Musebezi O Ne U Lelilwe Hande U Tahisa Siselo

María Isabel ki kalibe ya li muhasanyi ya tukufalezwi ya pila mwa tolopo ya San Bernardo mwa naha ya Chile ye fumaneha kwa South America. Maria ni ba lubasi lwa hae ki ba mushobo wa Mapuche o fumaneha mwa Chile. Lubasi lo kaufelaa lona lu sebelize ka taata kuli ku tomiwe puteho ye nca ye itusisa puo ya Mapuche, ili puo ye bizwa hape kuli Mapudungun.

Ha ne ku filwe zibiso ya kuli ba sikwata sa Mapudungun ni bona ba ka eza Kupuzo ya lifu la Kreste ni kuli tupampili twa mwa puo ya Mapuche twa ku memela batu kwa kupuzo to tu eza 2,000 ne tu lukisizwe kuli tu abelwe, María Isabel a nahanisisa za naa swanela ku eza. Maria Isabel naa ka ezañi kuli a tuse mwa musebezi wa ku abela tupampili to? María Isabel naa hupuzi ze ne ba ezize Lipaki ba bañwi ba mikulwani ili be ne ba ikozi ku kutaza kwa batu be ne ba kena ni bona sikolo hamohocwalo ni baluti. María Isabel a ambola ni bashemi ba hae ka za taba yeo, mi kaufelaa bona ba lumela kuli María Isabel a shimbe tupampili to tuñwi kwa sikolo. María Isabel naa ka eza cwañi musebezi wo?

María Isabel a kupa tumelezo kwa bazamaisi ba sikolo kuli a mameke kapampili ka ku memela batu kwa kupuzo kwa makenelo a sikolo. Bazamaisi bao ba lumela kuli a eze cwalo mi ba mu babaza kabakala muhupulo wa hae. Zazi le liñwi kakusasana, muzamaisi wa sikolo a zibisa bana ba sikolo kuli María Isabel u mamekile kapampili ka ku memela batu kwa kupuzo!

Hamulaho, María Isabel a kupa kuli a potele bana ba sikolo mwa makilasi kaufela. Baluti ha se ba mu lumelelize ku eza cwalo, María a buza mwa kilasi ni kilasi haiba ku na ni batu be ne ba bulela puo ya Mapuche. María Isabel u bulela kuli: “Ne ni nahana kuli mwendi ku ka fumaneha feela bana ba sikolo ba 10 kamba ba 15 ba ba bulela puo ya Mapuche, kono nee ku fumanehile ba bañata luli, ne ni file tupampili twa ku memela batu kwa kupuzo kwa batu ba ba eza 150!”

“NEE BA HUPULA KULI NI MUTU YO MUHULU”

Musali yo muñwi ya naa boni pampili ye ne mamekilwe yeo kwa makenelo a sikolo naa buzize kuli naa swanela ku bona mañi kuli a buze za pampili yeo. Musali yo naa komokile hahulu ha ne ba mu isize ku musizana ya na ni lilimo ze lishumi! María Isabel u bulela inze a menya kuli: “Basali bao nee ba hupula kuli ni mutu yo muhulu.” Ha sa ba file kapampili ka ku ba memela kwa kupuzo ni ku ba taluseza ka bukuswani za kapampili kao, María Isabel a kupa basali bao kuli ba mu fe keyala ya bona ilikuli yena ni bashemi ba hae ba yo potela basali bao kuli ba yo ba taluseza ze ñata ka za Mubuso wa Mulimu. Bahasanyi ba 20 ba mwa sikwata sa Mapudungun ne ba tabile hahulu ha ne ba boni kuli musali yo ni batu ba 26 ba ba tabela ba naa tile ni bona be ne ba bulela puo ya Mapuche ne ba fumanehile kwa kupuzo. Sikwata sa Mapudungun se li puteho ye eza hande!

Ku si na taba ni fo mu fita, kana mwa kona ku eza nto ye swana ka ku mema be mu kena ni bona sikolo, kamba be mu beleka ni bona kuli ba to fumaneha kwa Kupuzo, kwa ngambolo ya nyangela, kamba kwa mukopano wa sikiliti? Mwa kona ku eza patisiso mwa lihatiso za luna kuli mu fumane litaba ze kona ku mi tusa ku peta hande musebezi wo. Hape, mu lapele ku Jehova kuli a mi fe moya wa hae o kenile kuli u mi tuse ku ba ni bundume bwa ku bulela za hae. (Luka 11:13) Ha mu ka eza cwalo, ni mina mu ka komoka hahulu ni ku susuezwa bakeñisa ze nde ze ka zwa mwa musebezi o ne mu lelile hande.