Le Bupolofeto Butala Padi Meshiasa Bulombola’mba Yesu Ye Meshiasa?
Bilondolola Bible
En-en. Yesu paādi pano pa ntanda, wāfikidije bupolofeto buvule butala padi “Meshiasa Mutangidiji,” mwine wādi wa kwikala “Umpandiji wa ino ntanda.” (Danyele 9:25; 1 Yoano 4:14) Nansha ke pāfwile Yesu, wāendelele kufikidija bupolofeto butala padi meshiasa.—Ñimbo ya Mitōto 110:1; Bilongwa 2:34-36.
Le kishima “Meshiasa” kishintulula bika?
Kishima kya Kihebelu Ma·shiʹach (Meshiasa) ne kishima kidingakene nakyo kya Kingidiki Khri·stos (Kidishitu), abyo byonso bishintulula’mba “Mushingwe Māni.” Nanshi dijina “Yesu Kidishitu” dishintulula’mba “Yesu Mushingwe Māni,” nansha “Yesu Meshiasa.”
Mu bitatyi byāsonekelwe Bible, divule dine muntu pa kushingwa māndi bādi bamupungulwila māni pa mutwe mwanda wa kwingila mwingilo wa pa bula. (Bene Levi 8:12; 1 Samwele 16:13) Yesu bāmushingile māni kudi Leza, wāikala ke Meshiasa—kyepelo kya lupusa lukatampe. (Bilongwa 2:36) Inoko, pa kyaba kya kushinga Yesu māni eshiñwanga’a, Leza wāmushingile’o na mushipidi ujila.—Mateo 3:16.
Le i bantu bavule badi ba kufikidija bupolofeto butala padi Meshiasa?
Aa. Monka mobayukilanga muntu kupityila ku mishiko ya ku minwe, bupolofeto bwa mu Bible bwadi bwa kufikidila’nka padi Meshiasa umo kete, nansha Kidishitu. Inoko Bible udyumuna’mba, “kukatamba Bakidishitu ba bubela ne bapolofeto ba bubela kadi bakalonga biyukeno bikatampe ne bintu bya kutendelwa amba, shi bibwanika, bongole enka ne batongwe bene.”—Mateo 24:24.
Le Meshiasa ukamweka mu mafuku a kumeso?
Aa. Bible wālaile amba Mashiasa wadi wa kutamba ku lutundu lwa Davida mulopwe wa Isalela. (Ñimbo ya Mitōto 89:3, 4) Inoko, bilembwa bya musuku wa Bayuda bya kushilwila pa Davida byājimine, mobimwekela byāonakanibwe kitatyi kyobāonakenye Yesusalema kudi bene Loma mu 70 Yesu Ke Mwiye. a Tamba mu kine kitatyi’kya, i kutupu muntu ubwanya kuleta bukamoni bulombola’mba i wa ku kisaka kya mulopwe Davida. Ne kadi, bilembwa bya musuku byobyā’ko mu kitatyi kya Yesu, enka ne balwana nandi kebābwenyepo kupatana’mba i wa ku lutundu lwa Davida.—Mateo 22:41-46.
Le mu Bible mudi bupolofeto bunga bwisambila padi Meshiasa?
I bikomo kutela buvule bwine bwa bupolofeto butala padi Meshiasa. Kimfwa manwa a mwa kubadila bupolofeto abwanya kwishila, enka ne bisonekwa bisambila padi Meshiasa. Kisonekwa kya Isaya 53:2-7 kinena myanda mivule ya bupolofeto butala padi Meshiasa. Bantu bamo babwanya kubala bino bosonekwa byonso bu bupolofeto bumo, ino bakwabo nabo babwanya kumona mwanda ne mwanda bu bupolofeto pabula.
