Tshia kuenza bua kusanka ne bitudi nabi
Tuetu bonso, tuambe ne: badi mu mabaka, bajike, bansonga anyi bakulakaje tutu basue kuikala ne diakalenga ne kusanka ne bitudi nabi. Mufuki wetu mmusue ne: tuikale mushindu au, ke bualu kayi mmutupeshe mibelu mitambe buimpe.
Enza mudimu ne muoyo umue
Muntu “enze mudimu bikole, wenza mudimu muimpe ne bianza biende, bua amone mua kuikala ne tshintu tshia kuabanyina muntu udi ukengela bintu.”—EFESO 4:28.
Mufuki wetu udi utukankamija bua tumone mudimu mu mushindu muimpe. Bua tshinyi? Muntu udi wenza mudimu bikole udi ne disanka bualu udi ne mushindu wa kudiambuluisha yeye ne bena mu dîku diende. Udi mua kuambuluisha too ne muntu udi ukengela bintu. Nansha mfumuende wa mudimu neamutue mushinga. Nunku muenji wa mudimu muimpe neenze anu muende muonso bua kulama mudimu wende. Mifundu idi ileja ne: difutu dia mudimu mukole “ndipa dia kudi Nzambi.”—Muambi 3:13.
Ikala ne bululame
“Tudi batuishibue ne: tudi ne kondo ka muoyo kalulame, bu mutudi basue kuenda mu bululame mu malu onso.”—EBELU 13:18.
Tuetu ne bululame, tudi tudiumvua ne bujitu, bikale ne ditalala dia mu muoyo, ne tudi tulala tulu tuimpe butuku. Kabidi, bantu bakuabu nebatueyemene ne nebatunemeke. Aa mmalu mimpe adi bantu badi kabayi ne bululame bapangila. Bualu bukuabu, kondo kabu ka muoyo kadi mua kubalubakaja, ne badi mua kuikala bakadi ne buôwa bua ne: dimue dituku bantu nebamanye bidibu benza.
Ikala ne mmuenenu muimpe wa makuta
“Nsombelu wenu kikadi wa dinanga dia makuta, kadi nusanke ne bintu binudi nabi.”—EBELU 13:5.
Tutu dijinga ne makuta bua kusumba biakudia ne bintu bikuabu bia mushinga. Kadi “dinanga dia makuta” didi ne njiwu ya bungi. Didi mua kusaka muntu bua kutamba kufila dîba diende ne makanda ende, wenza muende muonso bua kupeta makuta a bungi. Dikeba makuta mushindu eu didi mua kukebela dibaka diende lutatu, kumuiba dîba didiye mua kusomba ne bana bende, ne kunyanga mene makanda ende a mubidi. (1 Timote 6:9, 10) Bualu bukuabu, muntu udi munange makuta mmufuane kuenza malu kayi ne bululame. Muena meji kampanda wakamba ne: “Muena lulamatu neapete mabenesha a bungi, kadi muntu udi ufuila bua kupeta bubanji kakupanga kupeta tshilumbu to.”—Nsumuinu 28:20.
Sungula dilongesha ditambe buimpe
“Ulame meji adi ambuluisha ne bukokeshi bua kunana lungenyi.”—NSUMUINU 3:21.
Dilongesha dimpe didi dituambuluisha bua kulua bantu bakole badi bashindame ne baledi bakumbane. Kadi dilongesha dimpe dia panu apa nkayadi kadiena dijadikila muntu ne: neikale anu mu bukubi ne disanka kashidi nansha. Bua kuikala ne disanka mu nsombelu wetu mujima, bidi bikengela tulonge malu a Nzambi. Mifundu idi yamba bua muntu udi uteleja Nzambi ne: “Malu onso adiye wenza neende bimpe.”—Misambu 1:1-3.
Mona bikuabu:
TSHIBUMBA TSHIA NSENTEDI
Mua kunanga mudimu mukole
Konkonona imue mishindu idi Bible ufila mibelu mimpe bua kupeta disanka ne musangelu bua mudimu.
TABULUKAYI!
Njila wa kupetela disanka—Kusanka ne bitudi nabi ne kuikala ne muoyo wa tshipapayi
Bantu ba bungi batu bela meji ne: kuikala ne disanka nkuikala ne bintu bia bungi ne bubanji. Kadi makuta ne bintu bidi mua kupetesha disanka dia matuku a bungi anyi? Malu akadi menzeke adi aleja tshinyi?
