တၢ်မၤလိ ၂
ကစၢ်ယွၤမ့ၢ် မတၤလဲၣ်
၁. ဘၣ်မနုၤအဃိ ပကြၢးဘူၣ်ထီၣ်ဘါထီၣ်ယွၤလဲၣ်.
ယွၤအမ့ၢ်အတီန့ၣ် မ့ၢ်ကစၢ်လၢ အတ့လီၤတၢ်ခဲလၢာ်လီၤ. ကစၢ်န့ၣ်အခီၣ်ထံး တအိၣ်ဒီးအကတၢၢ်တအိၣ်ဘၣ်. (စံးထီၣ်ပတြၢၤ ၉၀:၂) ကစၢ်မ့ၢ်ပှၤလၢ အဒုးအိၣ်ထီၣ်ဝဲ တၢ်သးခုကစီၣ်လၢ ပထံၣ်ဘၣ်အီၤဖဲ လံာ်စီဆှံပူၤလီၤ. (၁ တံၤမသ့း ၁:၁၁) မ့ၢ်လၢယွၤဟ့ၣ်ပှၤသးသမူအဃိ ပကြၢးဘူၣ်ထီၣ်ဘါထီၣ်ထဲ ကစၢ်တဂၤဧိၤလီၤ.—ဖး လီၣ်ဖျါ ၄:၁၁ တက့ၢ်.
၂. ယွၤမ့ၢ် ကစၢ်ဒ်လဲၣ်တဂၤလဲၣ်.
ယွၤမ့ၢ်ပှၤနီၢ်သးအဃိ ပှၤဟီၣ်ခိၣ်ဖိတထံၣ်ဘၣ်အီၤ နီတဂၤဘၣ်. တၢ်လၢပှၤနီၢ်သးန့ၣ် အတၢ်အိၣ်မူအပတီၢ်ထီန့ၢ်ဒံး တၢ်ဘၣ်တ့လၢ ဟီၣ်ခိၣ်ချၢတဖၣ်လီၤ. (ယိၤဟၣ် ၁:၁၈; စံးထီၣ်ပတြၢၤ ၁၁:၄) ဘၣ်ဆၣ်သနာ်က့ ပထံၣ်သ့ၣ်ညါဘၣ် ယွၤအတၢ်ဂ့ၤတၢ်ဝါသ့ ခီဖျိလၢအတၢ်ဘၣ်တ့တဖၣ်န့ၣ်လီၤ. အဒိ တၤသူတၤသၣ် ဒီးဖီအကလုာ်ကလုာ်န့ၣ် ပာ်ဖျါထီၣ်န့ၢ်ပှၤလၢ ကစၢ်အတၢ်အဲၣ်ဒီး အတၢ်ကူၣ်သ့လီၤ. မူဟီၣ်ကယၢလၢ အဒိၣ်အလဲၢ်အံၤ ပာ်ဖျါထီၣ်န့ၢ်ပှၤ ကစၢ်အတၢ်စိတၢ်ကမီၤလီၤ.—ဖး ရိမ့ၤ ၁:၂၀ တက့ၢ်.
ပမ့ၢ်ဖးလံာ်စီဆှံန့ၣ် ပကသ့ၣ်ညါအါထီၣ်ကစၢ်ယွၤ အတၢ်ဂ့ၤတၢ်ဝါတဖၣ်န့ၣ်လီၤ. အဒိ လံာ်စီဆှံတဲဘၣ်ပှၤ တၢ်လၢကစၢ်ယွၤဘၣ်အသးတဖၣ် ဒီးတဘၣ်အသးတဖၣ်, ကစၢ်ရ့ဒီးပှၤကညီတဖၣ်ဒ်လဲၣ်အဂ့ၢ်, ဒီးဖဲကစၢ်ထံၣ်ဘၣ်ဝဲတၢ်အိၣ်အသး အကလုာ်ကလုာ်အခါ ကစၢ်မၤတ့ၢ်ဝဲဒ်လဲၣ်အဂ့ၢ်လီၤ.—ဖး စံးထီၣ်ပတြၢၤ ၁၀၃:၇-၁၀.
၃. ကစၢ်ယွၤန့ၣ် အမံၤအိၣ်ဧါ.