Bupolofeto bumobumo butala padi Meshiasa bwāfikidile padi Yesu
Bupolofeto |
Pobudi |
Kufikidila |
|---|---|---|
Lutundu lwa Abalahama |
||
Lutundu lwa Izake mwanā Abalahama |
||
Mubutulwe ku kisaka kya bwine Isalela kya Yuda |
||
Wa ku musuku wa Mulopwe Davida |
||
Mubutulwe na mujike |
||
Mubutwilwe mu Betelema |
||
Wāityilwe bu Emanyuele b |
||
Wābutwilwe mu kisaka kilanda |
||
Bana batyetye bāipailwe aye pa kubutulwa |
||
Wāityilwe atambe mu Edipito |
||
Wāityilwe bu mwine Nanzala c |
||
Wātangidilwe na mukendi |
||
Wāshingilwe māni ke Meshiasa mu 29 Y.M. d |
||
Leza wāmwityile bu wandi Mwana |
||
Bupyasakane mwanda wa njibo ya Leza |
||
Musapudi wa myanda miyampe |
||
Busapudi bwandi mu Ngadilea i kitōkeji kikatampe |
||
Walonga bingelenge pamo bwa Mosesa |
||
Wisamba milangwe ya Leza pamo bwa Mosesa |
||
Wābelwile babela |
||
Kākokelepo milangwe pādi |
||
Wāivwanine babimonya-malwa lusa |
||
Wāmwekeje boloke bwa Leza |
||
Mudingidi Utendelwa |
||
Wāsapwile dijina dya Yehova |
||
Wāfundije na byelekejo |
||
Mutangidiji |
||
Bavule kēbamwitabijepo |
||
Dibwe dya kukukala |
||
Wāpelelwe na bantu |
||
Bāmushikilwe pampikwa mwanda |
||
Wātwelele na ntumbo mu Yelusalema |
||
Watendelwa na bana |
||
Waiya mu dijina dya Yehova |
||
Waabwa na mulunda mukulupilwe |
||
Wapotejibwa ku bibese 30 bya ndalama e |
||
Balunda bāmunyemene |
||
Bāmutūdile bukamoni bwa bubela |
||
Wāubile tala kumesa a bamusambila |
||
Bāmupelēle mata |
||
Bāmukupile ku mutwe |
||
Bāmukupile nsonde |
||
Kālongelepo kintu boba bādi bamukupila |
||
Bendeji ba ntanda bāmukutyīle kitumba |
||
Bāmupopele makasa ne malu ku mutyi |
||
Bantu bātele kivwalwa kyandi bubale |
||
Wābadilwe mu bantu ba bubi |
||
Wāfutulwilwe, wātukwa |
||
Wāsusukile pa mwanda wa bantu ba bubi |
||
Wāmwekele bu mwelwe na Leza |
||
Bāmupele vinyu ne ndulwe atome |
||
Wāivwene kyumwa kumeso kwa kufwa |
||
Wāpele Leza mushipiditu wandi |
||
Wāpēne būmi bwandi |
||
Wāletele kinkulwa kya kutalula bubi |
||
Mikupa yandi keyātyumwinwepo |
||
Bāmutapile |
||
Wājīkilwe na mpeta |
||
Wāsangwilwe mu bafwe |
||
Nzanzangi wāpingakanibwa |
||
Wāshikete ku kuboko kwa lundyo kwa Leza |
a McClintock ne dibuku dimo (Strong’s Cyclopedia) unena’mba: “Na bubine, mikanda ya bisaka bya Bayuda yāonakanibwe mu bonakani bwa Yelusalema, ke kumesopo kwa bonakani.”
b Kishima kya Kihebelu Emanyuele, kishintulula’mba “Leza Udi Netu,” kifunkila pa mwingilo wa Yesu wa bu Meshiasa. Kwiya kwawāile pano panshi ne mwingilo wandi, byālombwele amba Leza udi na batōtyi bandi.—Luka 2:27-32; 7:12-16.
c Mobimwekela kishima “Nanzala” i kitambe ku kishima kya Kihebelu neʹtser, kishintulula’mba “mutombo.”
d Shi usaka kuyukila’ko bivule pa mbadilo ya bitatyi bya mu Bible byetukweshe tutane mwaka wa 29 Yesu Ke Mwiye, bu mwaka wāile Meshiasa, tala kishinte kinena’mba “Bupolofeto bwa Danyele Mobwālaile Kwiya kwa Meshiasa.”
e Buno bupolofeto budi mu mukanda wa Zekadia, ino Mateo mulembi wa Bible unena’mba bwānenenwe “kupityila kudi mupolofeto Yelemia.” (Mateo 27:9) Bimweka’mba mukanda wa Yelemia wādi kyaba kimo mubajiji mu mikanda mikwabo itwa bu “Bapolofeto.” (Luka 24:44) Mobimwekela Mateo wātelele “Yelemia” mwanda wa kwisambila pa ino mikanda yonso, mubadilwa ne mukanda wa Zekadia.
