Taba ye Nde Kwa Batu Kaufela

Zuho ya Jesu ne i tahisize kuli balutiwa ba hae ba be ni buikolwiso ni tukufalelo. Ka mutala, muapositola Paulusi naa tamile misipili ya ku ya kwa sibaka kaufela sa Asia Minor ni sa Mediteranea, inzaa onga-onga liputeho ni ku tiisa Bakreste kuli ba zwelepili ku tiyela miliko ni nyandiso ye situhu. Ku si na taba ni matata a cwalo, Bukreste ne bu zwezipili ku hula ni ku yanduluka.

Hamulaho, Paulusi naa lengilwe mwa tolongo. Kono niha naa li mwa tolongo cwalo, Paulusi naa ñozi mañolo a ku susueza ni ku eleza liputeho za Sikreste. Naa lemusize kuli ne ku ka ba ni butata bo butuna, bona bwa bukwenuheli. Ka ku etelelwa ki moya o kenile wa Mulimu, Paulusi naa bonelezi cimo kuli “maakanyani aa buhali” a bulela “litaba ze kopami” naa ka kena mwahalaa bona mi naa ka ‘yembulula balutiwa, kuli ba a latelele.’—Likezo 20:29, 30.

Kwa mafelelezo a linako za baapositola, bukwenuheli bo, ne se bu kalile ku ba teñi. Ibato ba ka nako yeo, Jesu ya naa zusizwe kwa bafu naa file Sinulo ku muapositola Joani, ili ku mu bonisa ka liponiso lika ze ne ka ezahala kwapili. Sina mwa naa ñolezi Joani ka nako yeo, balwanisi kamba baluti ba buhata ne ba si ke ba kona ku palelwisa Mulimu ku peta ka ku tala mulelo wa hae wa kwa makalelo ka za lifasi ni batu. Batu ba “macaba kaufela ni mishobo ni malimi,” ba ka utwa taba ye nde ya Mubuso wa Mulimu. (Sinulo 14:6) Lifasi li ka ba Paradaisi hape, mi mutu ufi kamba ufi ya tabela ku eza tato ya Mulimu u ka kona ku pila mwateñi!

Kana mu ikutwa kuli yeo ki “taba ye nde”? Haiba mu ikutwa cwalo, mu itute ze ñata ka za lushango lwa Mulimu kwa batu lo lu fumaneha mwa Bibele mi mu itute mo mu kona ku tusezwa ki lushango lo ka nako ya cwale ni kwapili.

Mwa kona ku ipalela Bibele fa Webusaiti ya www.mt711.com. Fa Webusaiti yeo, mwa kona hape ku bala broshuwa ya Taba ye Nde ye Zwa ku Mulimu! ni buka ya Bibele I Lutañi Luli? hamohocwalo ni libuka ze ñwi ze bonisa libaka ha lu kona ku sepa Bibele ni mo lu kona ku itusiseza likelezo za yona mwa lubasi lwa luna ni mwa bupilo bwa luna bwa ka butu. Kamba mwa kona ku kupa yo muñwi wa Lipaki za Jehova kuli a mi taluseze litaba ze ñwi ze ñata.

—Taba ye i tomile fa Likezo, Maefese, Mafilipi, Makolose, Filemoni, 1 Joani, ni Sinulo.