ယ့ၣ်ၡူးစံးဝဲလၢ “အိၣ်လၢမူခိၣ်ပပၢ်ဧၢ, မ်နမံၤဘၣ်တၢ်ပာ်စီဆှံတက့ၢ်. (မးသဲ ၆:၉) ယွၤအိၣ်ဒီးမံၤလၤသၣ်ကပီၤ အါမးသနာ်က့ ကစၢ်အမံၤနီၢ်နီၢ် အိၣ်ဝဲစ့ၢ်ကီးလီၤ. ပှၤကလုာ်ဒူၣ်တဒူၣ်စုာ်စုာ်န့ၣ် ဖးသီၣ်ဝဲကစၢ်ယွၤအမံၤအံၤ လီၤဆီလိာ်သးလီၤ. လၢကညီကျိာ်န့ၣ် ဘၣ်တၢ်ဖးသီၣ်အီၤလၢ “ယဟိဝၤ” လီၤ.—ဖး စံးထီၣ်ပတြၢၤ ၈၃:၁၈ တက့ၢ်.
လံာ်စီဆှံအါမးအပူၤ ယွၤအမံၤ ဘၣ်တၢ်ထုးထီၣ်ကွံာ်အီၤ ဒီးဘၣ်တၢ်ကွဲးက့ၤအီၤလၢ မံၤလၤသၣ်ကပီၤလၢ အမ့ၢ်ကစၢ် မ့တမ့ၢ် ကစၢ်ယွၤလီၤ. ဘၣ်ဆၣ်ဖဲ လံာ်စီဆှံ ဘၣ်တၢ်ကွဲးအီၤ အဆိကတၢၢ်အခါန့ၣ် ယွၤအမံၤပၣ်ဝဲအဘျီ ၇,၀၀၀ ဃၣ်ဃၣ်လီၤ. ယ့ၣ်ၡူးဒုးသ့ၣ်ညါ ပှၤဂၤတဖၣ်လၢ ယွၤအမံၤဖဲ အဝဲသိၣ်လိဝဲ ယွၤအဂ့ၢ်အခါလီၤ.—ဖး ယိၤဟၣ် ၁၇:၂၆ တက့ၢ်.
ကွၢ်တၢ်ဂီၤမူလၢအမ့ၢ် ကစၢ်ယွၤန့ၣ် အမံၤအိၣ်ဧါ
၄. မ့ၢ်ယဟိဝၤယွၤ သူၣ်အိၣ်သးအိၣ်ပှၤသပှၢ်ကတၢၢ်ဧါ.
တၢ်နးတၢ်ဖှီၣ် အိၣ်အါထဲအံၤန့ၣ် အဲၣ်ဒိးစံးဝဲလၢ ယဟိဝၤယွၤမ့ၢ်ယွၤလၢ အသးတအိၣ်ပှၤဟီၣ်ခိၣ်ဖိဘၣ်ဧါ. ပှၤတနီၤနီၤစံးဝဲလၢ ကစၢ်ယွၤဒုးအိၣ်ထီၣ်ဝဲ တၢ်နးတၢ်ဖှီၣ်လၢ ကမၤကွၢ်ပှၤအဂီၢ်လီၤ. ဘၣ်ဆၣ် နီၢ်နီၢ် တမ့ၢ်ဒ်န့ၣ်ဘၣ်.—ဖး ယၤကိာ် ၁:၁၃ တက့ၢ်.
ကစၢ်ယွၤ ဟ့ၣ်ပှၤတၢ်ခွဲးတၢ်ယာ်လၢ ပကမၤတၢ်လၢ တၢ်သဘျ့အပူၤလီၤ. ကစၢ်ယွၤဟ့ၣ်အခွဲးလၢပဝဲတဂၤစုာ်စုာ် ပကဆၢတဲာ်ပသးလၢ ပကဘူၣ်ထီၣ်ဘါထီၣ်အီၤလီၤ. လၢတၢ်န့ၣ်အဃိ ပကြၢးစံးဘျုးစံးဖှိၣ်ကစၢ်ယွၤလီၤ. (ယိၤၡူ ၂၄:၁၅) ဘၣ်ဆၣ် ပှၤအါဂၤဃုထၢဝဲလၢ ကမၤတၢ်အၢတၢ်သီအဃိ တၢ်နးတၢ်ဖှီၣ်တဖၣ်အါထီၣ်ဝဲလီၤ. မ့ၢ်လၢယဟိဝၤယွၤထံၣ်ဘၣ်ဝဲ တၢ်သ့ၣ်တဖၣ်အံၤအဃိ အသးအုးဝဲလီၤ.—ဖး စံးထီၣ်ပတြၢၤ ၇၈:၄၀, ၄၁ တက့ၢ်.
