Batili. Bibele haibuleli kuli masheleñi amaswe, kamba kuli masheleñi ki ona atahisa bumaswe kaufela mwa lifasi. Pulelo yeatile hahulu yeli “masheleñi ki ona mubisi wa zemaswe za mufuta kaufela” ki manzwi a mwa liñolo asika kwanelela ili afa muhupulo ofosahalile. Bibele yona ibulela kuli “lilato la masheleñi ki mubisi wa zemaswe za mufuta kaufela.” a—1 Timotea 6:10.

•  Bibele ibulelañi ka za masheleñi?

•  Ki kabakalañi Bibele haifa temuso ka za lilato la masheleñi?

•  Kulatelela kelezo ya Bibele ka za masheleñi kuka lutusa cwañi?

•  Mañolo a mwa Bibele abulela za masheleñi

 Bibele ibulela kuli masheleñi, atusa haiba aitusiswa hande, mane hape akona ‘kusileleza.’ (Muekelesia 7:12) Mane Bibele ibabaza batu bababonisanga babañwi sishemo mwendi ka kubafanga limpo zekopanyeleza cwalo ni masheleñi.—Liproverbia 11:25.

 Bibele hape, ifa temuso ka za kuitusisa bupilo bwaluna kwa kubata feela masheleñi. Ibulela kuli: “Mwa bupilo bwamina, musike mwaba ni lilato la masheleñi, inze mukolwa ka zemunani zona cwale.” (Maheberu 13:5) Tuto kiya kuli luswanela kuba ni mubonelo oswanela ka za masheleñi ni kuambuka kundongwama sifumu. Kono luswanela kuzwelapili kukolwa ka zelunani zona ili lika zelutokwa luli, zecwale ka lico, litino, ni malobalo.—1 Timotea 6:8.

 Batu ba mukwañuli habana kufumana bupilo bobusafeli. (Maefese 5:5) Libaka lapili kikuli, mukwañuli ki mufuta omuñwi wa bulapeli bwa maswaniso, kamba bulapeli bwa buhata. (Makolose 3:5) Libaka labubeli kikuli habanze baikataza kubata lika zebalakaza, batu ba mukwañuli habalatelelangi likuka za Mulimu. Liproverbia 28:20 ibulela kuli, “yaakufela kufuma haana kuzwelapili asina mulatu.” Batu babacwalo bakona kuikenya mwa likezo za bukebenga zecwale ka kubemba mutu kuli bakabeya fa nalela likunutu zahae konji haiba abafa masheleñi, bubukuli, buputeleli, kuuzwa batu ka mulelo wa kuli balifiwe masheleñi, kamba bubulai.

 Lilato la masheleñi niha lisakoni kutahiseza babañwi kuba ni mikwa yemaswe, likona kutahiseza mutu matata amañwi. Bibele ibulela kuli “babatukufalezwi kufuma bawela mwa miliko ni mwa malaba ni litakazo zeñata zesina tuso ni zeholofaza.”—1 Timotea 6:9.

 Haiba luzwelapili kueza lika zelukile ni kusaloba likuka za Mulimu kabakala masheleñi, lukaba batu babakutekeha ili ba butokwa ku Mulimu mi yena uka lutusa. Mulimu usepisa batu babaikataza kueza zelukile kuli: “Hanina kumisiya nikamuta, mi hanina kumiyubeka nikamuta.” (Maheberu 13:5, 6) Hape ulusepisa kuli “mutu yasepahala ukaamuhela limbuyoti zeñata.”—Liproverbia 28:20.