Ba Adama ne Eva i bantu babajinji kulonga bubi. Pobātombokēle Leza na kudya ku “mutyi wa kuyuka biyampe ne bibi,” bālongele byobya bitwa na bantu bavule bu bubi bubajinjibajinji. a (Ngalwilo 2:16, 17; 3:6; Bene Loma 5:19) Ba Adama ne Eva bādi bebakande ku uno mutyi mwanda wādi welekeja lupusa lwa Leza, lwa kulombola bantu kiyampe ne kibi. Abo pa kudya ku mutyi, ba Adama ne Eva bākwete butyibi bwa kwiendeja abo bene, bwa kwitongela kiyampe ne kibi. Pa kulonga namino, bāpelele lupusa lwa Leza.

•  Le “bubi bubajinjibajinji” bwāletēle ba Adama ne Eva bika?

•  Le “bubi bubajinjibajinji” i bwituletele bika?

•  Le Tubwanya kunyongololwa ku bintu bilupukile ku “bubi bubajinjibajinji?

•  Milangwe ya bubela pa mwanda utala “bubi bubajinjibajinji”

 Ba Adama ne Eva bānunupile ne kufwa mwanda bājilwile. Bāonene kipwano kyabo na Leza ne kujimija kyepelo kya kukamona būmi bwa nyeke na bukomo bwa ngitu bubwaninine.—Ngalwilo 3:19.

 Ba Adama ne Eva bāsambulwidile babo bana bonso bubi. Bidi pamo’nka na bambutwile basambwilanga bana misongo. (Bene Loma 5:12) Mu uno muswelo, bantu bonso i babutulwe “mu bubi,” b ko kunena’mba twi babutulwe bampikwa kubwaninina kadi banenwe kulonga bilubo.—Ñimbo ya Mitōto 51:5; Bene Efisesa 2:3.

 Byotupyene bubi, nansha kubulwa kubwaninina, tubelanga, tununupanga ne kufwa. (Bene Loma 6:23) Kadi tususukanga na bintu bibi bilupuka ku bilubo byetu ne bya bakwetu.—Musapudi 8:9; Yakoba 3:2.

 En-en. Bible unena’mba Yesu wāfwile bu “kitapwa kya kupūta bubi bwetu.” (1 Yoano 4:10, kunshi kwa dyani) Kitapwa kya Yesu kibwanya kwitunyongolola ku bintu bilupukile ku bubi botupyene ne kwitulengeja twikale na bintu byājimije ba Adama ne Eva—kyepelo kya kukamona būmi bwa nyeke kadi na bukomo bwa ngitu bubwaninine.—Yoano 3:16. c

 Mulangwe wa bubela: Bubi bubajinjibajinji i bwitupalule kudi Leza lonso.

 Bubine: Leza ketutopekangapo pa bintu byālongele Adama ne Eva. Aye uyukile amba twi bampikwa kubwaninina, kadi ketusakilangapo tulonge bintu byoketubwanyapo kulonga. (Ñimbo ya Mitōto 103:14) Nansha byotususuka na bintu bilupuka ku bubi botupyene, tudi na mukenga ne dyese dya kupwana na Leza.—Nkindi 3:32.

 Mulangwe wa bubela: Lubatyijo lunyongololanga muntu ku bubi bubajinjibajinji, o mwanda bana ba lukeke bafwaninwe kubatyijibwa.

 Bubine: Nansha lubatyijo byoludi na mvubu pa kupanda, ino kintu kitōkejanga muntu ku bubi i’nka kitapwa kya Yesu kete. (1 Petelo 3:21; 1 Yoano 1:7) Lwitabijo lwa bine byolwimanine pa kwikala na buyuki, bana kebabwanyapo kwikala na lwitabijo. O mwanda Bible ketabijepo bana kubatyijibwa. Ye mobyādi bikadile na bene Kidishitu babajinji. Kebādipo babatyija bana ba lukeke, ino bantu ba lwitabijo—“bana-balume ne bana-bakaji” bādi betabije mu Kinenwa kya Leza.—Bilongwa 2:41; 8:12.

 Mulangwe wa bubela: Leza wāfingile bana-bakaji mwanda Eva ye wādīle dibajinji ku kipa kijidikwe.

 Bubine: Leza kāfingilepo bana-bakaji, ino wāfingile “nyoka wa kala na kala, yewa witwa bu Dyabola ne bu Satana,” wāsoñenye Eva alonge bubi. (Kusokwelwa 12:9; Ngalwilo 3:14) Ne kadi, Leza wātopekele dibajinji Adama pa bubi bubajinjibajinji, ke wandi mukajipo.—Bene Loma 5:12.

 Mwanda waka Leza wānenene amba Adama ukabikalanga wandi mukaji? (Ngalwilo 3:16) Leza pa kunena bino binenwa, ke kunenapo amba wadi witabije kino kilongwa. Wādi’tu ulaya bintu bibi byādi bya kulupuka ku bubi. Leza usakanga mwana-mulume asanswe ne kulēmeka wandi mukaji enka ne kulēmeka bana-bakaji bonso mu kikonge.—Bene Efisesa 5:25; 1 Petelo 3:7.

 Mulangwe wa bubela: Bubi bubajinjibajinji i kulāla kobālēle.

 Bubine: Bubi bubajinjibajinji ke kulālapo mwanda:

•   Leza wāsoñenye Adama kuleka kudya ku mutyi wa kuyukanya biyampe ne bibi aye Adama papo ukidi bunka, kungulume.—Ngalwilo 2:17, 18.

•   Leza wānenene ba Adama ne Eva amba “butulai mwivudijei”—ko kunena’mba kubutula bana. (Ngalwilo 1:28) Byadi bya kwikala bibi bininge shi Leza wāpēle ba mulume ne mukaji babajinji mfuto mwanda wa kulonga kintu kyaēbasoñenye kulonga.

•   Ba Adama ne Eva bālongele bubi wa pandi wa pandi—Eva wāshilula kupwa ke wandi mulume.—Ngalwilo 3:6.

•   Bible witabije kulāla kwa ba mulume ne mukaji.—Nkindi 5:18, 19; 1 Bene Kodinda 7:3.