AKAKA BEVOVANGA VO VE. Dotolo dimosi watezanesa o muntu olandanga malongi ma Nkand’a Nzambi yo muntu osadilanga nkand’a mawuku wavaikiswa mu mvu wa 1920 mu longa wan’a kalasi o unu. Awana balembi zitisanga Nkand’a Nzambi balenda kuyuvula kana vo olenda sadila nkanda wankulu usasilanga oma ma komputadore mu sadila e komputadore zivaikiswanga mu lumbu yeto. Muna mvovo miankaka, ayingi bebadikilanga Nkand’a Nzambi vo waviokela e ntangwa.

Wau vo umbangu wa nza mu wokela kaka wina mu lumbu yeto, ekuma o muntu kafwete vavila luludiku muna nkanda wankulu? O unu, nzila zayingi za Internete zitwikanga vana vau e nsangu mu kuma kia lekwa yampa ivaikisu ye tuludiku twa mpila mu mpila. Programa za televizau zimwanganesanga e nsangu mu kuma kia akwa tunda ye mana akwa ngangu besololanga. Nkanda miayingi mivaikiswanga mu longa o wantu mambu ma mpila mu mpila. O wantu befwasanga nzimbu zayingi mu sumba e nkanda miami.

Wau vo vena ye ulolo wa nkanda miampa mivaikiswanga konso ntangwa, ekuma o muntu kafwete vavila luludiku muna Nkand’a Nzambi wafokolwa o sonekwa se vioka 2.000 ma mvu? Nga ndungidi bena yau akwa ngangu za nza ana bevovanga vo o vava luludiku muna nkanda wankulu dina nze muntu osadilanga nkanda wankulu uvovelanga oma ma mawuku yovo komputadore? E mvovo miami ke mialudi ko. E ngangu ye umbangu wa nza mu soba kaka wina, kansi nga e nsatu za wantu mpe mu soba zina? Kasikil’owu, o wantu bakinu vava zaya e nsas’a zingu ye una balenda sololwela kiese kiasikila, luvuvamu, zingu kiambote kia esi nzo ye akundi ambote.

Kana una vo wankulu, Nkand’a Nzambi usonganga una wantu balenda lungisila e nsatu zazi ye zankaka. Usonganga mpe vo kwa Nzambi wa Mvangi eto watuka. Uvananga malongi muna mambu mawonso matadidi zingu kia wantu yo kutusadisa mu singika konso diambu tulenda nuana diau. (2 Timoteo 3:16, 17) Vana ntandu, e malongi ye nkanikinu mina mo ke miviokelanga ntangwa ko. Nkand’a Nzambi uvovanga vo: “E diambu dia Nzambi diamoyo.”—Ayibere 4:12.

Nga mana masonama muna Nkand’a Nzambi maludi kikilu? Nga maviokela e ntangwa? Nga Nkand’a Nzambi wakinu o mfunu mu lumbu yeto? E kani dia Eyingidilu diadi dia espesiale ye dina dilanda i mu kusadisa wasolola e mvutu za yuvu yayi.