Batili. Bibele ibonisa kuli luswanela kulapelanga feela ku Mulimu, ka kuitisisa libizo la Jesu. Mane Jesu naabulelezi balutiwa bahae kuli: “Cwale mina mulapele cwana, muli: Ndataa luna ya kwa mahalimu, libizo lahao likeniswe.” (Mateu 6:9) Jesu naasika bulelela balutiwa bahae kuli balapele bahalalehi, mangeloi, kamba mutu ufi kamba ufi kwandaa Mulimu.

 Jesu hape naabulelezi balateleli bahae kuli: “Ki na nzila ni niti ni bupilo. Hakuna yataha ku Ndate haisi ka na.” (Joani 14:6) Ki Jesu feela yalumelelizwe ki Mulimu kuli luitusise libizo lahae halulapela ku Mulimu.—Maheberu 7:25.

Kana kulapelanga ku Mulimu ni kulapelanga kwa bahalalehi ka nako yeswana kufosahalile?

 Mwa Milao Yelishumi, Mulimu naabulezi kuli: “Na, MULENA, Mulimu wahao, ninani lifufa.” (Exoda 20:5, Toloko ya NAB) Mulimu unani “lifufa” ka mukwa ufi? Litaluso ze kwatasi mwa Bibele ya New American Bible libonisa kuli Mulimu “ubata kukutekiwa feela anosi.” Mulimu ubata kuli likezo za kumulapela, zekopanyeleza ni tapelo, lilibiswe feela ku yena anosi.—Isaya 48:11.

 Lukafoseza Mulimu haiba lulapela ku mutu usili, nihaikaba kuli ki bahalalehi kamba mangeloi. Muapositola Joani hanaalikile kulapela lingeloi leliñwi, lingeloi leo lamuhanisa ni kumubulelela kuli: “Usike waeza cwalo! Na ni mutanga feela sina wena ni wa mizwale bahao babanani musebezi wa kupaka ka za Jesu. Ulapele Mulimu.”—Sinulo 19:10.