Akundi bemokenanga ntangwa zawonso, diakala mu telefone, twikana mensagem, mu video yovo soneka nkanda. Ozevo, muna finama Nzambi, tufwete mpe mokenanga yandi ntangwa zawonso. Aweyi tulenda wo vangila?

Tulenda mokena yo Yave muna sambu. Kansi, o mokena yo Nzambi ke dina nze mokena yo muntu ko. Vava tusambanga, tufwete zaya vo Mvangi wa Mpungu-ngolo tumokenanga yandi. Ediadi dikutufila mu samba kuna zitu yo vumi. Vena ye nkanikinu tufwete lungisa kimana e sambu yeto yawakana kwa Nzambi. Tubadika nkanikinu tatu.

Wantete, tufwete samba kaka kwa Yave wa Nzambi ke kwa Yesu ko, “asantu” yovo teke. (Luvaiku 20:4, 5) Bibila kitoma kiesesanga vo: “Muna mambu mawonso, muna sambu yo ludodokelo yo matondo, e ndomba zeno, mbula zazayiswa kwa Nzambi.” (Filipi 4:6) Wanzole, tufwete samba muna nkumbu a Yesu Kristu wa Mwan’a Nzambi. Yesu wavova vo: “Ke vena on’okwiza kwa Se ko, ovo ke mu mono ko.” (Yoane 14:6) Wantatu, e sambu yeto ifwete kala ngwizani yo luzolo lwa Nzambi. Bibila kivovanga vo: ‘Konso diambu tulomba mun’owu wa luzolo luandi, wa kekutuwá.’ *​—1 Yoane 5:14.

Dialudi, e kikundi ke kilendi zingila ko avo muntu mosi kaka ovovanga. Nze una akundi bemokenenanga, tufwete yambula vo Nzambi kavovana yeto yo kunwila. Nga ozeye una Nzambi kekutuvoveselanga?

O unu, Yave wa Nzambi osadilanga Bibila muna “mokena” yeto. (2 Timoteo 3:16, 17) Ekuma tuvovele wo? Muna bong’e nona, yindula vo otambwidi nkanda utukidi kwa nkundi aku anzolwa. Vava otanga wo, nanga okala ye kiese kia zayisa ankaka vo: “Nguidi nsangu za nkundi ame!” Kansi kamokene yaku mantalani ko, mu nkanda kavovesele. Diau dimosi mpe, vava otanganga Bibila oyambulanga vo Yave kamokena yaku. Gina ona oyikilu muna longi diantete wavova vo: “Avo nzolele vo Nzambi kakala nkundi ame, mfwete fimpa o ‘nkanda’ katusonekena, i sia vo Bibila. O tanga Bibila lumbu yawonso, dikunsadisanga mu finama Nzambi.” Nga oyambulanga vo Yave kamokena yaku lumbu yawonso muna tanganga Bibila kina vo i Diambu diandi? Avo ovangidi wo, dikusadisa mu finama Nzambi.