Sibi ki nto ifi kamba ifi yelukona kueza, kunahana kamba kuikutwa, yelwanisana ni likuka za Mulimu. Kueza sibi kukopanyeleza kuloba milao ya Mulimu ka kueza nto yaanga Mulimu kuli imaswe kamba haisika luka. (1 Joani 3:4; 5:17) Bibele hape ibonisa kuli kupalelwa kueza sesilukile ki sibi.—Jakobo 4:17.

 Mwa lipuo zeneitusiswa ka nako yene iñolwa Bibele, linzwi la sibi nelitalusa “kushuta” nto yeñwi. Ka mutala, sikwata sa masole ba mwa linako za Isilaele wa kwaikale neli likwala luli kwa kuposa macwe ka tufwililo kuli mane ‘nebasa shuti.’ Pulelo yeo hane ikatolokiwa linzwi ka linzwi, neika tolokiwa kuli ‘nebasa ezi sibi.’ (Baatuli 20:16) Kacwalo, kueza sibi ki kushuta sikonkwani sa kupila ka kuya ka likuka za Mulimu zepahami.

 Ka kuba Mubupi, Mulimu unani tukelo ya kutomela batu milao. (Sinulo 4:11) Lukaikalabela ku yena kabakala likezo zaluna.—Maroma 14:12.

Kana kwakonahala kusaeza sibi nihanyinyani?

 Batili. Bibele ibulela kuli “kaufelaa bona baezize sibi mi habafiti fa sipimo sa kanya ya Mulimu.” (Maroma 3:23; 1 Malena 8:46; Muekelesia 7:20; 1 Joani 1:8) Ki kabakalañi hakulicwalo?

 Batu bapili, bona bo Adama ni Eva, nebasina sibi kwa makalelo. Nekuli cwalo bakeñisa kuli Mulimu naababupile inze bapetahalile, ka siswaniso sahae. (Genese 1:27) Nihakulicwalo, nebasika zwelapili kuba babapetahalile kabakala kuli nebasika utwa Mulimu. (Genese 3:5, 6, 17-19) Hane babile ni bana, bana bao bahoza sibi ni kusapetahala kwa bashemi babona. (Maroma 5:12) Mulena Davida wa Isilaele naabulezi cwana ka za taba yeo: “Nipepilwe inze ninani mulatu.”—Samu 51:5.

Kana libi zeñwi ki zetuna kufita zeñwi?

 Eni. Ka mutala, Bibele ibulela kuli batu bane bapila mwa muleneñi wa Sodoma wa ikale ‘neli babamaswe, nebafosa ka libi zetuna’ mi sibi sabona neli ‘sesibukiti hahulu.’ (Genese 13:13; 18:20) Halunyakisiseñi lika zetaalu zetahisanga kuli sibi siingiwe kuba sesituna.

1.   Butuna bwa sibi sesiezizwe. Bibele ilulemusa kuambuka libi zetuna zecwale ka muzamao wa buhule, kulapela milimu ya maswaniso, busholi, bucakolwa, bubukuli, bubulai, ni kuba ni tumelo ya mioya. (1 Makorinte 6:9-11; Sinulo 21:8) Bibele ibonisa kuli libi zeo lishutana ni sibi seluezanga ka kusanahanisisa kamba ka kusalela, inge cwalo kubulela kamba kueza lika zeutwisa babañwi butuku. (Liproverbia 12:18; Maefese 4:31, 32) Niteñi, Bibele ilususueza kusanyinyafaza sibi sifi kamba sifi, kakuli kueza cwalo kukona kutahisa kuli lulobe milao ya Mulimu ni kueza sibi sesituna.—Mateu 5:27, 28.

2.   Libaka lelitahisize kuli mutu aeze sibi. Batu babañwi baezanga sibi kakuli habazibi zatokwa Mulimu ku bona. (Likezo 17:30; 1 Timotea 1:13) Nihaike kuli Bibele haiyemeli batu babaeza cwalo, ibonisa kuli sibi sesicwalo sashutana ni sibi sa mutu yaloba milao ya Mulimu kabomu. (Numere 15:30, 31) Mutu yaeza sibi kabomu ueza cwalo kabakala “pilu yahae yemaswe.”—Jeremia 16:12.

3.   Mutu naaezize sibi seo hakai. Bibele hape ibonisa kuli kunani shutano ye mwahalaa kueza sibi hañwi ni kukuta-kutela kueza sibi ka nako yetelele. (1 Joani 3:4-8) ‘Babaeza sibi ka bomu,’ niha sebazibile lika zelukile, bakafiwa katulo ki Mulimu.—Maheberu 10:26, 27.

 Batu babaezize sibi sesituna bakona kuikutwa hahulu mulatu kabakala sibi sebaezize. Ka mutala, Mulena Davida naañozi kuli: “Lifoso zaka linizengelezi fa toho; liniimezi hahulu inge mushimbo obukiti.” (Samu 38:4) Nihakulicwalo, Bibele isepisa kuli: “Mutu yamaswe atuhele nzila yahae ni yalunya atuhele mihupulo yahae; akutele ku Jehova, yena yaka mushemuba, akutele ku Mulimu waluna, kakuli uka muswalela ka kutala.”—Isaya 55:7.