Zasoneka Yoane 4:1-54
4 O Mfumu vava kazeye wo vo Afarisi bawidi wo vo Yesu oviokele Yoane muna kitula wantu se alongoki yo kubavuba+—
2 kana una vo Yesu yandi kibeni kavubidinge ko, kansi alongoki andi kaka—
3 okatukidi kuna Yuda, ovutukidi kuna Ngalili.
4 Kansi diavavanga vo kaviokela muna Samaria.
5 Olweke kuna Sika, e mbanz’a Samaria, dina lukufi yo ntoto una Yakobo kavana kwa mwan’andi Yosefe.+
6 I vana vakala e sima kia Yakobo.+ O Yesu vava kamwene mabibi ma diata, ovuende vana sima. Se tezo kia ola yasambanu.*
7 O nkento wa musi Samaria wizidi teka o maza. Yesu umvovese vo: “Umpana maza yanua.”
8 (Kadi alongoki andi ku mbanza bayenda mu sumba madia.)
9 O nkento wa musi Samaria umvovese vo: “Ongeye u Nyuda, aweyi olombele maza kwa mono nkento wa musi Samaria?” (Kadi Ayuda y’esi Samaria ke bewizananga ko.)+
10 O Yesu umvutwidi vo: “Kele vo wazaya o lukau lwangovo lwa Nzambi+ ye ona uvovese vo: ‘Umpana o maza yanua,’ nga unlombele, oyandi wadi kuvana o maza mamoyo.”+
11 O nkento umvovese vo: “E Mfumu, kuna ye lekwa kiatekela maza ko, e sima kiakobama. Ozevo, akweyi metuka o maza mama mamoyo?
12 Nga osundidi se dieto Yakobo, ona watuvana e sima, oyandi wanuina kio yo wan’andi ye twelezi yandi e?”
13 O Yesu umvutwidi vo: “Konso ona onua maza mama vuina diaka kemona.
14 Kansi ndiona onua maza mana ikumvana, ke mona diaka vuina ko yakwele mvu,+ o maza mana ikumvana, mekituka se sima kia maza mefusukilanga muna yandi yo kumvana moyo a mvu ya mvu.”+
15 O nkento umvovese vo: “E Mfumu, umpana o maza momo, kimana yalembi mona diaka e vuina, ngatu ngizanga kaka okwaku yateka maza.”
16 Yesu umvovese vo: “Wenda, bokela o nkaz’aku, nuiza.”
17 O nkento umvutwidi vo: “Kina ye yakala ko.” O Yesu umvovese vo: “Olungidi kwaku wau ovovele vo: ‘Kina ye yakala ko.’
18 Kadi akazi tanu wakala yau, ndioyu una yandi owau, ke nkaz’aku ko. Ediadi diakieleka ovovele.”
19 O nkento umvovese vo: “E Mfumu, mbwene vo u ngunza.+
20 O mase meto ova mongo wau basambilanga, kansi oyeno nuvovanga vo o wantu kuna Yerusaleme bafwete sambilanga.”+
21 O Yesu umvovese vo: “E nkento, unkwikila, e ntangwa ikwiza, ke nusambila diaka Se ova mongo wau ko ngatu kuna Yerusaleme.
22 Oyeno nusambilanga ona nulembele zaya;+ oyeto tusambilanga ona tuzeye, kadi o luvuluzu kwa Ayuda luyantikidi.+
23 Kansi e ntangwa ikwiza, i yau yiyi, ina vo asambidi aludi besambila o Se muna mwanda ye ludi, kadi o Se, wantu a mpila yayi kevavanga bansambila.+
24 O Nzambi i Mwanda,+ awana bekunsambilanga bafwete kunsambila muna mwanda ye ludi.”+
25 O nkento umvovese vo: “Nzeye wo vo Masia okwiza, ona oyikilwa vo Kristu. Avo wizidi, okutusamunuina mawonso.”
26 Yesu umvovese vo: “I mono yuyu ivovananga yaku.”+
27 Vana vau alongoki andi balweke, basivikidi wau kemokenanga yo nkento. Kansi ke vakedi muntu ko wavova vo: “Nki ovavanga?” yovo “Ekuma omokenenanga yandi?”
