TABA YA BUTUKU BOBUTAHISWA KI KUSHWELWA KI MULATIWA KI YONA YEBULEZWI HAHULU KWA LITABA ZEEZAHEZI MWA LINAKO ZALUNA. Niteñi, sina mokuboniselizwe kwa makalelo, likelezo zebafanga licaziba babañwi hañata zalumelelana ni litaba zebutali zakale ili zefumaneha mwa Bibele. Taba yeo ibonisa hande kuli ketelelo ye mwa Bibele ki ya kamita. Mane kwandaa likelezo zetusa zeo, mwa Bibele kunani litaba zeñata. Mwa Bibele lufumana litaba zelusa koni kufumana kusili ili zekona kuomba-omba hahulu batu babashwezwi.

• Sepiso ya kuli balatiwa baluna babashwile habanyandi

  Kwa Muekelesia 9:5, Bibele ibulela kuli, “babashwile hakuna sebaziba.” Mi ‘mihupulo yabona yafela.’ (Samu 146:4) Ka kulumelelana ni taba yeo, Bibele iswaniseza lifu kwa buloko bobutuna. —Joani 11:11.

• Kuba ni tumelo yetuna ku Mulimu ya lilato kwa omba-omba

  Kwa liñolo la Samu 34:15, Bibele ili: “Meeto a Jehova * atalimezi babalukile, mi mazebe ahae ateeleza mihuwo yabona ya kukupa tuso.” Kutaluseza Mulimu ka tapelo maikuto aluna kutusa hahulu kufita kalafo yende hahulu. Kueza cwalo kulutusa kueza silikani ni Mubupi waluna ili yakona kuluomba-omba ka kuitusisa maata ahae.

• Sepo yende ya kwapili yeluswanela kunyolelwa

  Munahane ka za nako ya kwapili ili fo batu babainzi mwa mabita bakazusiwa kwa bafu ni kuto pila fa lifasi! Bibele ikuta-kutezi kubulela ka za nako yeo. Bibele ibulela moikabela miinelo ka nako yeo fa lifasi kuli, Mulimu “ukatakula miyoko kaufela kwa meeto [aluna], mi lifu halisana kubateñi, nihaiba kutahelwa ki maswabi kamba kulila kamba kuutwa butuku.”—Sinulo 21:3, 4.

Buñata bwa batu babanani tumelo ku Jehova, yena Mulimu wa niti yabulezwi mwa Bibele, bafumananga maata akutiyela muinelo wa kushwelwa kakuli banani sepo ya kubona hape balatiwa babona babashwile. Ka mutala, bo Ann, ili babashwezwi ki bo muunaa bona bane banyalani ni bona ka lilimo ze 65, babulela kuli: “Bibele inikolwisa kuli balatiwa baluna babashwile habanyandi ni kuli Mulimu ukazusa batu kaufela babahupulwa ki yena. Ka nako kaufela hanihupulanga za lifu la bakuluna, mihupulo yeo yatahanga, mi ka libaka leo nibanga ni maata akukona kutiyela butuku bwa kushwelwa!”

Bo Tiina, babatalusizwe kwa makalelo a litaba ze mwa magazini ye, babulela kuli: “Kuzwa feela fa lizazi lene batimezi bo Timo, nilemuhile kuli Mulimu unitusize. Niiponezi hande tuso ya Jehova ka nako yene nibile mwa maswabi. Mi ninani buikolwiso bobutuna bwa kuli sepiso ya mwa Bibele ya kuli bafu bakazuha, ikatalelezwa luli. Sepiso yeo initusa kuzwelapili kuitiisa kufitela nibonana ni bo Timo hape.”

Maikuto ao ki ona ebanani ona batu babañata babalumela kuli lisepiso za mwa Bibele zasepahala. Haiba muikutwa kuli lisepiso za mwa Bibele halina kutalelezwa kamba kuli ki tolo feela, muswanela kubatisisa bupaki bobubonisa kuli likelezo ni lisepiso ze mwa Bibele ki za niti. Mi mukalemuha kuli Bibele ki yona feela yekona kutusa hande batu babashwezwi.

Mubuhe mavidio abulela ka za taba ye, fa webusaiti ya jw.org/loz

 BABASHWILE BA MWA MUINELO MAÑI?

KANA MWATABELA TABA YENDE?