Kana Nakona Kufumana Manzwi Aomba-Omba Mwa Bibele?
Kalabo ya Bibele
Eni. (Maroma 15:4) Halunyakisiseñi litimana za mwa Bibele zese tusize batu babañata babakopana ni miinelo yetaata ni babakatazwa ki minahano.
Ze mwa taba ye
Miinelo yetaata
Samu 23:4: “Niha nizamaya mwa musindi wa lififi lelituna, hanisabi sesiñwi, kakuli wena uinzi ni na.”
Taluso: Haiba mulapela ku Mulimu ni kuitinga fa Linzwi lahae yona Bibele, kuli limietelele, mwakona kuba ni bundume bwa kutiyela miinelo yetaata yemukopana ni yona.
Mafilipi 4:13: “Nifumana maata mwa lika kaufela ka yena yanifa maata.”
Taluso: Mulimu wakona kumifa maata a kutiyela butata bufi kamba bufi bomukopana ni bona.
Kushwelwa ki mutu yelulata
Muekelesia 9:10: “Hakuna musebezi kamba milelo kamba zibo kamba butali mwa Libita.”
Taluso: Batu babashwile habanyandi mi habakoni kulueza maswe. Hakuna sebaziba.
Likezo 24:15: “Kukaba ni zuho.”
Taluso: Mulimu wakona kuzusa balatiwa baluna babashwile.
Kuikutwa hahulu mulatu
Samu 86:5: “Kakuli wena Jehova a u yomunde mi ulata kuswalela; ubonisa lilato lelituna lelisa feli ku babahuweleza ku wena kaufela.”
Taluso: Mulimu uswalelanga batu baba bakile habuniti kabakala mafosisa ane baezize kwamulaho ili babaikataza kusaeza mafosisa aswana.
Samu 103:12: “Sina mapazulelo haainzi kwahule ni malikelelo, ubeile cwalo lifoso zaluna kwahule ni luna.”
Taluso: Mulimu haluswalezi haazwelangipili kuhupula libi zene luezize kwamulaho. Mi haaluhupulisangi libi zeo kamba kulufa koto.
Kubilaezwa ki nto yeñwi
Samu 31:7: “Uboni manyando aka; waziba ziyezi-tuna yenili ku yona.”
Taluso: Mulimu waziba miinelo yetaata kaufela yemukopana ni yona. Wautwisisa momuikutwela nihaikaba kuli batu babañwi habautwisisi.
Samu 34:18: “Jehova ufakaufi ni babalobehile lipilu; upilisa babaswabile.”
Taluso: Mulimu usepisa kuli hana kumiyubeka hamubilaezwa ki nto yeñwi. Wakona kumifa maata a kutiyela muinelo wo.
Makulanu
Samu 41:3: “Jehova uka mutiisa fa mumbeta wahae wa bukuli.”
Taluso: Mulimu wakona kumitusa hamukula butuku bobutuna ka kumifa kozo ya mwa munahano, maata a kuitiisa ni butali bwa kuli mueze likatulo zende.
Isaya 33:24: “Mi hakuna yayahile mwa naha yakali: ‘Nakula.’”
Taluso: Mulimu usepisa kuli kwapili batu kaufela bakaba ni buiketo bwa kwa mubili.
Lipilaelo
Samu 94:19: “Hane niimezwi ki lipilaelo, neu niomba-ombile ni kunikatulusa.”
Taluso: Haiba luitinga ku Mulimu halunani lipilaelo, wakona kuluomba-omba.
1 Pitrosi 5:7: “[Munepele] lipilaelo zamina kaufela ku yena, kakuli wamiisa pilu.”
Taluso: Mulimu wabona manyando aluna. Ulumema kulapela ku yena ni kumutaluseza lika kaufela zelubilaeza.
Lindwa
Samu 46:9: “Ufelisa lindwa mwa lifasi kamukana.”
Taluso: Honacwale-cwale fa, Mubuso wa Mulimu ukafelisa lindwa kaufela.
Samu 37:11, 29: “Babaishuwa bakaluwa lifasi, mi bakataba hahulu kabakala kozo yetuna. . . . Babalukile bakaluwa lifasi, mi bakapila ku lona kuya kuile.”
Taluso: Batu babande bakapila ka kozo fa lifasi kuya kuile.
Kubilaezwa ki za kwapili
Jeremia 29:11: “Kakuli niziba hande mihupulo yeni minahanela,’ kubulela Jehova, ‘ili mihupulo ya kozo, isiñi ya kozi, kuli nimife bupilo bobunde kwapili, ni sepo.”
Taluso: Mulimu usepisa batu bahae kuli kwapili bakapila bupilo bobunde.
Sinulo 21:4: “Mi ukatakula miyoko kaufela kwa meeto abona, mi lifu halisana kubateñi, nihaiba kutahelwa ki maswabi kamba kulila kamba kuutwa butuku. Zapili lifelile.”
Taluso: Mulimu usepisa kuli ukafelisa lika kaufela zemaswe ili zesweli kuezahala mwa lifasi kacenu.
a Jehova ki lona libizo la Mulimu. (Samu 83:18) Mubone taba yeli “Jehova ki Mañi?”
Hape Mwendi Mwakona Kutabela Litaba Ze
TAWALA YA MULIBELELI
Mo Mukona Kutusezwa ki Kuziba Kuli Mulimu Wamiisa Pilu
Mañolo alutusa kutiisa tumelo yaluna mwa lisepiso zende za Mulimu za kwapili.
LIKALABO KWA LIPUZO ZA BIBELE
Ki Lika Mañi Zekona Kunitusa Kuba ni Sepo?
Kufumana simbule sesisepahala kuka lutusa kuba ni bupilo bobunde cwale ni sepo yende kwapili.
LITABA ZEÑWI ZETUSA
Zekona Kuomba-Omba Babashwezwi
Halushwelwa ki mutu yelulata, lukana lwaikutwa kuli hakuna yautwisisa butuku boluutwa. Kono Mulimu wautwisisa, mi wakona kulutusa.
TAWALA YA MULIBELELI
Halukopana ni Miinelo Yetaata Mwa Bupilo
Lusakona kuba ni sepo mwa bupilo kusina taba ni miinelo yetaata yelukopana ni yona.
LITUTO ZA BUTOKWA ZA MWA BIBELE
Ki Kabakalañi Mulimu Hatuhelezi Manyando?
Batu babañata baipuzanga ka za libaka mwa lifasi hakunani hahulu sitoyo ni manyando. Bibele ilufa kalabo yekolwisa ili yeomba-omba.
