Bible udi uleja mutudi mua kumanya dishilangana didi pankatshi pa bantu badi mu tshitendelelu tshilelela ne badi mu tshia dishima. Udi wamba ne: “Nenubamanyine ku mamuma abu. Bantu kabatu bapuola tumuma tua mvinyo ku mêba anyi tumuma tua mfigi ku bisonsa bia nyiny’a tshisonga to, ki mmuomu anyi?” (Matayi 7:16) Ku diambuluisha dia tshidi tumuma tua mvinyo tupatula, udi mua kumanya dishilangana didi pankatshi pa tumuma atu ne tshikutu tshia mêba. Bia muomumue, udi mua kumanya dishilangana didi pankatshi pa tshitendelelu tshilelela ne tshia dishima ku mamuma abi, anyi ku bimanyinu ebi.

1.   Tshitendelelu tshilelela tshidi tshiangatshila malongesha malelela aditshi tshilongesha mu Bible, ki ku nkindi ya bantu to. (Yone 4:24; 17:17) Mu malongesha au mudi dilongesha dia anyima ne dia ditekemena dia muoyo wa tshiendelele mu mparadizu. (Misambu 37:29; Yeshaya 35:5, 6; Yehezekele 18:4) Katshiena tshidikanda bua kuela malongesha a dishima a bitendelelelu patoke to.​—Matayi 15:9; 23:27, 28.

2.   Tshitendelelu tshilelela tshidi tshiambuluisha bantu bua kumanya Nzambi, tshibalongesha ne dîna diende, dia Yehowa. (Misambu 83:18; Yeshaya 42:8; Yone 17:3, 6) Katshitu tshilongesha ne: Nzambi katu umvuilangana anyi ne: udi kule netu to, kadi tshitu tshilongesha ne: mmusue bua tudie nende malanda.​—Yakobo 4:8.

3.   Tshitendelelu tshilelela tshitu tshilongesha ne: Nzambi udi upetesha bantu lupandu anu ku diambuluisha dia Yezu Kristo. (Bienzedi 4:10, 12) Benamu badi batumikila mêyi a Yezu ne baditatshisha bua kulonda tshilejilu tshiende.​—Yone 13:15; 15:14.

4.   Tshitendelelu tshilelela tshidi tshitamba kulongesha ne: Bukalenge bua Nzambi ke ditekemena dimuepele bua bantu. Benamu batu bambila bantu bakuabu malu a Bukalenge ebu ne tshisumi tshionso.​—Matayi 10:7; 24:14.

5.   Tshitendelelu tshilelela tshidi tshikankamija bantu bua kunangangana ne muoyo mujima. (Yone 13:35) Tshidi tshilongeshangana bua kunemeka bantu ba mu bisa bionso ne kuakidila bantu ba makoba onso, ba miakulu yonso, ne ba miaba yonso. (Bienzedi 10:34, 35) Dinanga didi dibasaka bua kubenga kuya ku mvita.​—Mika 4:3; 1 Yone 3:11, 12.

6.   Tshitendelelu tshilelela katshitu ne bamfumu batutshi tshifuta makuta to, ne katshitu tshipesha bena mudimu ba Nzambi badimu mianzu minene ya lumu to.​—Matayi 23:8-12; 1 Petelo 5:2, 3.

7.   Tshitendelelu tshilelela katshitu tshibuelakana mu malu a tshididi nansha kakese. (Yone 17:16; 18:36) Tshidibi benamu batu banemeka mbulamatadi ne bamutumikila muaba wonso udibu, mu diumvuangana ne dîyi dituma dia mu Bible edi: “Nufute Kaisa bintu bia Kaisa [udi uleja bukokeshi bua bantu], kadi nufute Nzambi bintu bia Nzambi.”​—Mâko 12:17; Lomo 13:1, 2.

8.   Tshitendelelu tshilelela ke njila wa muoyo, ki nkuenza mikiya patupu anyi kuenza malu kampanda bua kuwuja mukenji to. Benamu badi balamata mikenji minene ya bikadilu bilenga idi mu Bible mu malu onso. (Efeso 5:3-5; 1 Yone 3:18) Pamutu pa kumvua bibi, badi bobu ne disanka dia kutendelela “Nzambi wa disanka.”​—1 Timote 1:11.

9.   Bantu badi mu tshitendelelu tshilelela nebikale bakese. (Matayi 7:13, 14) Misangu ya bungi batu bapepeja bantu badi mu tshitendelelu tshilelela, babaseka, ne babakengesha bua mudibu benza disua dia Nzambi.​—Matayi 5:10-12.

Tshitendelelu tshilelela katshiena anu ‘tshiakane buanyi meme to’

 Kusungula tshitendelelu kampanda anu bualu tshidi tshitusankisha kudi ne njiwu. Bible ukavua muleje tshikondo tshivua bantu ne bua ‘kudiunguijila balongeshi [ba bitendelelu] bua kumvua malu adi abafunya ku matshi.’ (2 Timote 4:3) Kadi Bible udi utukankamija bua kulonda “ntendelelu udi mukezuke ne kayi munyanguke ku mêsu kua Nzambi wetu ne Tatu,” nansha yeye kayi ne bantu ba bungi menemene.​—Yakobo 1:27; Yone 15:18, 19.