28 O nkento osisidi mvungu andi, wele kuna mbanza, wele vovesa wantu vo:
29 “Nuiza tala muntu unsamunuini mawonso yavanga. Nga ke yandi ko i Kristu e?”
30 Bakatukidi kuna mbanza, bezidi kwa yandi.
31 Muna ntangwa yayina, alongoki bandodokele vo: “E Rabi,+ dia.”
32 Kansi ubavovese vo: “Ngina ye madia i dia, mana nulembele zaya.”
33 Alongoki bayuvuzianene vo: “Nga muntu untwasidi o madia e?”
34 Yesu ubavovese vo: “O madia mame i vanga luzolo lwa ndiona wantuma,+ yamanisa mpe salu kiandi.+
35 Ke wau ko nuvovele vo ngonde yá zisidi, i bosi kikwiza e nkutika e? Inusamunuini vo: Nusengola o meso nuatala e mpatu, zibweke, e nsungi a nkutika ifwene.+
36 O nsâdi otambwidi kala o mfutu ye okutikanga e mbongo mu kuma kia moyo a mvu ya mvu, kimana o nkuni yo nsâdi bakembela kumosi.+
37 Muna diadi, e diambu edi dialudi: O mosi i nkuni, wankaka nsâdi.
38 Inutumini nuenda kutika ina nulembele sala. Ankaka basadidi, oyeno numwene o wete muna salu kiau.”
39 Esi Samaria ayingi muna mbanza yayina, bakwikidi muna yandi mu diambu dia nkento osidi e kimbangi vo: “Unsamunuini mawonso yavanga.”+
40 Dianu vo, esi Samaria bezidi kwa yandi, banlombele kananga yau, onangini ko lumbu yole.
41 Muna kuma kiaki, wantu ayingi diaka bakwikidi mu kuma kia dina kavovele,
42 bavovese o nkento vo: “Ke tukwikidila kaka mu kuma kia dina ovovele ko; kadi yeto kibeni tukiwididi, tuzeye wo mpe vo muntu ndioyo i mvuluzi a nza kikilu.”+
43 Vava kiavioka lumbu yole, okatukidi ko, wele kuna Ngalili.
44 Yesu yandi kibeni osidi umbangi vo, o ngunza ke zitiswanga ko muna nsi a yandi kibeni.+
45 Dianu vo, vava kalwaka kuna Ngalili, esi Ngalili bantambwidi, wau bamona mawonso kavanga kuna Yerusaleme, kuna nkinzi,+ kadi oyau mpe bayenda kuna nkinzi.+
46 I bosi wizidi diaka kuna Kana a Ngalili, kuna kakitulwila o maza se vinyu.+ Kwakala selo kia ntinu, ona wakala yo mwana wayelanga kuna Kafanau.
47 O muntu ndioyo vava kawá vo Yesu wakatuka kuna Yuda, wizidi kuna Ngalili, wele kwa yandi, unlombele kakulumuka, kenda wuka mwan’andi, kadi se kefwa.
48 Kansi, Yesu umvovese vo: “Avo ke numwene sinsu yo masivi ko, ke nukwikila nkutu ko.”+
49 Selo kia ntinu umvovese vo: “E Mfumu, nza kulumuka ekolo mwan’ame kafwidi ko.”
50 Yesu umvovese vo: “Wenda kwaku; o mwan’aku una o moyo.”+ E selo okwikidi e diambu kamvovese o Yesu, wele kwandi.
51 Kansi, ekolo kakulumukininge, e ntaudi zandi zizidi kunkika, bamvovese vo mwan’andi una o moyo.*
52 Ubayuvuidi kana nkia ola kasasukidi. Bamvovese vo: “E ngianduka zono yankatukidi muna ola ina yansambwadi.”*
53 O se obakwidi wo vo i ola ina Yesu kamvovesa vo: “O mwan’aku una o moyo.”+ Oyandi ye esi nzo andi yawonso bakwikidi.
54 Ekiaki i sinsu kiazole+ kavanga o Yesu, vava kakatuka kuna Yuda yo kwiza ku Ngalili.
Mvovo vana yand'a lukaya
^ I sia vo, tezo kia ola ya 12 mu mwini.
^ Yovo “osasukidi.”
^ I sia vo, tezo kia ola ya 13.
