Nsongalume kampanda diende Will udi wamba ne: “Kubala Bible kutu kutshiokesha, nanganagna wewe kuyi mumanye mushindu muimpe wa kumubala.”

 Udi musue kujandula malu adi mua kukuambuluisha bua dibala dia Bible dikusankishe anyi? Tshiena-bualu etshi netshikuambuluishe.

•  Ikala umona malu audi ubala au bu adi enda enzeka

•  Buela mu buondoke!

•  Tshidi bansonga nebe bamba

 Tuma meji ebe onso ku malu audi ubala. Udi mua kuenza malu adi alonda aa:

1.   Sungula bualu bua mu Bible buudi musue kudilongela. Udi mua kusungula bualu kampanda bua mu Bible anyi mvese kansanga wa mu Evanjeliyo, peshi udi mua kusungula bualu bua mu drama ya dibala dia Bible ikadiku mu jw.org.

2.   Bala bualu abu. Udi mua kudibadilabu wewe nkayebe, anyi kububala ne dîyi dikole paudi ne balunda bebe peshi ne balela bebe. Muntu umue udi mua kubala mêyi a muntu udi ulonda bualu mu Bible, bakuabu pabu babala mêyi a bantu bakuabu.

3.   Tetabi lungenyi lumue anyi ngenyi ya bungi idi ilonda eyi:

   •   Zola bimfuanyi bua kumvuija bualu buudi ubala abu. Anyi zola bimfuanyi bia mudi malu enda alondangana, uzole tubimfuanyi tudi tumvuija tshitupa tshia mianda. Funda mêyi adi umvuija bimfuanyi bia malu onso adi enda enzeka.

   •   Zola mishonyi. Tshilejilu, paudi ubala bualu bua muena lulamatu kampanda, zola mishonyi idi ituangaja ngikadilu yende ne malu avuaye muenze ne mabenesha avuaye mupete.

   •   Fuanyikija bualu abu ne nsombelu mipiamipia idiku. Difuanyikijilabu mu bibadi bia bungi ne ebeja muntu muena bualu ne bualu, ne bantu bavuapu pavua malu au enda enzeka.

   •   Biobi ne: umue wa ku bantu baudi mudifuanyikijile abu mmuangate dipangadika dibi, difuanyikijila tshikala mua kumufikila. Tshilejilu, difuanyikijilabi muvua Petelo muvile Yezu. (Mâko 14:66-72) Mmunyi muvua Petelo mua kuandamuna bantu bavua bamusuya abu bimpe?

   •   Wewe mukokeshe bua kuenza bualu kampanda, dienzeja bua kudifundila buebe bualu budi bupetangana ne bualu bua mu Bible, ubufunde buikala ne malongesha adi bantu mua kupetelamu.​—Lomo 15:4.

 Wewe mukonkonone malu au bimpe, udi mua kujandula bubanji budi busokokamu. Bualu bukuabu, kupeta muaku nansha umue anyi ibidi ya malu a mu Bible kudi mua kukuambuluisha bikole.

 Tshilejilu, fuanyikija bualu budi mu Matayi 28:7 ne budi mu Mâko 16:7.

•    Bua tshinyi Mâko uvua mujadike ne: Yezu uvua ne bua kumuenekela bayidi bende “ne Petelo” mu katupa kakese?

•  Lungenyi: Mâko kavua mumone malu au ne ende abidi to, pamuapa Petelo ke uvua mumumanyishawu.

•  Bubanji busokoka: Bua tshinyi Petelo uvua mua kuikala mukoleshibue pakumvuaye ne: Yezu uvua ujinga kumumona kabidi? (Mâko 14:66-72) Mmunyi muvua Yezu mudileje mulunda muimpe wa Petelo? Mmunyi muudi mua kuidikija Yezu ne kuikala mulunda muimpe kudi bantu bakuabu?

 Wewe umona malu audi ubala mu lungenyi bu adi enda enzeka ne ubuela mu buondoke buawu, dibala dia Bible nedikusankishe bikole.