LUZIA USUNKUTANGA KULU KWA LUNKUSO. Paadi ukidi mwanuke, waponene bulebe, misongo isambuka mine idi na lupusa pa bukomo bwa bongolo. Paadi na myaka 16, lolo umo, kwine kwadi kwingidila Luzia wamunene amba, “Leza wakupele mfuto ya bulebe mwanda kwadipo ukōkele inobe kadi wadi umususula na mwiendelejo obe.” Nansha byokepapite myaka mivule, Luzia ukivulukanga mobyamusanshile.

DAMARIS POBAMUKWETE DYAYA DYA MU BONGOLO, shandi wamwipangwile amba: “Le kudi kyolongele kyalengeja ukwatwe na ino misongo? Kudi kintu kibi kyolongele. O mwanda Leza wakupe mfuto.” Damaris watyumukilwe mutyima mwanda wa bino binenwa.

Mulangwe wa amba misongo i mfuto itamba kudi Leza i wa tamba kala. Dibuku Manners and Customs of Bible Lands dinena’mba bantu bavule mu kitatyi kya Kidishitu bādi bakulupile amba “misongo itambanga ku bubi bulongele mwine ubela’wa, nansha bulongele babutule bandi, ne ino misongo i mfuto yawapebwa pa bubi’bwa.” Mu Myaka ya pa Bukata namo, “bantu bamo badi bakulupile amba Leza uletanga bipupo mwanda wa kwibapa mfuto pa bubi bwabo,” mo munenena Medieval Medicine and the Plague. Penepa bantu midiyo ne midiyo pobafwile ku kipupo mu Bulaya mu myaka ya katwa 14, le bwadi butyibi bwa Leza pa bantu babi? Nansha le kyadi’tu kipupo kyaletelwe na bīshi bya misongo, na mwanenene bakimbi ba kiñanga? Bantu bamo babwanya kwiipangula’mba, le bine Leza ususulanga bantu na misongo pa mwanda wa bubi bwabo? *

LANGULUKA’PO BIDI: Mwanda waka Yesu wābelwile babela shi kwadi amba misongo ne masusu i mfuto itamba kudi Leza? Mwene wādi wa kupēleka butyibi ne boloke bwa Leza? (Mateo 4:23, 24) Yesu kādipo wa kukalakanya nansha dimo bilongwa bya Leza. Wānenene amba: “Noñanga kyaba kyonso bimusangaja,” ne amba, “Noñanga monka munsoñaninye Tata kulonga.”​—Yoano 8:29; 14:31.

Bible udi padi tō. Yehova Leza i “wampikwa bukondame nansha patyetye.” (Kupituluka 32:4) Kimfwa, Leza kabwanyapo kulengeja akishida ya amviyo ne kwipaya bantu tutwa na tutwa bampikwa mambo, mwanda’tu wa kupa muntu umo mfuto udi mu amviyo’mwa! Pangala pa boloke bwa Leza, Abalahama, mwingidi wa Leza wa kikōkeji wānenene amba Leza kabwanyapo nansha dimo “kutukija boloke pamo na babi.” Wānenene amba, “Kebibwanikapo.” (Ngalwilo 18:23, 25) Kadi Bible unena’mba “kebibwanikapo Leza . . . kulonga bintu na nshikani” nansha “kulonga bibi.”​—Yoba 34:10-12.

Masusu otwikonda nao ke mfutopo itamba kudi Leza pa mwanda wa bubi kampanda botulongele. Yesu wātōkeje uno mwanda aye ne bandi bana ba bwanga pobāmwene muntu wādi mpofu tamba kubutulwa kwandi. “Bandi bana ba bwanga bamwipangula’mba: ‘A Labi, le ulongele bubi i ani, i uno muntu’ni, i bambutwile bandi, amba abutulwe mpofu?’ Yesu walondolola’mba: ‘Ke uno muntupo nansha bambutwile bandi balongele bubi, ino i mwanda wa mingilo ya Leza isokokele patōka pa mwanda wandi.’”​—Yoano 9:1-3.

Byobādi batādilwe na uno mulangilo mubi, bana ba bwanga ba Yesu bātulumukile pēbalombwele Yesu amba ke uno muntupo ulongele bubi nansha  bambutwile bandi amba abutulwe na buno bulema. Yesu kābelwilepo’tu’nka uno muntu kete, ino wālemunwine ne nkulupilo ya bubela ya amba misongo i mfuto itamba kudi Leza. (Yoano 9:6, 7) Boba basusuka na misongo mikomo dyalelo babwanya kusengibwa pa kuyuka’mba ke Lezapo ulengeja masusu abo.

Bisonekwa bitupa kikulupiji

• “Leza kabwanyapo kutompibwa na bintu bibi, nansha aye kutompa muntu.” (YAKOBA 1:13) Na bubine, “bintu bibi” bisusula muzo wa muntu mu bula bwa myaka tutwa na tutwa, kubadila’mo misongo, njia, ne lufu, bisa kupwa panopano ponka.

• Yesu Kidishitu wābelwile “bonso badi babela.” (MATEO 8:16) Pa kubelula bonso bādi bāya kwadi, Mwanā Leza wālombwele byobya bikalonga Bulopwe bwa Leza pano pa ntanda ponso.

• “[Leza] ukapampulanga impolo yonso mu meso abo, ne lufu kelukekala’kopo dikwabo, nansha madilo nansha miyoa nansha misanshi mine keikekala’kopo monka. Bintu bya kala bibapu kupita.”​—KUSOKWELWA 21:3-5.

Penepa, mwanda waka bantu batanwanga na njia ne masusu? Pano kepadi myaka tutwa na tutwa, bantu balangulukilanga pa kino kipangujo. Shi ke Lezapo ulengeja masusu, penepo i ani wialengeja? Kishinte kilonda’ko kisa kulondolola bino bipangujo.