E ziku kisonganga vo Mikaele i nkumbu a Yesu vitila keza ova ntoto ye vava kavutuka kuna zulu. a Mabundu mankaka beyikilanga yo vo “Santu Mikaele.” Bibila kiyikanga vo Mikaele watantana yo Satana vava Mose kafwa ye wasadisa mbasi mu nata nsangu za Nzambi kwa Daniele wa ngunza. (Daniele 10:13, 21; Yuda 9) E nkumbu Mikaele ina ye nsasa vo “Nani Ofwanane yo Nzambi?” Yesu ofwanukini kikilu e nkumbu yayi kadi otaninanga kimfumu kia Nzambi yo nuanisa e mbeni za Nzambi.—Daniele 12:1; Lusengomono 12:7.

 Tala e kuma tulenda kadila ye ziku vo Yesu i Mikaele wa mbasi ambuta.

•   Mikaele yandi i “mbasi ambuta.” (Yuda 9) E zina “mbasi ambuta” dina ye nsasa vo “mfumu a mbasi,” dimonekanga kaka mu sono yole ya Bibila. Muna sono yole yayi o mvovo wau mu singular una, ediadi disongele vo mbasi mosi kaka una ye zina diadi. E sono kimosi kivovanga vo Mfumu Yesu ona wafulwa, “okulumuka tuka kuna zulu, ye mbok’a lutumu ye nding’a mbasi ambuta.” (1 Tesalonika 4:16) Yesu una ye “nding’a mbasi,” kadi yandi i Mikaele wa mbasi ambuta.

•   Mikaele ofilanga buka kia ambasi. “Mikaele ye mbasi zandi banuene ye ngobodi,” i sia vo, Satana. (Lusengomono 12:7) O Mikaele una ye wisa kiayingi, kadi Bibila kiyikanga mu kuma kiandi vo “mosi muna akuluntu basundidi o mfunu” ye “nkuluntu anene.” (Daniele 10:13, 21; 12:1) E mazina mama mesonganga vo Mikaele i “mfumu ona otwadisanga mbasi za nkuma” nze una kavova David E. Aune wa longoki a Luwawanu Lwampa.

   Bibila kivovelanga diaka nkumbu a muntu mosi una yo wisa muna buka kia mbasi. Kivovelanga Yesu “tuka kuna zulu kumosi ye mbasi zandi zankuma, muna tiya twanyuyi, vava kelanda e kunda.” (2 Tesalonika 1:7, 8; Matai 16:27) Yesu “wayenda kuna zulu, ambasi, akwa wisa ye akwa nkuma basiwa kuna nsi a wisa kiandi.” (1 Petelo 3:21, 22) Ke diadi kala ye nsasa ko kele vo Nzambi kavana kiyekwa kiau kimosi kwa Yesu yo Mikaele kia twadisa ambasi. Ozevo, tulenda vova ye ziku kiawonso vo Yesu yo Mikaele i muntu mosi.

•   Mikaele “otelama” muna “ntangw’ampasi” eyi ke yateka kala ko. (Daniele 12:1) Muna nkand’a Daniele, o mvovo “telama,” nkumbu miayingi usadilwanga vava ntinu ‘ketelamanga’ muna vanga diambu diamfunu. (Daniele 11:2-4, 21) Yesu Kristu ona oyikilwanga mpe vo “Diambu dia Nzambi,” ovanga diambu diamfunu wau vo yandi i “Ntinu wa atinu.” (Lusengomono 19:11-16) Ovanga diambu diadi muna “mpasi zayingi zina ke zateka kala ko tuka kiasemenua e nza.”—Matai 24:21, 42.