ယဟိဝၤမ့ၢ်ယွၤလၢ အသးအိၣ်ပှၤလီၤ. ကစၢ်အဲၣ်ဒိးလၢ ပတၢ်အိၣ်မူကပှဲၤဒီးတၢ်သူၣ်ဖှံသးညီလီၤ. တယံာ်လၢၤဘၣ်ဒီး ကစၢ်ကမၤဟါမၢ်ကွံာ် တၢ်နးတၢ်ဖှီၣ် ဒီးပှၤလၢအဒုးအိၣ်ထီၣ်ဝဲတၢ်သ့ၣ်တဖၣ်အံၤလီၤ. ဘၣ်ဆၣ် တချုးလၢကစၢ်မၤဝဲဒ်န့ၣ်အခါ အဝဲအိၣ်ဒီး တၢ်ဂ့ၢ်အဂ့ၤလၢ ကပျဲဝဲတၢ်နးတၢ်ဖှီၣ်အခွဲး တစိၢ်တလီၢ်န့ၣ်လီၤ. ပကသ့ၣ်ညါဘၣ် တၢ်ဂ့ၢ်အံၤလၢတၢ်မၤလိ ၈ အပူၤလီၤ.—ဖး ၂ ပ့းတရူး ၂:၉; ၃:၇, ၁၃ တက့ၢ်.
၅. ပသုးဘူးပသးဆူယွၤအအိၣ် ကသ့ဒ်လဲၣ်.
ယဟိဝၤယွၤကွဲမုာ်ပှၤလၢ ပကသုးဘူးပသးဆူအအိၣ် ခီဖျိပကတိၤတၢ်ဒီးအီၤလၢ တၢ်ထုကဖၣ်လီၤ. ကစၢ်သးအိၣ်ပှၤတဂၤစုာ်စုာ်လီၤ. (စံးထီၣ်ပတြၢၤ ၆၅:၂; ၁၄၅:၁၈) ကစၢ်သးအိၣ် ပျၢ်ပတၢ်ကမၣ်လီၤ. တဘျီတခီၣ် ပမ့ၢ်မၤဘၣ်တၢ်ကမၣ်သနာ်က့ ကစၢ်သ့ၣ်ညါဝဲလၢ ပဂုာ်ကျဲးစၢးမၤအတၢ်ဘၣ်အသးန့ၣ်လီၤ. လၢတၢ်န့ၣ်အဃိ ပတလၢတပှဲၤသနာ်က့ ပအိၣ်ဒီးတၢ်ရ့လိာ်သး ဒီးယွၤဘူးဘူးတံၢ်တံၢ်သ့ဝဲလီၤ.—ဖး စံးထီၣ်ပတြၢၤ ၁၀၃:၁၂-၁၄; ယၤကိာ် ၄:၈ တက့ၢ်.
ယဟိဝၤယွၤဟ့ၣ်ပှၤ သးသမူအဃိ ပကြၢးအဲၣ်အီၤအါန့ၢ်ဒံး ပအဲၣ်ပှၤဂၤလီၤ. (မၢ်ကူး ၁၂:၃၀) နပာ်ဖျါထီၣ် နတၢ်အဲၣ်ယွၤခီဖျိ နမၤလိအါထီၣ်ကစၢ်အဂ့ၢ် ဒီးမၤဒ် ကစၢ်အတၢ်ဘၣ်အသးအသိးန့ၣ်လီၤ. နမ့ၢ်မၤဒ်န့ၣ်ဒီး နကဘူးထီၣ်ဒီးအီၤလီၤ.—ဖး ၁ တံၤမသ့း ၂:၄; ၁ ယိၤဟၣ် ၅:၃.