးစံၣ်တဲၤတဲလီၤတၢ်အဃိ အပျဲၢ်အဘီၣ်တဖၣ် “ဟးထီၣ်ဒီး လဲၤခီဂာ်ဒူသဝီကိးဖျၢၣ်ဒဲး, ဒီး . . . စံၣ်တဲၤတဲလီၤတၢ်သးခုအကစီၣ်” လီၤ.—လူၤကၣ် ၈:၁; ၉:၂-၆.
မုၢ်မဆါတနံၤအံၤ ပိာ်မုၣ်မ့ၢ်ဂ့ၤ ပိာ်ခွါမ့ၢ်ဂ့ၤလၢ အကဲယဟိဝၤပှၤအုၣ်အသးတဖၣ်န့ၣ် လၢတၢ်သူၣ်ဆူၣ်သးဆူၣ်အပူၤ အဝဲသ့ၣ် မၤဝဲတၢ်လၢ ယ့ၣ်ၡူးတဲဆိပာ်ဝဲ. ယ့ၣ်ၡူးတဲဆိပာ်ဝဲလၢ “ဘီမုၢ်အတၢ်သးခုအကစီၣ်အံၤ, ကဘၣ်တၢ်စံၣ်တဲၤတဲလီၤအီၤလၢ ဟီၣ်ခိၣ်ဒီဘ့ၣ်ညါ, လၢတၢ်အုၣ်အသးလၢ ပှၤကလုာ်ခဲလၢာ်အဂီၢ်လီၤ. တုၤနုၤတစု တၢ်အကတၢၢ်န့ၣ် ကဟဲဘၣ်ဝဲလီၤ.”—မးသဲ ၂၄:၁၄.
You May Also Like
တၢ်သံကွၢ်လၢ ညီနုၢ်ပှၤသံကွၢ်တဖၣ်
ယဟိဝၤပှၤအုၣ်အသးတဖၣ် အိၣ်ဒီးပိာ်မုၣ်လၢ အစံၣ်တဲၤတဲလီၤတၢ်ဧါ
ဟီၣ်ခိၣ်ဒီဘ့ၣ် တၢ်သးခုကစီၣ်တၢ်မၤလၢ ယဟိဝၤပှၤအုၣ်အသးတဖၣ်မၤဝဲန့ၣ် ပိာ်မုၣ်တဖၣ်ပာ်ဃုာ်လၢ သနၢၢ်မနုၤလဲၣ်.
