E nkubika ya Organização Mundial da Saúde (OMS) ivovanga vo: “e fu kia mwesa akento e mpasi kikitukidi se kimbevo kia nz’avimba, owau kina nze vuku” eki kifwete wukwa mu nzaki. Lufimpu lumosi lwa OMS lusonganga vo: “Tezo kia 30% ya akento ana bakala yo makanga yovo bakala basompwa, bavova vo bamweswa e mpasi muna nitu yovo muna mpila ya vukanena, kwa makangu mau yovo akazi au.” Katula ediadi, relatório imosi ya Organização das Nações Unidas (ONU) ivovanga vo, vakala yo mvu umosi wakala vo ‘konso lumbu, tezo kia akento 137 bavondwanga kwa yitu yau.’ a

 E relatório zilenda kutuvana e kini kia vonga kwa diambu ditadidi mweswa e mpasi muna nzo, kansi ke zisonganga ko ulolo wa mpasi bemonanga o wantu awaya muna nti ye muna ngindu.

 Nga ongeye mpe mpasi omweswanga muna nzo? Yovo ozeye muntu omweswanga e mpasi? Avo i wau, tala una e Bibila kilenda kusadisila.

  Ke ngeye ko i nkwa kuma

  Vava lusadisu

  Kuna ngeye mosi ko

  E vanga dia mwesa akaka e mpasi muna nzo difokoka

  Aweyi olenda sadisila wantu bemweswanga e mpasi muna nzo zau?

 Adieyi e Bibila kivovanga? “Konso muntu mu yeto, okuyitela mbalu kwa Nzambi.”—Roma 14:12.

 Sungamena edi: Ndiona okumwesanga e mpasi yandi i nkwa kuma, ke ngeye ko.

 Avo nkaz’aku okutumbanga mu kuma kia mpasi zina oyandi kekumwesanga, vuna kena kuyivuna. Akento bafwete zolwa, ke mweswa mpasi ko.—Kolosai 3:19.

 O yakala olenda mwesa nkento e mpasi mu kuma kia sia vo kimbevo kia transtorno de personalidade keyelanga, mu nzo ya yakala wamwesanga nkazi andi e mpasi kasansukila yovo mu mpila yambi kenuinanga malavu. Kana una vo i wau, mbalu ke tá kwa Nzambi muna mambu mana kekuvanganga. Yandi ofwete vanga e ngolo za soba e zingu kiandi yo yambula kumwesa e mpasi.

 Adieyi e Bibila kivovanga? “Vana vena aludiki ayingi o makani mesikilanga.”—Ngana 15:22.

 Sungamena edi: Avo omwene vo mu vonza wina yovo kuzeye ko dina ofwete vanga, o wantu ankaka balenda kusadisa.

 Ekuma ovuididi lusadisu lwa wantu akaka o mfunu? Nanga ngindu zayingi zikwizanga mu ntu aku. Muna baka e nzengo za dina ofwete vanga avo obwididi diambu diadi, diambote wateka fimpa o mambu nze:

•   Lutaninu lwaku

•   Nzengo zitwasa nluta kwa wan’aku

•   Ndendelo zaku

•   Dina omonanga muna ntima mu kuma kia nkaz’aku

•   Vuvu kia sia vo longo lwalu lulenda toma, avo nkaz’aku osobele fu

 Nanga olenda mona vo kuzeye dina ovanga ko. Avo i wau, kwa nani ofwete lomba lusadisu?

 O nkundi yovo yitu ona obundanga e vuvu olenda kuvana lusadisu, kiakala lwa ngindu yovo lwa kinsuni. Ezak’e ntangwa, o mokena kwa nkatu kulenda kusadisa mu vuvika e ngindu.

 O bokela kwa madotolo ma nkubika zisadisanga awana bemweswanga e mpasi muna nzo zau dilenda kusadisa mu nzaki. Awana betambulanga e mboka zozo balenda kuzayisa dina ofwete vanga muna kuyitanina. Avo yakala diaku obakwidi vo dina kevanganga diambi ye ozolele soba, e nkubika zazi mpe zilenda sadisa o yakala diaku kimana kasoba.

 E nkubika zankaka mpe zilenda kusadisa muna ntangwa mpasi. Dilenda kala madotolo yovo wantu akaka ana balongoka e ndekwa za sadisila wantu bena mu diambu diodio.

 Adieyi e Bibila kivovanga? “Yave b ofinamene awana bawudika e ntima; ovuluzanga awana bakendalala.”—Nkunga 34:18.

 Sungamena edi: Nzambi osianga nsilu vo okusadisa.

 Yave wete diaku kikilu ketokanenanga. (1 Petelo 5:7) Oyandi ozeye una omonanga ye mana oyindulanga, olenda sadila e Bibila muna kufiaulwisa. Oyandi mpe ozolele vo wamokenanga yandi muna sambu. Vava osambanga kwa Nzambi, olenda lomba vo kavana e ngolo ye ngangu ovuidi o mfunu muna sunda e mpasi zozo.—Yesaya 41:10.

 Adieyi e Bibila kivovanga? “Bezingila, konso muntu kuna nsi a nsing’andi a vinyu ye kuna nsi a nsand’andi, ke vekala muntu ko okubamwesa wonga”—Mika 4:4, mvovo vana yanda lukaya.

 Sungamena edi: E Bibila kisianga nsilu vo kuna sentu, wantu awonso bekala ye fulu kina bezingila mu luvuvamu.

 Yave yandi kaka olenda singika o mambu mana tunuananga mau yakwele mvu. E Bibila kisianga nsilu vo: “Okunguna mansanga mawonso muna meso mau, o lufwa ke lukala diaka ko, ngatu kala diaka dilu, yovo kazu ngatu mpasi.” (Lusengomono 21:4) Vava e ntangwa yayi ifwana, ke tusungamena diaka ko o mambu mambi mavangama. Mambu mambote kaka tusungamena. (Yesaya 65:17) Ekiaki i zingu kekubikanga o Yave mu kuma kiaku.