Tuka kileke kiame yayangalelanga o tala o nsema. Twayendanga kuna mfinda ye kuna kwa kala mayanga mambote-mbote mazunganga mbanza eto ya Jyväskylä, kuna Finlândia. Bulu mpe yazolanga, vava yakala mwan’akete yalelanga konso niau yovo mbwa yamonanga. Vava yakolanga, yafunganga makasi mu mona e mpila ina wantu babangikilanga e bulu. Kuna kwalanda, yakota mu buka kia wantu betanimanga wete dia bulu.

Twasalanga kwayingi muna tanina o zitu wa bulu. Twakubikanga buka ya wantu muna vaika mu mpambu za nzila yo tumba evangu dia teka e nkanda mia bulu yo sadila e bulu muna laboratório muna teza e longo mivangwanga. Twavanga mpe nkubika yampa muna tanina e bulu. Wau vo twakomekenanga ayadi mu lungisa mana twavavanga, twakituka se atantu a luyalu. Nkumbu miayingi yasiwanga muna pelezo yo natwa kuna mbazi a nkanu.

Katula ediadi, yatokananga mpe mu kuma kia mambu makaka mambi mevangamanga mu nza yawonso. Kuna kwalanda, yayikotesa mpe mu buka yakaka kumosi ye buka kia Anistia Internacional kitalanga oma ma wantu. Yasia e sungididi kiame kiawonso mu yikama e salu yayi. Yasalanga muna wete dia asukami, ana befwanga nzala ye awana bemonanga e mpasi.

I bosi, yabakula vo kilendi soba e nza ko. Kana una vo muna buka yayina twasingikanga mambu makaka mabwanga, kansi mambu mampwena ka twalendanga mo singika ko. Yamona vo e mbi yawokelanga, kansi ke vakala muntu ko watokanenanga e mbi yayi. Yayoya vana vau.

Vava yamona vo kiakala yo nkuma wafokola mpasi za wantu ko, yakendalala yo yantika yindula Nzambi yo Nkand’andi. Muna mvu miavioka, yalongokanga Nkand’a Nzambi ye Mbangi za Yave. Kana una vo Mbangi za Yave bansonganga e ngemba yo kumvwa mfunu, kiasoba e mpila zingu kiame ko. Kansi owau, yasoba ngindu zame.

Yayantika diaka tanga o Nkand’a Nzambi. Ediadi diatoma kungiangidika. Yatanga sono yayingi isonganga una tufwete lunga-lunga e bulu. Muna bonga e nona, e sono kia Ngana 12:10 kivovanga vo: ‘O nsongi olunga-lunganga moyo a bulu kiandi.’ Yabakula mpe vo ke Nzambi ko twasanga e mpasi mu nza. E mpasi ziwokelanga kadi ndonga ke belemvokelanga nsiku mia Nzambi ko. Yayangalala kikilu vava yalongoka vo Yave Nzambi a zola yo luzindalalu.—Nkunga 103:8-14.

Muna kolo kiakina, yalomba kuna vula dia Mbangi za Yave bantwikila nkanda, O Nkand’a Nzambi Adieyi Kieleka Kelonganga? Ke kolo ko, yakala dimosi yo nkento andi bena vo Mbangi za Yave badodela kielo kiame yo kumpana elau dia longoka Nkand’a Nzambi, yatambulwila vana vau. Yayantika mpe kwenda kuna tukutakanu tw’Akristu mun’Eseka dia Kintinu. Muna kuma kiaki, e ludi kia Nkand’a Nzambi kiayantika kota mu ntim’ame.

Muna lusadisu lwa Nkand’a Nzambi yasoba mpila zingu kiame. Yayambula nua fomo, kolwa malavu, yasoba e mpila vwatila ye yavovela. Yasoba ngindu zame mu kuma kia ayadi. (Roma 13:1) Yayambula mpe mavangu mawonso mambi.

E diambu diasunda e mpasi kwa mono, i vaika muna buka yitaninanga ewete dia wantu ye bulu. Yayindulanga vo avo ngyambwidi e nkubika zazi ibadikilwa vo nyekodi. Yayangalala mu zaya vo e Kintinu kia Nzambi i kiau kaka kisingika mambu mu nza yayi. Yabaka nzengo za yikama Kintinu yo sadisa wantu kimana bazaya oma ma Kintinu kiaki.—Matai 6:33.

Vava vo yakala muna buka itaninanga ewete dia wantu ye bulu, yavambulanga wantu mu buka yole, wantu ambote ye ambi, yanwanisanga ana yabadikilanga vo wantu ambi. Kansi, muna lusadisu lwa Nkand’a Nzambi, kimenganga diaka wantu ko. Yasia ngolo muna songa zola kwa Kikristu kwa wantu a mpila zawonso. (Matai 5:44) Isonganga zola kwaku musungula muna samuna e nsangu zambote za Kintinu kia Nzambi. Kiese kiayingi dikumpananga mu mona una salu kiaki kiwokeselanga luvuvamu, kiese yo vana e vuvu kia kieleka kwa wantu.

O wau ngina yo luvuvamu lwa ntima mu yambula mambu vana moko ma Yave. Wau vo yandi i Mvangi, ngina ye ziku vo ke yambula ko vo wantu ye bulu babangikwa yakwele mvu ngatu yambula vo ntoto wafwaswa. Kansi, osadila Kintinu kiandi mu sukisa e mbi yawonso bevanganga o wantu. (Yesaya 11:1-9) Kimonanga kaka kiese ko wau vo yazaya e ludi, kansi ngina mpe ye kiese kiasadisa akaka bakwikila muna ludi kia Nkand’a Nzambi. Kiyindulanga diaka ko vo ndenda soba e nza.