Kudi masambila atu Nzambi kayi wandamuna to. Mona malu abidi atu enza bua Nzambi abenge kuandamuna disambila kampanda.

1. Disambila didi dibengangana ne disua dia Nzambi

 Nzambi katu wandamuna masambila adi abengangana ne disua diende anyi mikenji yende idi mu Bible to. (1 Yone 5:14) Tshilejilu, Bible utu utukandika lukuka. Manaya a makuta atu asaka bantu bua kuikala ne lukuka. (1 Kolinto 6:9, 10) Nunku wewe ulomba Nzambi bua akuambuluishe utshimune mu dinaya dia makuta dia loteri, kakukuandamuna nansha. Nzambi ki mbukole kampanda budi kabuyi bumueneka buudi mua kubila bua wewe kutshimuna mu manaya a buena aa to. Mu bulelela mbimpe usanke bua bualu ebu, tshianana tuvua mua kupeta buôwa bua bivua bantu bakuabu mua kulomba Nzambi bua enze.​—Yakobo 4:3.

2. Muntu udi usambila udi wenza malu ne buntomboji

 Nzambi katu uteleja bantu badi badisuike bua kuenza malu adi amunyingalaja to. Tshilejilu, Nzambi wakambila bantu bavua bamba muvuabu bamutendelela kadi eku bikale bantomboji ne: “Nansha munudi nuenza masambila a bungi, tshiena nteleja to; bianza biena mbiuwule tente ne mashi.” (Yeshaya 1:15) Kadi bu bobu bashintuluke ne ‘balulamije malu’ ne Nzambi, uvua mua kubateleja pavuabu bamusambila.​—Yeshaya 1:18.