Nitokwa Kuezañi Kuli Nibe Yomuñwi wa Lipaki za Jehova?
Kwa liñolo la Mateu 28:19, 20, Jesu naabonisize mihato yatokwa kuunga mutu kuli abe yomuñwi wa Lipaki za Jehova. Liñolo le libonisa zaswanela kueza mutu kuli abe mulutiwa wa Kreste. Mi kueza cwalo kukopanyeleza kubulela ka za Jehova ni kufa bupaki ka za libizo la Jehova.
Muhato Wapili: Muitute Zeiluta Bibele. Jesu naalaezi balateleli bahae kuli ‘balute batu . . . kuba balutiwa . . . , ni kubaluta zanaalaezi.’ (Mateu 28:19, 20) Linzwi lelitolokilwe kuli “mulutiwa” litalusa “muituti.” Litaba zefumaneha mwa Bibele, sihulu lituto zanaalutile Jesu Kreste, zakona kumitusa kuziba litaba zekona kumitusa kukondisa mwa bupilo ni kuba ni tabo. (2 Timotea 3:16, 17) Lwakona kumitusa kuziba zeiluta Bibele, ka kuitutanga Bibele ni mina musatokwi kulifa sesiñwi.—Mateu 10:7, 8; 1 Matesalonika 2:13.
Muhato Wabubeli: Musebelise zemuituta. Jesu naabulezi kuli batu babaituta hape baswanela “kumamela lika kaufela [zanaalaezi].” (Mateu 28:20) Taba yeo ibonisa kuli hamuituta Bibele hamutokwi feela kuba ni zibo, kono mutokwa kueza licinceho zeñwi ka za momuungela lika ni mikwa yamina. (Likezo 10:42; Maefese 4:22-29; Maheberu 10:24, 25) Mi hasamulaho, babamamela litaelo za Jesu baezanga katulo ya ka butu ya kumulatelela ka kuneela bupilo bwabona ku Jehova Mulimu.—Mateu 16:24.
Muhato Wabulaalu: Mukolobezwe. (Mateu 28:19) Mwa Bibele, kolobezo ibapanywa kwa kupumbekwa. (Mubapanye Maroma 6:2-4.) Kolobezo ibonisa kuli mutu ushwile mwa mupilelo wahae wakale, mi ukalisa bupilo bobunca. Kacwalo, hamukolobezwa mubonisa kwa nyangela kuli mupetile mihato yemibeli yapili yanaabulezi Jesu, mi mukupa Mulimu kuli mube ni lizwalo lelikenile.—Maheberu 9:14; 1 Pitrosi 3:21.
Nikona kuziba cwañi kuli niitukiselize kukolobezwa?
Muambole ni baana-bahulu ba puteho. Mi bakanyakisisa ni mina litaba lisikai ilikuli babone teñi kuli mwautwisisa zeamiwa mwakukolobezwa, musweli mwasebelisa zemuituta, ni kuli muezize katulo ya kuineela ku Mulimu ka ili mina.—Likezo 20:28; 1 Pitrosi 5:1-3.
Kana bana ba Lipaki za Jehova ni bona baswanela kuunga mihato yeo?
Eni. Luhulisa bana baluna “ka kalimelo ni kelezo ya Jehova” sina feela moi lulaelela Bibele. (Maefese 6:4) Kono habanze bahula, bana baluna baezanga katulo ya ka butu ya kuituta Bibele, kulumela lituto zeo, ni kusebelisa zebaituta pili basika kwanisa kale zetokwahala kuli bakolobezwe. (Maroma 12:2) Mi sa butokwa nikufita kikuli, mañi ni mañi uswanela kuikezeza katulo ya kusebeleza Jehova kamba kutokwa.—Maroma 14:12; Magalata 6:5.
Hape Mwendi Mwakona Kutabela Litaba Ze
KA ZA LUNA
Tuto ya Bibele I Eziwanga Cwañi?
Mwa lifasi kaufela, Lipaki za Jehova bazibahala ka musebezi wabona wa kuitutanga Bibele ni batu kusina tifo. Mubone moiezezwanga tuto ya Bibele.
LIPUZO ZEBUZIWANGA HAÑATA
Kana Nikatokwa Kuba Yomuñwi wa Lipaki za Jehova Haiba Niituta Bibele ni Bona?
Lipaki za Jehova baitutanga Bibele ni batu babañata-ñata mwa lifasi kaufela kusina kulifa sesiñwi. Kono haiba mulumela kuitutanga Bibele ni luna, kana muswanela kuba yomuñwi wa Lipaki za Jehova?
LIPUZO ZEBUZIWANGA HAÑATA
Tuto ya Bibele Yebazamaisanga Lipaki za Jehova ki Nto Mañi?
Hamunze muituta Bibele ni Lipaki za Jehova, mwakona kuitusisa toloko ya Bibele ifi kamba ifi yemutabela. Mulukuluhile kumema lubasi lwamina kaufela kamba mulikani wamina ufi kamba ufi kuli afumanehe kwa tuto yamina.
LIKALABO KWA LIPUZO ZA BIBELE
Kana Mutu Watokwa Luli Kuba Mwa Bulapeli Bobuñwi?
Kana mutu wakona kuitapelela feela Mulimu anosi?
