Mwa Kulwila na Bimpengele bya Kipangila

Pa mwanda wa kuvula kwenda kuvula bimpengele bya kipangila ne bonakani bwabyo, le muntu ukalonga bika pa kulwa nabyo? Tubandaulei’ko matabula palapala mayampe otubwanya kutabula.

Sonsolokela kulampe na kifuko kya kimpengele. Bible unena’mba: “Muntu wañeni umona kibi penepo wefya: Ino bendalale bapita’tu ne kususuka ponka.” (Nkindi 22:3) Ano i madingi a tunangu abwanya kulondwa mu kitatyi kya bimpengele. Shi kubaletwa kidyumu kitala lūlu lulasa mudilo, dilobe, kimpumpu, nansha kipasha, tunangu tukatonona boba badi mu kifuko mobilongeka banyemene ku kifuko kya mutyima-ntenke. Būmi budi na mvubu kutabuka njibo nansha bintu bikwabo bya ku ngitu.

Ku bamo, i bipēla kutonga kuleka kushikata mu kifuko mudi kyaka kikatampe. Muntu umo wa lupusa unena amba: “Kyaka kya kimpengele kyendanga kilundila’ko mu ntanda. I bipindi bityetye kete bya Ntanda mutanwa byaka bityetye, ino mu mafuku āya kumeso bimpengele bikatampe bikalongeka mu bino bifuko.” Bino bibwanya kulongeka, kimfwa, mu bibundi bidi munshi nansha myaba idi kubwipi na kulongeka bimpengele. Ukatyepeja’ko masusu atamba ku bimpengele shi wepuke kushikata mu bino bifuko bya kyaka kikatampe nansha kuvilukila ku kifuko kya mutyima-ntenke.

Kimba mwa kulongela. Nansha byolonga bukomo bwa kwikinga, ukokeja kufikilwa nyeke na kinkumbulu kya mu kitulumukila. Ukapēlelwa kulwa nabyo shi ukimbe mwa kulongela kumeso kwa kitatyi. Kino i kikwatañane na madingi adi mu Nkindi 22:3, atelelwe kūlu’ku. Lelo kivwe kyobe ke kikute kala ne kodi mwilongolole mwa kwendela? Mu misoñanya idi mu dibuku (1-2-3 of Disaster Education) mubadilwa ne ino: Kwilamija lawa, ntyupa wa mema, bidibwa kebyoneka, ne mikanda ya kamweno. Kadi bikekala biyampe kubandawila pamo na kyobe kisaka muswelo mwine wa bimpengele bikokeja kulongeka ne byomukokeja kulonga pa kimpengele ne kimpengele.

Lama kipwano kya mpwaninine na Leza. Kino kibwanya kukukwasha mu ngikadilo yo-yonso. Bible wisambilanga padi Leza amba i “Shandya byalusa, Leza wa kanye ka kusenga konso, wakwitusenga mu byamalwa byetu byonso.” Vese mukwabo umutela bu Leza “wakusenga mityima ya bakālale.”—2 Kodinda 1:3, 4; 7:6.

Bine, Leza uyukile biyampe ngikadilo ifikila boba bamwitabije. I Leza wa buswe uleta bukankamane mu miswelo palapala. (1 Yoano 4:8) Milombelo, ke ya kulombapo bingelengele, ino ya kulomba bukomo bwa mushipiditu sandu wa Leza, ikokeja kukwasha mu ngikadilo yo-yonso. Mushipiditu sandu ubwanya kukuvuluja bisonekwa bya mu Bible bikokeja kusenga ne kutalaja mityima ya boba batenwe  na byamalwa. Na bubine, bengidi ba Leza ba kikōkeji babwanya kwiivwana na mwēivwanine Davida, mulopwe wa Isalela wa kala, wānene amba: “Eyo, i binebine, nansha mpityile mu kipakasa kya mujiñininya wa lufu, nkikakwatyibwapo moyo ku kibi, shi kika, shi kika? mhm; mwanda abe udi nāmi: Kamama kobe ne mukombo obe binseñanga ku mutyima.”—Mitōto 23:4.

Bene Kidishitu bekwashanga abo bene na bene. Mu myaka katwa kabajinji, Akabusa, mupolofeto Mwine Kidishitu wālombwele amba, “kukaībwanga kipupo kya nzala kikatampe panopantanda ponso. Nakyo ne kufika kyafikile mu myaka ya Kodusa Kesala.” Kipupo kya nzala kyāponene bininge bana ba bwanga ba Yesu mu Yudea. Lelo bana ba bwanga ba ku mitamba mikwabo bālongele’po bika pobāivwene amba banababo Bene Kidishitu badi mu byamalwa? Nsekununi inena amba: “Bāna-babwanga batele ponka mutyima wa kutumina bāna babo byakupandilamo badi bēkele mu Yudea, monka mwadi mwikadile bupeta bwabo balongela monka, wa twandi wa twandi.” (Bilongwa 11:28, 29) Bebākweshe na buswe.

Dyalelo nadyo shi kubalongeka bimpengele bikatampe, bengidi ba Leza baloñanga muswelo umo onka. Batumoni ba Yehova bayukene biyampe amba bakwashanga banababo betabije. Kimfwa, palongekele kintenshi mu Shili mu mafuku 27 Kweji 2, 2010, Batumoni ba Yehova bakweshe bukidibukidi boba baponenwe nakyo. Karla, muntu umo waselelwe njibo na kintenshi kya mabimbi a mema kitwa bu tsunami, unena’mba: “Twasengelwe ne kukankamikwa pa kumona amba difuku’tu dyalondele’po [banabetu Batumoni] batambile ku bifuko bikwabo baiya kwitukwasha. Pampikwa ne kutatana kwine, Yehova wetusengele kupityila ku buyampe bwa bano bengidi ba kwituma. Nēmwene bu muswedibwe kadi mulamibwe.” Nkambo wandi, wampikwa kwikala Kamoni, wamwene bukwashi bwebapelwe. Wanene amba: “Bino i bishile kulampe na byo nkendi mumone mu myaka mivule mu kyami kipwilo.” Byaamwene byamutonwene anene Batumoni ba Yehova befunde nandi Bible.

Kwilunga na boba basenswe Leza i bukwashi bukatampe mu bitatyi bya byamalwa. Nansha nabya, lelo kukekala kitatyi kekikekalakopo monka bimpengele? Tutalei byobya binena Bible pa uno mwanda.

[Kifwatulo pa paje 6]

Lelo kivwe kyobe ke kikute kala ne kodi mwilongolole mwa kwendela?

[Kifwatulo pa paje 7]

Milombelo, ke ya kulombapo bingelengele, ino ya kulomba bukomo bwa mushipiditu sandu wa Leza, ikokeja kukwasha mu ngikadilo yo-yonso

[Kifwatulo pa paje 7]

Bene Kidishitu bekwashanga abo bene na bene mwa kulwila na lupusa lwa bimpengele

[Kifwatulo pa paje 7]

“Nemwēne bu muswedibwe kadi mulamibwe”