Munahane feela mone mukaikutwela haiba mu Lipaki za Jehova, kusindeketwa ki mapokola hamunze mukutaza fa ndu ni ndu! Ki zona zeneezahezi zeo ku bo Joseph kwa Micronesia ka silimo sa 2017. Bo Joseph ni Lipaki za Jehova babañwi babalaalu nebasweli kutusa mwa mungendenge oipitezi, mi nebayo kutaleza kwa lioli za kwahule hahulu.

 Ka nako ya musihali, Lipaki za Jehova babane bao bayo punya mwa sibaka sesinani lioli zeñata-ñata, ili mone kupila batu bababato eza 600. Habayo fita fa likamba, Lipaki za Jehova bao bayo amuhelwa ki meya wa mwa sibaka seo. Bo Joseph batalusa zeneezahezi hamulaho wa fo: “Meya yo alutaluseza kuli naakona kulukisa kuli mota ya mapokola iluzamaise fa mandu a batu kaufela. Nelukomokile hahulu kuutwa cwalo, kono ka likute, lwatalusa kuli nelusa koni kueza cwalo. Nelubata kupotela batu fa mandu abona sina moluezezanga kamita.”

 Bahasanyi bao bakala kuzamaya ka mahutu, mi nebabata kukutaza kwa batu babañata. Lipaki bao nebabulezi kuli: “Batu neba luamuhezi hande, mi nebatabela lushango lwaluna. Bakeñisa kuli batu nebatabela, nelukonile kutanda nako yeñata hahulu mwa bukombwa.”

 Hamulaho wa nako fa lizazi leliswana leo, mota ya mapokola yafitelela bo Joseph habeli, mi lwabulaalu yayema. Mapokola bataluseza bo Joseph kuli nebabata kubaisa ka mota kwa mandu ane basika potela kale, kono bo Joseph bahana hape. Batalusa kuli: “Niteñi, mapokola batundamena, mi bali, ‘Kusiyezi feela nako yenyinyani kuli mulusiye mwa sioli se; kacwalo luka miisa fa mandu kaufela amusika potela kale.’ Nenipalezwi kuhana bakeñisa kuli nenisa siyalezwi ki mandu amañata-nyana ane nitokwa kupotela. Hane lutuha lufita fa ndu ni ndu, mapokola neba nitalusezanga batu bane bapila fa ndu yeo, mi nebabulelanga kuli haiba nekusina mutu yanaakato kwalula sikwalo hase ningongotile, nebaka liza huta ya mota ilikuli muñaa ndu azwele fande.

 “Nelutusizwe hahulu ki tukiso ya mapokola yeo kuli mane nelukonile kupotela mandu kaufela fa lizazi leo. Nelukonile kufa lihatiso zeñata zazi leo, mi lwalukisa za kukutela kwa batu bane babonisize kutabela.”

 Mapokola nebataluselize bo Joseph kuli “nebaikozi kuhasanya taba yende.” Lizazi hase lilikezi, Lipaki bazwa fa sioli seo, mi mapokola babalaeza ka tabo yetuna inze bayemisize mazoho abona mwahalimu, mi nebasweli lihatiso mwa mazoho.