Bible ke dibukupo dya kiñanga, ino nansha nankyo uletanga madingi a tunangu. Ano madingi abwanya kukwasha muntu wikonda na misongo ya mu ñeni. Bandaula bimfwa bimobimo.

“Bakomo kebadipo kyobasakila muñanga, poso boba babela.”—MATEO 9:12.

Bible unena’mba usakilwa bundapi. Bantu bavule babela misongo ya mu ñeni bakimbanga bulombodi ne bukwashi ku badokitele.

“Makayo a kukomeja ngitu i mayampe.”—1 Temote 4:8, Myanda Miyampe.

Shi witūdila’ko kitatyi kya kwitamuna bidyoma, ukekala na bukomo mu ngitu ne mu ñeni. Kadi bikulomba kudya biyampe ne kulāla kumeso kwa kitatyi.

“Mutyima wa nsangaji i bwanga buyampe, ino mushipiditu muvingakane utyepejanga bukomo bwa muntu.”—NKINDI 17:22.

Kutanga bisonekwa bya mu Bible bikankamika ne kwitungila bitungo byobwanya kufikila’po, bibwanya kukukwasha wikale na nsangaji. Kuta mutyima ku bintu biyampe ne  kukulupila amba bintu bisa kushita kumeso’ku, kubwanya kukukwasha shi ubēlanga misongo ya mu ñeni.

“Tunangu tudi na boba batūkanye.”—NKINDI 11:2.

Shi kudi bintu byokukibwanyapo kwilongela abe mwine, nabya itabija bukwashi bwa bakwabo. Balunda ne ba mu kisaka babwanya kukukwasha, ino kebayukilepo mwa kukukwashisha. Wibalombole byobabwanya kulonga pa kukukwasha, kokibalomba bakulongele bintu bivule, ino abewa wibafwijeko’tu pa bine byobakulongela.

“Kitatyi kimo na bēlele, nakemona na muñanga mwana-mukaji, waumpima wankwata byombēla. Kuyuka misongo yombēla kwaunkweshe ndyuke ngikadilo yondi’mo. Kadi naipangwile ne miswelo palapala yobabwanya kuñundapa.”—Nicole, a ubelanga misongo ya kujinwa mutwe.

“Kutangila Bible pamo na wami mukaji kunkwashanga nshilule difuku dyami biyampe na milangwe yubaka. Kadi panangukanga misongo, ngikalanga na kisonekwa kimo kinteñanga ku mutyima.”—Peter, wa misongo ya kujinwa ñeni.

“Byadi binkomena kulombola muntu misongo yami mwanda binkwatanga bumvu. Mulunda nami wa pabwipi untejanga kadi uloñanga bukomo bwa kwivwanija moneivwanina, unkwashanga neivwane biyampe ne kwimona bu nkidipo bunka.”—Ji-yoo, wa misongo ya kudyadyakanya bintu.

“Bible waunkweshe ngikale na bujalale pa bukata bwa kaji ne kukōkolokwa. Tunangu twa mu Bible twaunkweshe bininge mu misongo yami.”—Timothy, wa misongo ya kujinwa ñeni.