LIÑONGOLO likonisa likupa kupila mwa libaka zetaata, ili kulitusa kutiyela miinelo yekona kulitahiseza kozi fa lilaho la liwate. Buikoneli bwa liñongolo bo bwakusileleza hande likupa, butahisize kuli bomanjinela babañwi baitute moibupehezi ñongolo ilikuli balikanyise sibupeho seo ka kupanga limota ni miyaho yekasilelezanga batu baba mwa limota zecwalo kamba baba mwa miyaho yeo.

Munyakisise taba ye: Bomanjinela nebanyakisisize mifuta yemibeli ya liñongolo, ili bivalve (ñongolo yeswalani kwa lineku lililiñwi kono ili yekona kukwaluha ni kukwala) ni spiral (ñongolo yebupehile inge mapo yebizwa screw).

Hane banyakisisize ñongolo ya bivalve, nebafumani kuli haiba kuba ni nto yelimba ñongolo yeo, bukiti bwa kulimbiwa bukautwahalela kokukopanela likalulo zepeli za ñongolo ni kwa matuko ayona. Ka kushutana ni ñongolo ya bivalve, bukiti bwa nto yelimbile ñongolo yebupehile inge mapo yebizwa screw, buutwahalelanga kwatasi ni kwahalimu a ñongolo yeo. Mwa miinelo yeo kaufela, molibupehezi liñongolo zeo kutahisa kuli bukiti buutwahalele kwa likalulo zetiile za liñongolo zeo, ili nto yetusa kuli haiba kuba ni kozi yetuna, likupa ze mwa liñongolo zeo lisilelezwe.

Babatisisi hape nebabapanyize shutano ya zeezahala bukiti habulimba liñongolo za luli ni habulimba lika zeñwi zepangilwe ka kulikanyisa feela sibupeho sa liñongolo zebulezwi fahalimu, ka kuitusisa mushini wa 3-D printer. Lipatisiso zeo nelibonisize kuli liñongolo za luli halibapanywa kwa liñongolo zepangilwe ka kulikanyisa feela molibupehezi liñongolo za luli, litiile hahulu halilimbiwa ki nto yeñwi.

Buka yebizwa Scientific American ibulela cwana ka zekona kuitutiwa kwa patisiso yeo: “Haiba nako yeñwi mutu ukamata mwa mota yepangilwe ka kulikanyisa moibupehezi ñongolo, mota yeo ikabuheha mi ikakona kusileleza batu baba ku yona.”

Mubona cwañi?: Kana molibupehezi liñongolo, nekuitahezi feela ka kuipilaula? Kamba kana sibupeho seo nesiezizwe ki Mubupi?