Batili, halusika eza cwalo. Mane zeluezize ki kucinca litumelo zaluna hane lulemuhile kuli nelisa lumelelani ka kutala ni litaba zeiluta Bibele.

 Lilimo-limo kwamulaho pili lusika zwisa kale Bibele ya Toloko ya Lifasi Lelinca ka 1950, nelunyakisisize litaba zeiluta Bibele. Hane lunze lueza cwalo, neluitusisize Libibele zeshutana-shutana zeneli teñi, mi kueza cwalo neku lutusize kuziba lituto zelulumela cwale. Ka mutala, munyakisise litumelo zese babile ni zona Lipaki za Jehova ka nako yetelele, kuli mubone haiba zalumelelana luli ni zeiluta Bibele.

1.   Zelulumela: Mulimu haki Silaalu. Magazini ya Zion’s Watch Tower ya July 1882 neibulezi kuli: “Babali ba magazini yaluna baziba kuli lwalumela kuli Jehova ni Jesu bateñi mi Moya okenile ni ona uteñi. Nihakulicwalo, halulumeli tuto ya kuli Jehova, Jesu ni Moya okenile ki Milimu yemilaalu yeli ku mutu alimuñwi, kamba sina mobalumelela babañwi kuli ki Mulimu alimuñwi yanani milimu yemilaalu. Lulumela kuli Bibele haiyemeli tuto yeo nihanyinyani.”

     Zeibulela Bibele: “Jehova Mulimu waluna ki Jehova alimuñwi.” (Deuteronoma 6:4, Bibele ya The Holy Bible yetolokilwe ki Robert Young) “Kunani Mulimu alimuñwi feela, yena Ndate, yaezize lika kaufela, mi luna luzwa ku yena; mi kunani Mulena alimuñwi feela, yena Jesu Kreste, yo lika kaufela liezizwe ka yena, mi luna lutahile ka yena.” (1 Makorinte 8:6, Bibele ya American Bible Union Version) Jesu yena ka sibili naabulezi kuli: “Ndate ki yomuhulu ku na.”​—Joani 14:28, Bibele ya Douay-Rheims Version.

2.   Zelulumela: Batu habana kutukufazwa mwa lihele. Mwa magazini ya Zion’s Watch Tower ya June 1882 nekunani taba yeñwi yenenani toho ya taba yeli, “Mupuzo wa Sibi ki Lifu,” yenetomile fa liñolo la Maroma 6:​23 ka kuya ka Bibele ya King James Version. Magazini yeo neibulezi kuli: “Taba yeo yaikutwahalela hande. Ki nto yekomokisa kuli batu babañata babalumela kuli Bibele ki Linzwi la Mulimu bazwelapili kulwanisa zeiluta Bibele fa ka za babashwile, mi batundamena kubulela kuli Bibele iluta kuli mupuzo wa sibi ki bupilo bwa kuya kuile mutu inzaa tukufazwa mwa lihele.”

     Zeibulela Bibele: “Moyo oeza sibi ki ona okashwa.” (Ezekiele 18:​4, 20, Bibele ya King James Version) Koto yebaka fiwa batu babasa utwi Mulimu haki ya kutukufazwa mwa lihele, kono “bakayundiselezwa kuya kuile.”​—2 Matesalonika 1:9, Bibele ya King James Version.

3.   Zelulumela: Mubuso wa Mulimu ki mulonga wa luli, haki nto yeñwi ye mwa pilu ya mutu. Magazini ya Zion’s Watch Tower ya December 1881 neibulezi cwana ka za Mubuso wa Mulimu: “Mubuso wa Mulimu hauka tomiwa, ukafelisa mibuso kaufela ya lifasi.”

     Zeibulela Bibele: “Mwa mazazi a malena bao Mulimu wa lihalimu ukatoma mubuso, osike wasinyiwa nikamuta: mi mubuso wo hauna kufiwa kwa batu basili, kono ukatuba ni kuyundisa mibuso ye kaufela, mi ukaina kuya kuile.”​—Daniele 2:​44, Bibele ya King James Version.

 Batili, luzwelapili kuitusisa litoloko zeñata za Bibele mwa musebezi waluna wa kukutaza. Nihaike kuli haluituta Bibele ni batu lubafanga Bibele ya Toloko ya Lifasi Lelinca kusina kubalifisa sesiñwi, hape lutabela kuituta ni batu kuzwelela mwa Bibele ifi kamba ifi yebatabela.