Yee, kubanga “Katonda abudaabuda abo abaweddemu amaanyi,” asobola okutuwa obuyambi obusingayo obulungi.​—2 Abakkolinso 7:6.

•   Abawa amaanyi. Bw’osaba Katonda, akuwa amaanyi ge weetaaga okwaŋŋanga ekizibu ky’olina. (Abafiripi 4:13) Ba mukakafu nti Katonda akuwulira, kubanga Bayibuli egamba nti: “Yakuwa ali kumpi n’abo abalina omutima ogumenyese; alokola abo bonna abalina omwoyo oguboneredde.” (Zabbuli 34:18) Bw’osaba Katonda akuwulira ne bw’oba nga tosobola kumunnyonnyolera ddala ngeri gy’owuliramu.​—Abaruumi 8:26, 27.

•   Ebyokulabirako ebirungi. Omuwandiisi wa Bayibuli yasaba Katonda nti: “Nkukoowoola nga ndi mu buziba.” Omuwandiisi wa Bayibuli oyo yafuna obuweerero bwe yakijjukira nti Katonda mwetegefu okutusonyiwa ebibi byaffe. Yagamba Katonda nti: “Singa wali otunuulira nsobi, Ai Yakuwa, ani yandisobodde okuyimirira? Kubanga ggwe osonyiyira ddala, bw’otyo olyoke oweebwe ekitiibwa.”​—Zabbuli 130:1, 3, 4.

•   Abawa essuubi. Ng’oggyeeko okubudaabuda abennyamivu, Katonda era asuubizza okuggyawo ebizibu byonna ebireetera abantu okwennyamira. Katonda bw’anaatuukiriza ekisuubizo ekyo, “Ebintu ebyasooka [nga mw’otwalidde n’okwenyamira] tebirijjukirwa, era tebirisigala mu mutima.”​—Isaaya 65:17.

 Weetegereze: Wadde nga bakimanyi nti Katonda abudaabuda abennyamivu, Abajulirwa ba Yakuwa bwe bafuna obulwadde obw’okwennyamira, bagenda mu malwaliro okufuna obujjanjabi. (Makko 2:17) Abajulirwa ba Yakuwa tebalina bujjanjabi bwe bakubiriza bantu kufuna; bakimanyi nti buli muntu asaanidde okwesalirawo ku lulwe obujjanjabi bw’ayagala.