Yova pongʉeri ndrŭ lili dz’ djo ndirigoti ndrŭ ngʉ dz’ djó nga Paradiso ná fø lo na ke ngʉ ridho nari kʉ, “dz’ djó nga gble si ngʉ paradiso.” (Mwa. 1:28) Choro nŭnŭ si di ná ndrŭ dho maddi ri si ngani ndima rrnga fø yadha dho. Ya kwanza nga dz’ djó nga ro sie Paradiso ri, dhonalo Edeni ki ro ngae ri. Armagedoni da nari goti ko sie njí na bí ná føri sie dz’ djó sasani ná sehemu thika ko thɨ nari mai. Føri si njí bbʉ bbo!

Føri ke Babiloni nǎ ro Waizraeli ngʉngʉe ndima bba ro kpa singʉe ro ná njí ngano le djǒ na. Kpa bbá ngø nǎ nzá ndrŭ ro dingʉe cho 70 kana ri. Ro, Isaya d’rangʉeri nari kʉ, Yova dhó le tsotsokodha chulu ri sie kaka kpa thɨ ri thika ki vi ndi ngʉ bblo. Unabi pongʉeri: “Ke si ngødja nǎ nga ngʉ Edeni bbai ndirigoti ngødja na nzá tso d’i ná nga ngʉ Yova dzá í bbai.” (Isa. 51:3) Føri Waizraeli njingʉe nji. Føri bbai Yova dhó le  tsotsokodha chulu, dz’ djó si di ná ndrŭ dho ri si kaka ndima ngʉ i dz’ djó nga paradiso. Ni ji ni si fø njí ro njí nari ni ka ni dhǒ njʉ.

Føri ni ka ni dhǒ lu ná ddikpa chu kʉ, nidhó dza ma, ni kuso lu nga ronga ni b’o tse ndi tse ro nari chulu. Ni ka ni njiri fø njati rie nzɨ ma ni kuso lu kʉ ná ndrŭ rinji fø ró. Inga ni ka ni njiri fø njudha dhinga ma, asamble dhinga thidha ma na tsotso ni kó nari chulu. Njati nidhó hali u ritso ngbà ró, ni ka ni tsu chʉ adi ngaba ná lo tsotso adi kó ná kpa kana maddi nja ni rá ngatsotso ko d’e. Ni ka ni njiri nji fø ni ji ni kó ni djoi ma, ni vei ma na tsotso nari dho. Adhuri ni tso, ‘Njati rie Yova u ma tso ma si di choro nŭnŭ i dz’ djó d’e ró, ma ká ka ma jifunza nja ufundi ro maddi?’

Yairo dzá singba ngba ga nari goti thei Yesu pongʉeri le bbʉ nyo fø ngba nyó. (Mk. 5:42, 43) Cho 12 dhi fø ngba le ngu ná føri nga ka ndi é ngʉe bbo lo ri. Ro, “nonga noni ná kabuli nǎ kʉ ná ndrŭ krʉ si ke chu rr ndirigoti kpa si kʉ vʉvʉ” ná fø unabi njini ró, ká njí sie ngbá ngatsi ma nari djo anzi ngaddi di. (Yoh. 5:28, 29) Nzá mai Biblia tilo ri djo bbo ro, ko ka ko ddiri nari kʉ ga si ga ná ndrŭ dhó lo si nyo ma, ru ma, dza ma na u ni dhé. Ni ká ka ni dhǒ ni kʉ tayari nì nga tsotsokodha dho nari ngbà njʉ? Addinga i ngadhudha djo.

Njati nidhó kutaniko nǎ le pori mwangalizi wa muzunguko si si ni dhó kutaniko na ró, ká ni adi ke ro nzi nì nja ndi si ra nganyo ni bba d’e? Njati krʉ saa ró adi njínji ná kpa le cho beteli nǎ ro eneo na, inga mwangalizi dhó dyadha dhi njí tso dyani ró ká ni adi kpa tsotso kó didha dhi nga ni bbʉ kpa dho nari na nì? Njati rie eneo nǎ adi da ná asamble si da nidhó eneo nǎ ró, ni ká adi ni ró dho bbʉ fø asamble si da ná nga thɨ ná ndrŭ kana nì inga ni kae tayari nì asamble dho le cho ná kpa tsotsokodha dho?

Matendo 24:15 ripo nari bbai, ko uri nari kʉ ga si ga ná ndrŭ sie mamilioni djolu. Kpa kana bí kʉ ná kpa sie nzá chungʉe lo Yova djo che ndima cheni nari njí ná kpa. Kpa si bati ba ndima chulo Yova djo ndima dhó gadha goti. a Chi tøni Mungu dho ná ndrŭ si longaddi fø ndrŭ dho. (Isa. 11:9) Europe ma, Amérique du sud ma, Afrique ma na nǎ d’rangʉe lo ná le-ve Charlotte adi fø saa b’o. Ji ndi nanga jini ro, le pori: “Ma adi ga si ga ná ndrŭ dho ma si longaddi nari b’o. Drrdrr ishi ná nja ndrŭ djó lo ma di zø ná saa na i ma adi riddi bí ina: ‘Njati i ke chue lo Yova djo ró, kedhó maisha ka ndi ée njonjo.’ Ma kʉ ù na bbo ma si ga si ga ná ndrŭ dho kpa kosa ngʉe ná ritsi d’ra.”

Nzá Yesu d’e gøni nari njí ngʉ tøni chi Yova dho i dz’ djó ná ndrŭ dhó lo maddi si ri u ndima chulo bí. Anzi ngaddi ni ka ni é na ná hwè ma, pendeleo ma na djo, Danieli ndingʉe nzá ndi famu ro ná unabi njini nari nga ni tú ke dho ro nari djo di. (Da. 12:8) Inga ngbaribbai ma ni ka ni mbu ni Ruta ma, Naumi ma na tsotso ni kó nja ndima chu ngbaribbai ma Masiya singʉe kpadhó familia nǎ ro nari djo. Dz’ djó gble sie ná fø longaddidha dhi programu na le si le tso gba ná føri sie bbo kʉ ná pendeleo ndirigoti che kʉ ná i dz’ djó adi le djǒ nanga ngbʉ ná lo ro nga sie ri!

Ko jiri ko si ko tso gba fø programu na ngbà nari ká ko ka ko dhǒ njʉ ngbaribbai? Fø lo ni ka ni dhǒ ni nidhó ufundi thika thɨ longaddidha dhi njí kana njʉ ndirigoti dz’ djolu gble d’rani ná lod’radha dhi njí ni nji nari na. (Mt. 24:14) Njati nidhó hali ma, nidhó cho ma na di ni tso cho bbo ni saa nji longaddidha dhi njí kana nari ró ró, ni nji ná kpakpanga adi ni ká kʉ nì tayari ga si ga ná ndrŭ dho longaddidha dho nari dhǒ.

Bbʉbbʉ dhé, bbo na mana kʉ ná ngadhudha kʉ ena, i dz’ si che ni dho nari ká ni b’o nì? Ni ká kʉ hwè na nì nja ni si di dz’ djó Paradiso nǎ ndirigoti ga si ga ná ndrŭ dho ni si ritsi bbʉ ndirigoti ni ddi longa kpa dho? Ni ka nì dhǒ ni kʉ tayari nì dz’ djó didha dho, nari gosi njini dz’ djó ná njí bbai di ná njí ni nji nari ró!